Read Uzbek Muqaddas Kitob 1 Shohlar 27 Bible Online

1 Shohlar 27 - Uzbek Muqaddas Kitob bible

1 Shohlar 27

¹Dovud: “Bir kun Shoulning qoʻlida nobud boʻlsam kerak”, deb oʻylardi. “Yaxshisi, Filistlar yerlariga qochib qolay. Oʻshanda Shoul Isroilning har burchagidan meni qidirib yurishdan voz kechadi, men ham uning qoʻlidan qutulib qolaman.”

²Shunday qilib, Dovud va uning yonidagi olti yuz kishi oilalari bilan yoʻlga otlanib, Gat[127] shohi Oxish tomoniga oʻtib ketishdi. Shoh Oxish Moyux deganning oʻgʻli edi.

³Hammalari oilalari bilan birga Gatda — Oxishning yonida joylashishdi. Dovud ham ikkala xotini — Yizrillik Oxinavam va Karmillik Navolning bevasi Obigayl bilan joylashdi.

⁴Shoul Dovudning Gatga qochib ketganini eshitgach, endi uni axtarmay qoʻydi.

⁵Dovud Oxishga: — Agar men, qulingiz, sizning iltifotingizga sazovor boʻlsam, yon — atrofdagi shaharlarning biridan menga joy bersangiz, men oʻsha yerda istiqomat qilayin, — dedi. — Qulingizning siz bilan birga shoh shahrida yashashiga hojat yoʻq.

⁶Oxish oʻsha kuni Dovudga Zixlax shahrini berdi. Oʻshandan buyon Zixlax Yahudo shohlariga qarashli shahardir.

⁷Dovud Filistlar yurtida bir yilu toʻrt oy istiqomat qildi.

⁸Dovud odamlari bilan Geshir, Gezer va Omolek xalqlarining yeriga bostirib borardi. Bu elatlar uzoq zamonlardan beri Shurga va Misr chegarasigacha choʻzilgan yerlarda yashab kelishardi.

⁹Dovud biror yurtni bosib olsa, erkak, ayol demas, tirik jonni sogʻ qoʻymasdi. Faqat qoʻy, mol, eshak, tuya va kiyim — kechaklarni oʻlja olib, shoh Oxishning huzuriga qaytib kelardi.

¹⁰Oxish: “Bugun biron yerga bostirib bordingizlarmi?” deb soʻrasa, Dovud: “Yahudoning Nagav choʻlidagi hududlarini bosib oldik”, yoki “Nagav choʻlidagi Yaraxmal urugʻi yerlarini bosib oldik”, yoki “Nagav choʻlidagi Xayin xalqi yerlarini[128] qoʻlga oldik”, deb javob berardi.

¹¹Dovud biror kimsani Gatga olib kelmas, “Dovud unday qildi, bunday qildi, deb aytmasin” deya, erkagu ayolni tirik qoldirmasdi. Dovud Filistlar yurtida yashagan paytda shunday qilardi.

¹²Oxish Dovudga ishonardi. “Dovud oʻz xalqi — Isroil xalqiga oʻzini dushman qilib qoʻydi, bundan keyin to abad mening xizmatimda qoladi”, deb oʻylardi.