Read Vaiphei THILSIAM THU 14 Bible Online

THILSIAM THU 14 - Vaiphei bible

THILSIAM THU 14

¹Shinar khua lengpa Amraphel, Ellasar khua lengpa Ariok, Elam khua lengpa Khedorlaomar leh Goiim khua lengpa Tidalte dam lai ah chun,

²zia lengte hin Sodom khua lengpa Bera, Gomorrah khua lengpa Birsha, Admah khua lengpa Shinab, Zeboim khua lengpa Shemeber, leh Bela khua (Zoar le kiti sek) lengte hi a hung do un.

³Zia lengte chu Siddim phâiguam, (tu’ ah Chi Dil kiti’na mun) ah chun a pang khawm tau a.

⁴Kum sawm leh ni sung hial chu Khedorlaomar suak in a la um un; a kum sawm leh thumna’n a hung hel pan tau a.

⁵A kum sawm leh li’na chun Khedorlaomar tawh a kiang ah umte a hung un, Ashteroth-Karnaim khua um Rephaimte, Ham khua um Zuzimte, Shaveh-Kiriathaim ah um Emimte,

⁶Seir tâng gam leh El-Paran, gamkeu nai ah um tiang ah chêng Hor mite chule a hung that gam tau a.

⁷A kile’kit lam un En-mishpat (zia chu Kadesh ahi) a tung un; Amalekte gam zosia leh Hazazon-tamar khua chêng Amor mite zosia le a that malam pek un.

⁸Ziaphatchun, Sodom, Gomorrah, Admah, Zeboim leh Bela (zia khua chu Zoar le a kiti’n) khua lengte chu Siddim phâiguam ah chun,

⁹Elam khua lengpa Khedorlaomar, Goiim khua lengpa Tidal, Shinar khua lengpa Amraphel leh Ellasar khua lengpa Ariok, leng palite do dingin leng pangate chu a la pang tau a.

¹⁰Siddim phâiguam chu thauvomman chawdawna khûk in a dim ah; Sodom leh Gomorrah khua lengte ni chu a tai daw phat un, kawkhûkte ah chun a ke’lut tau ah; leng dangte chu tânggam ah chun a tai mang tau hi.

¹¹Tichun, a mêlmateu in Sodom tawh Gomorrah khuate chu a van nei zosiau tawh, a nêk leh a dawn zosiau chomnâm piak in a la kipuak mang zo tau a;

¹²Abram suapipa chapa Lot, Sodom khua chêng chule a nei zosia tawh a pui mang khawm un.

¹³Chun, a lak ua mi pakhat hung suakcha chun Hebrai mi Abram a hung hil a: Ama chu Amor mi, Mamre gangpi thingbul ah chêng ahi’n. Mamre chu a suapite Eshkol tawh, Aner tawh, Abram tawh pang khawm a hiu a.

¹⁴Abram in a chapa chu sal ah mat in a um tai ti a het phat in, a In sung ah piang leh kizil thiamsa ngen mi za thum sawm leh giat a pui ah, Dan tiang in a vadel tau a.

¹⁵Jan kâl ah chun a gâldo mite chu amau do dingin a hon hon in ama tawh a suakte chu a khenjak ah; tichun, amau chu a that un, Damaska khua mallam ah um Hobab tiang in a del tau a.

¹⁶Van zosia a hun la kit sik sek tau ah, a chapa Lot tawh, a van zosia chule a hun la kit tau ah, numeite leh midangte chule a hun pui kit sik sek tau hi.

¹⁷Chun, Khedorlaomar tawh pang khawm lengte zosia that zo ah a hung kile’kit lam ah chun, Sodom khua lengpa chun Shaveh phâijawl ah chun Abram a valamtua ta’n (zia phâijawl chu Leng Phâijawl ti ahi tai).

¹⁸Chuleh, Salem khua lengpa Melkisedek in vaithum tawh uain a hun chawi ah; ama chu El Elyon thiampu ahi.

¹⁹Ama chun Abram chu a maljawl ta’n, a kiang in: “Lei leh van siampa El Elyon in maljawl hen la;

²⁰chuleh, El Elyon chu pakchat in um ta hen, la gâlte la khut ah hun pepa chu,” a tia. Tichun, Abram in ama chu, gâllâk van zosia lak ah kipat in a sawm ah khat a pia tai.

²¹Sodom khua lengpa chun Abram kiang in, “Mihingte bep hi ei pia kit inla, gâllâk dang sia hi chang ta’n,” a ti’n.

²²Himaleh, Abram in Sodom khua lengpa kiang ah chun, “LALPA, El Elyon lei leh van siampa kiang in thutiam ka bawl ta’n;

²³patzang khat leh kengtawdap khauzang khat ziang le nang â taphot chu bangma la pua’ng ka; achutiloleh, ‘Abram hi ka siam hausat ahi,’ ti kha’n la;

²⁴tangvalte nêk zaw leh ka kitonpite chanvo ding tilo ngal bangma dang la pua’ng ka; Aner tawh Eshkol tawh Mamrete chun a chan ding chiat uh kilâk tau hen,” a ti tai.