Read Uzbek Muqaddas Kitob 1 Shohlar 28 Bible Online

1 Shohlar 28 - Uzbek Muqaddas Kitob bible

1 Shohlar 28

¹Oʻsha kunlarda Filistlar Isroil lashkari bilan urush qilmoqchi boʻlib, lashkarlarini toʻplashdi. Oxish Dovudga: — Bilib qoʻy, sen odamlaring bilan albatta men tomonda jang qilasan, — deb ta’kidladi.

²— Men qulingizman, oʻshanda nimalar qilishimni oʻzingiz koʻrasiz, — dedi Dovud. — Yaxshi, — dedi Oxish, — sen doimo mening shaxsiy qoʻriqchim boʻlib qolasan.

³Shomuil olamdan oʻtganda, butun Isroil xalqi unga aza tutgan va uni oʻz shahri Ramaga dafn qilishgan edi. Shoul esa arvoh chaqiruvchilarni va folbinlarni yurtdan yoʻqotib yuborgan edi.

⁴Shu orada Filistlar toʻplanib, Shunam shahriga borib qarorgoh qurishdi. Shoul ham jamiki Isroil qoʻshinini yigʻib, Gilbova togʻida[129] qarorgoh qurdi.

⁵Shoul Filistlar qoʻshinini koʻrdi — yu, qattiq qoʻrqib ketdi, uni vahima bosdi.

⁶Shoul “Nima qilay?” deb Egamizning xohish — irodasini bilmoqchi boʻlgan edi, U Shoulga na tushida, na ruhoniylar[130] va na paygʻambarlar orqali javob berdi.

⁷Shundan keyin Shoul a’yonlariga: — Menga birorta arvoh chaqiradigan ayolni topib kelinglar, uning oldiga borib maslahat solayin, — deb farmon berdi. — En — Doʻrda[131] bir arvoh chaqiradigan ayol bor, — dedi a’yonlar.

⁸Shoul boshqacha kiyimlar kiyib, qiyofasini oʻzgartirdi va ikki kishini ergashtirib, kech kirganda, oʻsha ayolnikiga bordi. — Iltimos qilaman, men uchun ruhlarga maslahat sol, senga kimning nomini aytsam, oʻsha odamni chaqirib ber, — dedi.

⁹Ayol shohga shunday javob berdi: — Shoul nimalar qilganini, arvoh chaqiradiganlarni va folbinlarni yurtdan yoʻqotib yuborganini bilasan — ku. Shunday ekan, nimaga meni nobud qilmoq uchun tuzoq qoʻyyapsan?

¹⁰— Xudo haqi, bundan senga zarracha yomonlik kelmaydi, — deb ont ichdi Shoul.

¹¹Shundan soʻng ayol: — Senga kimni chaqirib berayin? — deb soʻradi. — Menga Shomuilni chaqirib ber! — dedi Shoul.

¹²Ayol Shomuilni koʻrgach, qattiq baqirib yubordi. Soʻng Shoulga qarab, dedi: — Siz shoh Shoulsiz — ku! Nega meni aldadingiz?

¹³— Qoʻrqma! — dedi shoh ayolga, — nimani koʻryapsan? — Yer ostidan[132] chiqayotgan bir arvohni koʻryapman, — deb javob berdi ayol.

¹⁴— Nimaga oʻxshaydi? — soʻradi Shoul. — Rido kiygan keksaroq odam yuqoriga chiqyapti, — dedi ayol. Shu zahoti Shoul bildiki, u odam Shomuil. Muk tushib unga ta’zim qildi.

¹⁵— Nimaga meni chaqirib bezovta qilding? — soʻradi Shomuil. — Men juda qiynalib ketdim, — dedi Shoul. — Filistlar menga hujum qilishmoqchi. Xudo esa meni tark etdi. Menga na paygʻambarlar orqali, na tushimda javob beryapti. Endi nima qilay, ayting, shunga sizni chaqirgan edim.

¹⁶— Egamiz seni tark etib, senga dushman boʻlgan ekan, endi nimaga mendan soʻrayapsan? — dedi Shomuil.

¹⁷— Egamiz men orqali aytganini qildi. Shohlikni sening qoʻlingdan tortib olib, Dovudga berdi.

¹⁸Chunki sen Egamizning amriga itoat etmading, Uning alangalangan gʻazabini sen Omolek xalqiga sochmading. Ana shuning uchun Egamiz bugun shu kunlarni boshingga solyapti.

¹⁹U seni ham, Isroil xalqini ham Filistlar qoʻliga beradi. Ertaga sen va oʻgʻillaring mening yonimda boʻlasizlar[133]. Egamiz butun Isroil qoʻshinini ham Filistlar qoʻliga topshiradi.

²⁰Shoul birdan mukkasi bilan yerga tushdi. Shomuilning gaplaridan qattiq qoʻrqib ketdi, sillasi quridi. U bir kecha — kunduz tuz totmagan edi.

²¹Ayol Shoulga yaqinlashdi — da, uning qattiq qoʻrqib ketganini koʻrib shunday dedi: — Bu choʻringiz ham sizning gaplaringizni eshitdi, jonimni xatarga qoʻyib boʻlsa — da, istagingizni bajo keltirdim.

²²Endi bu choʻringizning gaplarini eshiting. Oldingizga ozgina non — pon qoʻyaman, yeysiz. Hali yoʻl yurasiz, non — pon yeb olsangiz, darmon boʻladi.

²³— Yemayman! — deb rad etdi Shoul. Lekin a’yonlari ham, ayol ham uni koʻndirishga koʻp harakat qilishdi. Oxiri, Shoul ularning aytganini qilishga rozi boʻldi. Yotgan yeridan turib, toʻshakka oʻtirdi.

²⁴Ayolning uyida boquvdagi bir buzogʻi bor edi. Ayol uni tezda soʻydi. Un oldi — da, xamir qorib, xamirturushsiz non yopdi.

²⁵Taomlarni Shoul bilan a’yonlari oldiga qoʻydi. Ular yeb — ichib, oʻsha kuni tunda turib joʻnab ketishdi.