Read Uzbek Muqaddas Kitob 1 Shohlar 24 Bible Online

1 Shohlar 24 - Uzbek Muqaddas Kitob bible

1 Shohlar 24

¹Dovud u joylarni ham tark etib, En — Gedidagi pana joylarda[116] yashay boshladi.

²Shoul Filistlarni quvlab yuborib qaytib kelgach, Dovud En — Gedi yonidagi dasht — choʻllarda yuribdi degan xabarni eshitdi.

³Shoul odamlari bilan Dovudni qidirmoqqa otlandi. Isroilning eng sara sipohlaridan uch mingtasini tanlab olib, qoyalari va yovvoyi echkilari bilan mashhur boʻlgan joyga ketishdi.

⁴Yoʻlda qoʻy qoʻrasi boʻlib, uning yaqinida bir gʻor bor edi. Shoul ehtiyojini qondirmoqchi boʻlib gʻorga kirdi. Gʻorning eng ichkarisida esa Dovud odamlari bilan oʻtirgan edi.

⁵Odamlari Dovudga aytdilar: — Egamiz senga: “Gʻanimingni qoʻlingga beraman, unga bilganingni qilaver”, degan edi. Oʻsha kun shu bugundir! Dovud sekin borib, Shoulning ridosi etagidan bilintirmay bir parcha kesib oldi.

⁶Lekin Shoulning etagidan bir parcha kesib olgani uchun yuragida oʻkinch paydo boʻldi.

⁷Keyin odamlariga dedi: — Xudo saqlasin! Men Egamiz moy surtib tanlagan shohga — janobi oliylariga bunday qilolmayman. Unga qarshi qoʻlimni koʻtarmayman, chunki u Egamizning moy surtib tanlaganidir.

⁸Dovud shunday deb odamlariga tanbeh berdi, Shoulga tegishlariga ijozat bermadi. Shoul gʻordan chiqib, yoʻliga ketdi.

⁹Uning ortidan Dovud ham gʻordan chiqdi — da: — Shoh hazratlari! — deb Shoulni chaqirdi. Shoul orqasiga oʻgirildi, Dovud egilib ta’zim qildi va yer oʻpib

¹⁰dedi: — Dovud senga yomonlik qilmoqchi degan odamlarning gaplariga nima uchun quloq solyapsiz?

¹¹Oʻz koʻzingiz bilan koʻrib turibsizki, hozir Egamiz gʻorda sizni qoʻlimga bergan edi. Odamlarim sizni oʻldirmoqchi boʻlishgan edi, lekin mening koʻzim qiymadi, “Janoblariga qoʻl tekkizmayman, chunki u Egamizning moy surtib tanlaganidir”, dedim.

¹²Qarang, ey otam! Qoʻlimdagi manavi parchaga qarang! Ridoingizning etagidan kesib oldim. Ridoingizdan bir parchani kesib oldim — u, lekin sizni oʻldirmadim. Koʻnglimda yomonlik va makkorlikdan asar yoʻqligini yaxshi bilib oling. Men sizga gunoh qilmaganman — u, siz esa mening jonimga qasd qilish payiga tushgansiz.

¹³Xudoga soldim, men uchun U sizdan oʻch olsin. Men sizga qoʻl koʻtarmayman.

¹⁴Eskilar: “Yomonlik yomon odamlardan kelar”, deyishgan, shunga koʻra, men sizga qoʻlimni koʻtarmayman.

¹⁵Isroil shohi kimning payiga tushgan, axir? Siz kimni ta’qib qilyapsiz? Oʻlgan itday yoki burgaday arzimas boʻlgan menimi?

¹⁶Xudoga soldim, qay birimizning haq ekanimizni Xudo hukm qilsin, dodimni Oʻzi eshitsin. Egamiz mening yoʻlimni berib, sizning qoʻlingizdan xalos etsin.

¹⁷Dovud gapini tugatgan ham ediki, Shoul: — Dovud, oʻgʻlim, bu sening ovozingmi? — dedi — yu, uvvos solib yigʻlay boshladi.

¹⁸— Sen haqsan, men notoʻgʻri qildim, — dedi Shoul Dovudga. — Sen menga yaxshilik qilgan eding, men yomonlik bilan javob qaytardim.

¹⁹Bugun menga boʻlgan munosabatingni aniq — ravshan isbotlading. Egamiz meni sening qoʻlingga beribdi — yu, lekin sen meni oʻldirmabsan.

²⁰Qaniydi, hammayam senga oʻxshab dushmanini tutib olganda, oq yoʻl tilab qoʻyib yuboraversa?! Bugun menga qilgan yaxshiliging uchun senga Egamizdan qaytsin!

²¹Endi men anglab yetdim: sen albatta shoh boʻlasan, Isroil shohligi sening qoʻlingda mustahkam boʻladi.

²²Endi menga, sizdan keyin avlodingizni yoʻq qilmayman, otangiz xonadonidan nomingizni oʻchirmayman, deb Egamiz oldida ont ich.

²³Dovud Shoulning oldida ont ichdi. Shundan soʻng Shoul uyiga qaytib ketdi. Dovud esa odamlari bilan adirlardagi qarorgohiga qaytdi.