Read Vaiphei THILSIAM THU 16 Bible Online

THILSIAM THU 16 - Vaiphei bible

THILSIAM THU 16

¹Zia lai ah chun, Abram ji Sarai chun cha him him a nei puai. Ama’n Aigupta mi suaknu pakhat a nei in, a min chu Hagar ahi;

²chuleh, Sarai in Abram kiang in, “Ngaitia, LALPA’n cha la ei neisak ta pua’n; ka suaknu hi vapawl mai in, ama ah kipat hin chate ka nei khâk leh,” a ti’n. Abram in Sarai thu chu a mang ta’n.

³Abram ji Sarai in, Abram Kanaan gam ah kum sawm a um nung in, a suaknu Aigupta mi Hagar chu a pui in, a pawsal kiang in a ji dingin a pia tai.

⁴Chun, Hagar a pawl phat in nau a hun vop ta’n; nauvop ahi ti a kihet phat in a pi chu a hun musit ta mai a.

⁵Ziaphatchun, Sarai in Abram kiang in, “Ka thil thok hi nang in a mawpaw ta’n, ka suaknu chu la ângsia dingin ka hun pia ta hen, a gâi hi ti a kihet phat in keima ei musit tai,” a ti’n.

⁶Himaleh, Abram in Sarai kiang in, “Ngaitia, la suaknu chu la khut ah um ahi; nangma’n pha lasak gual gual in a chung in bawl mai ta’n la,” a ti’n. Ziaphatchun, Sarai in Hagar chu a hi’genthei ma ma ta’n; tichun, a tai mang tai.

⁷LALPA vansawlchâk pakhat in gamkeu ah Tuinâk kiang ah, Shur zotna lam lai ah chun a la lamtua a.

⁸A kiang in, “Sarai suaknu Hagar, khoi ah kipat hung la hem? Khoi tak ah chia ding la hem?” ti’n a hun dong a. Ama chun, “Ka pi, Sarai kiang ah kipat jam mang ka hi,” ti’n a dawnhu a.

⁹LALPA vansawlchâk in a kiang in, “La pi kiang in chia kit inla, a thu thu’n va um ta’n,” a ti’n.

¹⁰LALPA vansawlchâk ma chun a gen zawm jel ah: “La suante chu simsên lo khop in hi’pung ding ka hi,” a ti’n.

¹¹Chuleh, LALPA vansawlchâk ma chun a kiang in, “Ngaitia, nau la vop ta hen, chapa hun nei in la tin, a min in Ishmael la hun sak ding ahi: LALPA’n la genthei dan hi a hetpi tâk ziakin,

¹²ama chu mihing lakah gamsabiltung gual hi’ntin, ama chun mi tin do intin, mi tin in ama hun do in au; a suapite zosia huat in um zing in ah,” ti’n a gen tai.

¹³Tichun, a kiang ah thugen LALPA min ding ah chun, Elroi a sak ah: “Pathian chu ka mu tak tak ah, zia nung ah chunle hing leh dam ah um nalai ka hi maw!” a ti’n.

¹⁴Zia tuikul min ding ah chun Beer-lahai-roi a sak ta’n; zia chu Kadesh leh Bered khua kikâl ah um ahi.

¹⁵Chun, Hagar in Abram chu chapa a hinpiak ah; tichun, Hagar in chapa a hinpiak chu a min dingin Ishmael a sak ta’n.

¹⁶Hagar in Abram â ding ah Ishmael a hinpiak lai ah chun Abram chu kum sawmgiat leh guk mi ahi tai.