Read Uzbek Muqaddas Kitob 1 Shohlar 18 Bible Online

1 Shohlar 18 - Uzbek Muqaddas Kitob bible

1 Shohlar 18

¹Shoul bilan Dovudning suhbati endi tugagan ham ediki, Yoʻnatanning[88] koʻngli Dovudga bogʻlandi, Yoʻnatan uni oʻz joni kabi aziz koʻrdi.

²Oʻsha kundan boshlab Shoul Dovudni yonida olib qoldi, otasining uyiga qaytib ketishiga ijozat bermadi.

³Yoʻnatan Dovudni oʻz joniday aziz koʻrgani uchun u bilan ahd qildi.

⁴Ustidagi kiyimini yechib berdi, sovuti, qilichi, kamoni va kamarini ham Dovudga hadya qildi.

⁵Shoul Dovudni qayerga joʻnatmasin, Dovud muvaffaqiyatga erishdi. Shu bois Shoul unga qoʻshinidagi katta lavozimni berdi. Bu voqeadan barcha xalq ham, Shoulning xizmatkorlari ham xushnud boʻlishdi.

⁶Dovud Goʻliyotni oʻldirgandan keyin, jangchilar oʻz uylariga qaytayotgan edi. Isroilning hamma shaharlaridan kelgan ayollar childirma va torli musiqa asboblarini chalib, oʻyin — kulgi qilib, shoh Shoulni kutib olgani chiqishdi.

⁷Yayrab — oʻynasharkan, shu qoʻshiqni aytishardi: “Shoul minglarchasini oʻldirdi, Dovud esa oʻn minglarchasini!”

⁸Bu soʻzlar Shoulga ogʻir botdi, uning gʻashini keltirdi. “Dovudga oʻn mingtasini, menga esa mingtasini berishdi! Unga shoh boʻlishdan boshqa yana nima qoldi?!” deb oʻyladi.

⁹Shunday qilib, oʻsha kundan boshlab Shoul Dovudga yomon koʻz bilan qaray boshladi.

¹⁰Ertasi kuni Xudo yuborgan yovuz ruh Shoulni qamrab oldi, u oʻz uyida jazavaga tushdi. Dovud har galgiday yana lira chalib oʻtirar, Shoulning qoʻlida nayza bor edi.

¹¹U oʻzicha: “Dovudni nayza bilan urib devorga qoqib qoʻyaman”, deb nayzani unga qaratib otdi. Lekin Dovud ikki safar ham unga chap berib qutulib qoldi.

¹²Shoul Dovuddan qoʻrqardi. Chunki Egamiz Dovud bilan birga edi, Shoulni esa tark etgan edi.

¹³Shu sababli Shoul oʻz yonidan Dovudni uzoqlashtirdi, uni mingta sipohga bosh etib tayinladi. Dovud lashkarga bosh boʻlib, jangga borardi.

¹⁴Egamiz Dovud bilan boʻlgani uchun, u har qanday ishning uddasidan chiqardi.

¹⁵Dovudning katta muvaffaqiyatini koʻrib, Shoul battarroq qoʻrqardi.

¹⁶Butun Yahudo va Isroil xalqi Dovudni yaxshi koʻrardi, chunki Dovud ularning oldingi safida yurib, jangga borardi.

¹⁷Bir kun Shoul Dovudga dedi: — Toʻngʻich qizim Meravni senga beraman. Faqat dovyurak boʻlib, men uchun Egamizning urushlariga bosh boʻl. Shoul: “Dovud mening qoʻlim bilan emas, Filistlarning qoʻli bilan oʻldirilsin”, deb oʻylardi.

¹⁸Dovud Shoulga: — Men oʻzim kim boʻlibman, yoki Isroilda oilam, otam xonadoni nima boʻlibdiki, shohga kuyov boʻlsam?! — dedi.

¹⁹Shunday qilib, Shoulning qizi Merav Dovudga uzatiladigan boʻldi. Lekin Shoul qizini, Dovudga bermay, Maxlalik Odriyolga uzatdi.

²⁰Shoulning boshqa qizi Mixal esa Dovudga koʻngil qoʻygan edi. Buni eshitgan Shoul xursand boʻldi.

²¹“Dovudga Mixalni beraman, qizimni berib, Dovudni tuzogʻimga ilintirib olaman, Filistlar esa uni oʻldiradi”, deb oʻyladi. — Endi bu safar qulay fursat yetdi, menga kuyov boʻlasan, — dedi Dovudga Shoul.

²²Keyin Shoul a’yonlariga: — Dovudga, shoh sendan xursand, hamma xizmatkorlari ham seni yaxshi koʻradi, shohga kuyov boʻladigan payting keldi, deb yashirincha aytinglar, — dedi.

²³Shoulning a’yonlari bu gapni Dovudga yetkazishdi. Dovud esa shunday javob qaytardi: — Men kambagʻal, arzimas bir odam boʻlsam, shohga kuyov boʻlish, sizlar aytganday, osonmi?!

²⁴A’yonlar, oʻz navbatida, Dovudning gaplarini Shoulga yetkazishdi.

²⁵Shoul shunday amr berdi: — Dovudga, shoh gʻanimlaridan oʻch olmoqchi, shuning uchun qalinga yuzta Filistning sunnat terisidan[89] boshqa narsa istamaydi, deb aytinglar. Shoul shu yoʻsinda Dovudning Filistlar qoʻliga tushib nobud boʻlishini rejalashtirgan edi.

²⁶A’yonlar Shoulning aytganlarini Dovudga yetkazishdi. Dovud, oʻshanda shohga kuyov boʻlishga haqli boʻlar ekanman — da, deb sevindi. Belgilangan kundan oldin,

²⁷Dovud va uning odamlari borib, ikki yuzta Filistni oʻldirdi. Dovud oʻldirilgan Filistlarning sunnat terisini bitta ham qoldirmay, shohga keltirib berib, shohning kuyovi degan nomga munosib ishlarni bajardi. Shundan soʻng Shoul qizi Mixalni Dovudga turmushga berdi.

²⁸Shoul endi aniq bildiki, Egamiz Dovud bilan birga ekan, qizi Mixal ham Dovudni sevar ekan.

²⁹Shunday qilib, Dovuddan yanada hadiksirab, umrining oxirigacha unga dushman boʻlib qoldi.

³⁰Filist beklari qachon hujum qilsalar, Dovud Shoulning boshqa lashkarboshilariga qaraganda ortiq zafarga erishardi. Shu sababdan Dovud katta shuhrat qozondi.