Read Vaiphei THILSIAM THU 15 Bible Online

THILSIAM THU 15 - Vaiphei bible

THILSIAM THU 15

¹Zia nung chun, LALPA thu chu Abram kiang in a manglam gual in a hung tung ta’n; a kiang in, “Abram, lau kin, kei hi la phaw ka hi; la kipakman ding chu thupi tak hi’n ah,” a ti’n.

²Abram in, “Aw LALPA PATHIAN, bang ei pia ding la hi em? cha nei lo in ka um zing nalai ah, ka In sung golua ding chu Damaska khua Eliezer ahi ngal in?” a ti’n.

³Abram ma chun, “Ngai tia, chi him him lei suansak pua’n; ka In sung ah piang ahi phot leh ka suak hiziang leh le ka golua ding hi mai hen,” a ti tai.

⁴Ahi’n, LALPA’n a kiang in, “Zia pa chun la go hun lua pua’n tin, nangma laigil ah piang, la chapa ma ma chun la golua ding ahi,” a ti’n.

⁵Chuleh, In mai lam in a puidok ah, a kiang in, “Van lam khi en inla, aksite khi la sim thei leh sim in. La suante chu zia jat ah tam khin hung pung in au,” a ti’n.

⁶Ama’n LALPA chu a taksang ah, zia a taksanna ziak ah chun ama chu midik ah pom a hung hi tai.

⁷Chun, a kiang in, “Zia gam hi lua ding ah Kaldaite gam ah Ur khua kipat hun puidokpa LALPA kha keima hi ka hi,” a ti’n.

⁸Ama’n a dawnhu ah, “Aw LALPA PATHIAN, zia gam hi lua ding ka hi ti bangti’n he thei ding ka hem?” a ti’n.

⁹Ama chun a kiang in, “Bawnglâ kum thum ah upa pakhat tawh, kêlpi kum thum ah upa pakhat tawh, belamchal kum thum ah upa pakhat tawh, vakhu pakhat tawh, vapâl pakhat tawh ei hun lâk khawm piak in,” a ti’n.

¹⁰Zia zosia chu a hun lâk khawm piak ah, a lai tak in a phelsua chiat ah, a phel khat chu amau phel langkhat tawh kizawn chiat in a tiang ah; vachate ahileh a phelsua puai.

¹¹Sasial ne vachate chu saluang chung ah a vachuk phat uh leh Abram in a la naw mang sek a.

¹²Nisa tum ding kua’n in, Abram chu tui tak in a la i-mu ta’n; chuleh, thim huaisia tak leh lau um tak chun a hun khû ta’n.

¹³Ziaphatchun, LALPA chun Abram kiang in, “La suante chu amau gam hilo ah chun malzin in hung um intiu in, a nau hun sep piak in au, ti kichian tak in he ta’n: Chuleh, amau chun kum za li hun hi’genthei in au.

¹⁴Himaleh, a nau a sep piak uh namte chu keima’n hun vaihawm ing ka tin; ziazaw chuleh, nei leh lam tam tak tawh hung pawtdok in au.

¹⁵Nang vang thamuang tak in la suantute kiang in a la chia ta’n la tin; mi kumting tak ah thi’n, vui in um ta’n la:

¹⁶Amau chule a khang li’na phat leh zia lam ah hin hung kit intiu in: Amor mite gitlona hi a bukim nai deu lo ziakin,” a ti’n.

¹⁷Nisa a hung tum ah, khuale a thim phat chun, meihâlna bêl pakhat meikhu ah dim leh, meisel kuang tak chu sa kisât phelte kikâl ah chun a chia theng ta mai in.

¹⁸Zia ni ngei ah chun LALPA’n Abram kiang in thutiam a bawl ta’n: “Zia gam hi Aigupta luipi ah kipat Euphrates luipi tiang in,

¹⁹Kentte, Kenizte, Kadmonte,

²⁰Hitte, Perizte, Rephaimte,

²¹Amorte, Kanaante, Girgashte leh Jebus mite gam pumpi hi la suante kiang in ka hun pia tai,” a ti tai.