Read Uzbek Muqaddas Kitob 1 Shohlar 21 Bible Online

1 Shohlar 21 - Uzbek Muqaddas Kitob bible

1 Shohlar 21

¹Dovud Nav shahridagi[95] ruhoniy Oximalekning huzuriga bordi. Oximalek Dovudni kutib olarkan: — Nimaga yolgʻizsan? Nega yoningda hech kim yoʻq? — deb qoʻrquv ichra soʻradi.

²— Shoh menga bir topshiriq berdi, — dedi Dovud. — Senga bergan topshirigʻimni hech kim bilmasin, dedi. Shuning uchun odamlarimga, falon joyga borib turinglar, deb tayinlab keldim.

³Hozir yeyishga biror narsangiz bormi? Menga beshta non, yoki qoʻlingizga nima ilinsa, bering.

⁴— Oddiy nonimiz yoʻq, — deb javob berdi ruhoniy, — agar odamlaring ayollardan oʻzlarini tiygan boʻlishsa[96], nazr qilingan nonimiz[97] bor.

⁵— Yoʻlga chiqqanimizdan buyon ayollarga yaqinlashganimiz yoʻq, — dedi Dovud. — Safarimizning maqsadi oddiy boʻlganda ham, odamlarim oʻzlarini pok tutadi. Ayniqsa, bu safarimizda odamlarim oʻzlarini juda pok tutdilar.

⁶Shundan keyin ruhoniy unga muqaddas non berdi. Bu yerda Xudoga bagʻishlangan nondan boshqa non yoʻq edi. Bu non, Egamizning huzurida turgandan keyin, issiq non keltirilgan kuni olib qoʻyilgandi.

⁷Oʻsha kuni Shoulning Doyeg degan xizmatkori ham shu yerda edi. U Edomlik[98] boʻlib, Shoulning bosh choʻponi edi. Doyeg rasm — rusumlarni ado etgani Egamiz huzuriga kelgandi.

⁸— Yoningizda nayza yoki qilich yoʻqmi? — deb soʻradi Dovud Oximalekdan. — Shohning topshirigʻi shoshilinch boʻlgani uchun oʻzim bilan na qilichimni olibman, na boshqa qurolimni.

⁹— Elox vodiysida oʻzing oʻldirgan Filist Goʻliyotning qilichi bor, — dedi ruhoniy. — Efod orqasida matoga oʻrogʻliq turibdi. Bu yerda boshqa qurol yoʻq. Xohlasang, oʻshani olaver. — Oʻsha qilichni menga bera qoling, unaqasi topilmaydi, — dedi Dovud.

¹⁰Dovud Shouldan qochib, oʻsha kuni Gat[99] shohi Oxishning huzuriga bordi.

¹¹Oxishning xizmatkorlari: — Bu Isroil shohi Dovud — ku! — deyishdi. — Odamlar: “Shoul minglarchasini oʻldirdi, Dovud esa oʻn minglarchasini”, deb oʻynab qoʻshiq aytgan edi — ku.

¹²Bu gaplar Dovudni choʻchitib qoʻydi. U Gat shohi Oxishdan juda qoʻrqardi.

¹³Dovud ularning koʻz oʻngida qiyofasini oʻzgartirdi, ularning oldida oʻzini telbalikka solar, saroy darvozasini timdalab, soʻlaklarini soqoliga oqizardi.

¹⁴Oxish xizmatkorlariga dedi: — Qaranglar bu odamga! Jinnining oʻzi — ku! Nimaga uni mening huzurimga olib keldingizlar?

¹⁵Mening oldimda jinnilik qilsin deb uni olib keldingizlarmi? Menga jinnilar kerakmidi?! Shu odamning saroyimga kirishi shartmi?!