Read Vaiphei THILSIAM THU 13 Bible Online

THILSIAM THU 13 - Vaiphei bible

THILSIAM THU 13

¹Tichun, Abram chu Aigupta gam ah kipat in a hung pawtdok ah; ama tawh, a ji tawh, a nei leh lam zosia tawh Lot pum in Negeb lam zuan in a chia to tau a.

²Abram chu ganchate, dangkate leh sanate in a hausa ma ma ta’n.

³Negeb ah kipat chun Bethel tiang in a chia pek ah, a lim tak ah Bethel leh Âi khua kikâl ah puanbûk a jakna mun;

⁴mâichâm a la siamna mun ngei ah khan; zia mun ah chun Abram in LALPA min a ko tai.

⁵Chuleh, Abram hun zui zing Lot khanle belam honte, bawng honte leh puanbûkte le a nei a;

⁶a um khawmna ding un gam a hung kiting ta pua’n; a thil nei uh chu la a tam ma ma ngal ah, a um khawm thei ta him him puau a;

⁷Abram ganchingte tawh Lot ganchingte kikâl in kinialna a hung um ta’n: zia hun lai ah zia gam ah chun Kanaan mite leh Periz mite a la chêng ui.

⁸Ziaphatchun, Abram in Lot kiang ah, “Nang leh kei kikâl leh la ganchingte leh ka ganchingte kikâl in kinialna um ki’hen, Inkuan khat I hi’ngal un;

⁹gam pumpi la doina lam lam ah um thei hilo la hem? Keima ah kipat Inchuan mai ta’n. Nang in veilam la têl leh keima changlam in chia ing ka tin, nang in changlam la têl leh keima veilam in chia ziang ing ka,” a tia.

¹⁰Lot chu Zoar khua lam nga’n a dakdok ah, Jordan phâijawl zosia LALPA huan gual, Aigupta gam gual ah pha, mun tin ah tui kiningting ma ma ahi ti a hia’n; LALPA’n Sodom leh Gomorrah khuate a sukmangthai ma kha ahi ngal a.

¹¹Lot in Jordan phâicham zosia chu a têl ta’n; tichun, Lot chu sualam zuan in a kichawn tai: tichun, a chuam gêl ah um dingin a kikhen tau a.

¹²Abram chu Kanaan gam in a chêngden ah, Lot vang chu phâijawl khawpite lak ah chun a chêng lût ah, a puanbûk Sodom khua tiang in a chawn lût tai.

¹³Sodom mite chu mi nunsia, LALPA huat jawng tak ah gilo ma ma a hiu a.

¹⁴Chun, a kiang ah kipat Lot a um chuam nung in, LALPA chun Abram a hun ho ah, a kiang in, “Dâk inla, la umna kipat ah mallam, simlam, sualam leh tumlam en in:

¹⁵La muphâkna tiang tiang chu nang leh la suante’n kumtuang ah a lua ding un pia ding ka hi.

¹⁶La suante chu lei ah leivui jat ah tam in siam ing ka tin; kua’nle lei ah leivui hi a sim zaw thei chun la suante chule simsên hi mai in au.

¹⁷Tho inla, gam hi a dung a vai in chuan suak in, la kiang ah pia ding ka hi’ngal in,” a ti’n.

¹⁸Tichun, Abram in a puanbûk chu a chawn ah, Hebron ah um Mamre gangpi thingbul kiang ah chun a hung chêng ta’n; zia mun ah chun LALPA â dingin mâichâm a siam tai.