Read Vaiphei THILSIAM THU 11 Bible Online

THILSIAM THU 11 - Vaiphei bible

THILSIAM THU 11

¹Zia hun a hin, khawvel ah pau chi khat bep leh thumal kibang mat ahi.

²Mihingte chu sualam gam in a kipêm pek ua, Shinar phâijawl a hung tung tau ah, zia tak ah chun um mun a khual tau a.

³Chun, a hung kiho ua, “Kisau in, cheklei siam hitiu in, pha tak in hâl tâk hitiu,” a tiu a. Tichun, suang thasâng in cheklei leh a châlmatna ding thingnâi thasâng ah thauvomman a hun nei tau a.

⁴Amau chun, “Kisau in, khawpi siam hitiu; chuleh, In sâng vân supha hial ah sâng in bawl hitiu in, I min uh thansak hitiu; achutiloleh, lei chung zosia ah hin thejak in hung um kha tawl hitiu,” a tiu a.

⁵Tichun, mihingte khawpi leh Insâng bawlte entha dingin LALPA chu a chia suk tai.

⁶LALPA chun, “Ngai tiam un, mite hi chi khat leh pau khat bep a hiu ah, zia thil hi a bawl pan tau hilam; tu’hin vang a nop nop uh bawl leule a bawl maw ding uh pakhat cha le umlo ahi hilam!

⁷Hung unla, vachia suk hitiu in, a kihotua theilona ding un a pau uh va sukdanglam piak hitiu,” a tia.

⁸Chutichun, LALPA’n amau haw chu zia tak ah kipat chun lei chung zosia’n a thejak ta’n; tichun, a khawpi bawl lai uh chu a haisan tau hi.

⁹Ziaziakchun, a min in Babel a sau ah; LALPA’n zia tak ah chun mi zosia pau a la sukdanglam tâk ziakin: zia kipat chun LALPA’n amau chu lei chung zosia’n a thejak ta ahi.

¹⁰Ziate hi Shem suante chu a hiu a: Shem chu kum za khat mi ahi ah, tui lêt nung kum ni ahi in chapa Arpaksad a hing a;

¹¹Arpaksad a hin zaw nung in Shem chu kum za nga a dam nalai ah; chapa leh chanu dang dang le a nei nalai hi.

¹²Arpaksad chun kum sawmthum leh nga a ti’n in chapa Shelah a hun hing a;

¹³Shelah a nei zaw nung in Arpaksad kum za li leh thum a dam nalai ah, chapa leh chanu dang dang le a nei nalai hi.

¹⁴Shelah chun kum sawmthum a tin in chapa Eber a hun hing a;

¹⁵Eber a nei zaw nung in Shelah chu kum za li leh thum a dam nalai ah, chapa leh chanu dang dang le a nei nalai hi.

¹⁶Eber chun kum sawmthum leh li a tin in chapa Peleg a hun nei in;

¹⁷Peleg a nei zaw nung in Eber chu kum za li leh sawmthum a dam nalai ah, chapa leh chanu dang dang le a nei nalai hi.

¹⁸Peleg chun kum sawmthum a tin in chapa Reu a hun nei in;

¹⁹Reu a nei zaw nung in Peleg chu kum za ni leh kua a dam nalai ah, chapa leh chanu dang dang le a nei nalai hi.

²⁰Reu chun kum sawmthum leh ni a tin in chapa Serug a hun nei in;

²¹Serug a nei zaw nung in Reu chu kum za ni leh sagi a dam nalai ah, chapa leh chanu dang dang le a nei nalai hi.

²²Serug chun kum sawmthum a tin in chapa Nahor a hun nei in;

²³Nahor a nei zaw nung in Serug chu kum za ni a dam nalai ah, chapa leh chanu dang dang le a nei nalai hi.

²⁴Nahor chun kum sawmni leh kua a tin in chapa Terah a hun nei in;

²⁵Terah a nei zaw nung in Nahor chu kum za khat sawm leh kua a dam nalai ah, chapa leh chanu dang dang le a nei nalai hi.

²⁶Terah chun kum sawmsagi a tin in chapa Abram, Nahor leh Haran te hi a hun hing hi.

²⁷Ziate hi Terah suante chu a hiu ah: Terah chun chapa Abram, Nahor leh Harante hi a nei ah: Haran in chapa Lot a nei hi.

²⁸Haran chu a pianna, Kaldai gam ah Ur khua a um lai un, a pa Terah thi masang in a la thi tai.

²⁹Chuleh, Abram tawh Nahor chun ji a nei gêl tau ah: Abram ji min chu Sarai ahi’n; Nahor ji min chu Haran chanu Milkah ahi.

³⁰Tu’hin, Sarai chu a chîng in, cha him him a nei puai.

³¹Terah in a chapa Abram tawh a tupa Lot, Haran chapa tawh a monu Sarai, a chapa Abram ji tawh a pui in, Kanaan gam ah kipêm dingin Kaldai gam ah Ur khua chu a hun pawtsan tau a: Himaleh, Haran khua a hung tun un, zia tak ah chun um mun a khualden tau a.

³²Terah dam sung chu kum za ni leh kum nga ahi’n; tichun, Haran ah chun Terah a thi tai.