Read Vaiphei THILSIAM THU 18 Bible Online

THILSIAM THU 18 - Vaiphei bible

THILSIAM THU 18

¹Mamre gangpi thingbul ah chêng Abraham chu a puanbûk kotkhak bul ah nisa nuai ah a chut lai tak in, LALPA chu a kiang in a vakilâk ta’n.

²A vak khawdak ah a et leh, ngaitia, a mai jawn tak ah chun mi pathum ding zing hi a vak mu’n. Amau chu a mu phât in a lamtua dingin a puanbûk kotkhak bul ah pat chun a tai phei ah, leitual si’n bokkhup in chibai a bûk ta’n;

³“Ka LALPA, la doisaknau chang tâk ah lei ngai ua leh, la suak hi ei pal theng ziang kiu in;

⁴tui neukhat hun lau hen la, la keng uh sil unla, zia thingbul lîm ah hin chawldam tadiu in;

⁵la kisuk-hal deuna ding un, vaithum neucha hilehle vala’ng ka tin, ziazaw chuleh chia theng na’n lau: zia ding ziak ah chu la suak kiang ua hung hiding la hiu ah,” a ti’n. Amau inle, “La ti gual chun vabawl ta’n,” a tiu a.

⁶Chun, Abraham chu puanbûk sung ah Sarah kiang ah chun kin tak in a valût ah, a kiang in, “Changbuang te’na dim thum la’n la, mêk inla, nêk dingin hun siam kin in,” a ti’n.

⁷Chuleh, Abraham chu bawng hon lak lam ah vatai in, bawngno mâm pha tak pakhat a hun lâ, a suakpa kiang in a pia’n, kin tak in a hun siam vat vat a.

⁸Bawngnawi khalte, bawngnawite leh bawngno sa a siamte chu a chawi ah, a nêk ding un a valui piak ah; chuleh, a nêk zing lai un thingbul lîm ah chun a ding zing a.

⁹Amau chun a kiang in, “La ji Sarah khoi ah um a hem?” ti’n a dong un. Ama chun, “Puanbûk sung in a um hi,” ti’n a dawnhu a.

¹⁰A lak ua pakhat chun a kiang in, “Kum kit tu’hun hileh hung vetha kit tei ding ka hiu; chuleh, ngai in, la ji Sarah in ziaphat chuleh chapa nei ta’n a,” a ti’n. A nung ah puanbûk kotkhak ah chun Sarah in a thugen chu a la ngai zing a.

¹¹Tu’hin, Abraham tawh Sarah chu a têk ta ma mau ah; numei dan pangaile Sarah chung ah chun a bei ta’ngal a.

¹²Sarah chun, “Ka têk nung leh ka pawsal le a têksiat nung ah hin zia gual kipâkna chu ka nei na dia aw!” ti’n a lungthim in a nui tai.

¹³LALPA’n Abraham kiang in, “Sarah in, ‘Kei têksepi hin cha nei tak tak nalai ding ka hi dia aw,’ tia bang ding ah nuiza a hem?

¹⁴LALPA â dingin thil haksa talua a um ah a hem? Ka hun tiam a tun tak leh hung kit ing ka tiu in, Sarah hin chapa nei in a,” a ti piak ta’n.

¹⁵Sarah chu a lau ziakin, “Ka nui puai,” ti’n a kilep ah. Ama chun, “La nui ngei kha lam,” a tia.

¹⁶Ziaphatchun, mite chu a dingdok un, Sodom khua lam chu a en un; Abraham chun amau thadok dingin a zui pek a.

¹⁷LALPA chun, “Ka thilbawl guat hi Abraham kiang ah hin ka îm dia aw?

¹⁸Abraham hi chi lian tak leh hat tak hung hi ngei ding ahi ti leh, ama ziak ah khawvel chitin maljawl in hung um ding ahi ti ka mu chian ngal in;

¹⁹LALPA lampi a hawtheina ding un, a nung ah a chate leh a Inkuante, thil dik tak ah hiding leh, vaihawm gual ah um ding ah thu a piak theina dingin ama chu ka guat ta’ngal in; a chungchâng thu LALPA’n a gen chu Abraham chung ah a tunsak theina dingin,” a ti’n.

²⁰Ziaphatchun, LALPA’n, “Sodom leh Gomorrah lawtsiatna kiko thawmgi hi a ngai talua’n, amau gitlona la a huaisia ngal in,

²¹tu’hin, vachia suk ing ka tin, mipite kikona thawm ka kiang ah hung tung gual hi ahileh hilo vahechian ing ka,” a ti’n.

²²Zia kipat chun mite chu a kihei un, Sodom khua lam zuan in a chia tau ah; ahi’n, Abraham chu LALPA âng ah chun a ding zing a,

²³Abraham in a vak nai ah, a kiang in, “Midikte chu migilote tawh sumangthai khawm ziang ding la hem?

²⁴Khawpi sung ah midik sawmnga um ta leh amau ziak ah chun khua chu hawi diak lo ah sumangthai tho tho ding la hem?

²⁵Nang lawm lawm in zia gual ah chun midikte chu migilote gual ah bawl mai ding leh, midikte chu migilote lak ah a thi khawm mai ding uh chu phal sam ding la hem? Lei chung zosia ah vaihawmpa chun dik tak in bawl lo ding la hem?” ti’n a dong a.

²⁶Ahi’n, LALPA chun, “Sodom khawpi sung ah midik sawmnga ka mu chun amau ziakin khawpi pumpi chu hawi mai ing ka,” a tia.

²⁷Abraham in, “Ngaitia, kei meivâm leh leivui mai hin LALPA chu ka ho laklaw ta’ngal hen.

²⁸Midik chu sawmnga a tinna ding panga bang in a sam thei ah; panga’n a sap ziakin khawpi pumpi chu sumangthai ding la hem?” a ti’n. Chun, ama’n a kiang in, “Zia khawpi chun sawmli leh nga ka mu zaw chun sumangthai pua’ng ka,” a ti’n.

²⁹Chun, ama chun a ho kit ah, “Zia tak ah chun sawmli bep le la mu mai thei hi,” a ti kit ah. Chun, ama chun, “Sawmli ziak inle sumangthai lo mai ding ka hi,” a ti’n.

³⁰Ama chun, “Aw LALPA, la lungna ki’n la, gen nalai ing ka: ‘Zia tak ah chun sawmthum bep a um uh le a himaithei hi,’ a ti’n. Ama’n, a kiang in, ‘Zia tak ah chun sawmthum bep a um unle sumangthai pua’ng ka,’ ” a ti’n.

³¹Ama chun, “Ngai tia, LALPA chu ka ho laklaw ta’ngal in, zia tak ah chun sawmni beple la mu mai thei hi,” a ti’n. Chun, ama’n, “Sawmni te ziak inle himangthai pua’ng ka,” a ti’n.

³²Chun, ama’n, “Aw LALPA lungna ki’n la, khatvei bep hun gen nalai ing ka: ‘Zia tak ah chun mi sawmkhat bep la mu mai thei hi,’ ” a tia. Ama’n, “Sawmkhatte ziak inle hi’mangthai pua’ng ka,” a ti’n.

³³Tichun, LALPA chu Abraham tawh a kiho zaw phat un a chia ta’n: Abraham chule a umna lam in a chia kit tai.