Read Vaiphei THILSIAM THU 12 Bible Online

THILSIAM THU 12 - Vaiphei bible

THILSIAM THU 12

¹Zia lai ah chun, LALPA’n Abram kiang in, “La khua leh la gam ua kipat leh la chanaute lak ah kipat leh la pa In ah kipat hin pawtdok inla, gam ka hun etsakna ding lam ah chun chia in.

²Nam lopi tak in hun siam ing ka tin, hun maljawl ing ka tin, la min hi’lian ing ka; tichun, nangma chu maljawlna hi’n la;

³kuale nang hun maljawl tapo chu maljawl ing ka tin; hânsia hun law tapo chu hânsia law ing ka: nangma ah namtin maljawl in hung um in au,” a tia.

⁴Chutichun, Abram chu LALPA’n a hil gual ah chun a chia ta’n, Lot inle a zui ah. Abram chu Haran khua kipat a pawt daw lai ah chun kum sawmsagi leh nga mi ahi tai.

⁵Abram ji Sarai leh a naupa chapa Lot tawh a sum lamsa zosiau tawh Haran khua a neisa zosia leh a mite chu a pui ah, Kanaan gam zuan in a pawtdok tau a. Kanaan gam a tun phat un,

⁶Shekhem ah Moreh mun gangpi thing umna tiang in Abram in a gam chu a paltheng pek ah. Zia hun lai ah chun Kanaan mite a gam ah chun a la chêng nalai ui.

⁷Chun, Abram kiang in LALPA a hung kilâk ah, a kiang in, “Zia gam hi la suante kiang in pia ding ka hi,” a tia. Tichun, zia mun ah chun, a kiang ah kilâk LALPA â dingin mâichâm a siam tai.

⁸Zia kipat chun Bethel sak lam tâng tiang in a kichawn ah, zia tak ah chun a puanbûk a jak ah, tumlam ah chun Bethel a um ah, sualam pang ah chun Âi khua a um hi; zia tak ah chun LALPA â dingin mâichâm a siam kit ah, LALPA min chu a ko tai.

⁹Ahi’n, Abram chu awl awl in Negeb lam tiang in a kichawn pek a.

¹⁰Tichun, zia gam ah chun kial a hung tung in; kial a huaisiat ma ma ziakin, Abram le Aigupta gam ah vaum tadi dingin a kipêm suk tai.

¹¹Aigupta gam a lut ding kuan un a ji Sarai kiang ah chun, “Ngaitia, numei mêlhoi tak la hi ti ka hia’i;

¹²Aiguptate’n a hun mu phât ua leh, ‘Zia hi a ji ahi,’ ti’n kei ei that mai ding a hiu, nang chu bangma hun law pua’n au.

¹³Nangma ziak ah bit tak ah ka umtheina ding leh ka hinna hawi ah a umtheina dingin, ‘A suapinu ka hi,’ ti mai in,” a ti’n.

¹⁴Aigupta gam ah Abram a lût suk phat ah chun, Aigupta mite’n numei chu mêlpha a la sa ma mau a.

¹⁵Pharaoh miliante chunle a mu phât un, Pharaoh kiang in a mêlphat dan chu a vagen tau a. Chuleh, numei chu Pharaoh kiang in a hun pui tau a.

¹⁶Ama ziak ah chun Abram chu a bawlpha ma ma’n; belamte, bawngchalte, sabiltungchalte, suak pawsalte, suak numeite, sabiltungpi leh sangawngsaute natiang in a nei khawlaw tai.

¹⁷Himaleh, LALPA chun Abram ji Sarai ziakin Pharaoh leh a Insung mite chu hîpi’n a gawt ta’n.

¹⁸Tichun, Pharaoh in Abram a ko ah, “Ka chung ah la thilbawl hi bangtidan a hem? Bang ding ah la ji ahi lam ei hil lo la hem?

¹⁹Bang ding ah, ‘Ka suapinu ahi,’ la ti a hem? Ziaziakchun ei vei ka ji ding ah ka la kipui hial ziang na chu: tu’hin zia tak ah hin la ji chu a um hi, kipui kit inla, chia mang ta’n,” a tia.

²⁰Pharaoh in a chungchâng thu ah chun a mite thu a pia’n; a ji tawh a nei zosia tawh ama chu a hang thakdok tau a.