Read Vaiphei THILSIAM THU 19 Bible Online

THILSIAM THU 19 - Vaiphei bible

THILSIAM THU 19

¹Vansawlchâk panite chu nitâk lam in Sodom khua a tung tau ah; Lot chu Sodom khawpi kul kotkhak ah chun a la kichu’n. Lot in amau chu a la mu in, a lamtua dingin a dingdok ah, leitual sî’ bokkhup in chibai a la bûk a.

²Chuleh, a kiang un, “Ka LALPA te, lungsiat tak in la suak In ah hin hung lût ta diu inla tu’jan giak un, la keng uh sil ta diu in; jing leh ma tak ah tho in, la chiana ding lam un chia na’n lau,” a ti’n. Himaleh, amau chun, “Himaijenlo e, khawlai ah giak zaw’ng kau,” a tiu a.

³Ahi’n, ama’n a jawl hâm hâm ah; tichun, a In ah chun a lut tau ah; a nêk ding uh a siam piak ah, thawipanglo vaithum a kang ah, a ne tau a.

⁴Himaleh, a i-mut mau in khawpi sung ah mi, Sodom mite ngei, vêng tin ah mi zosia, a têk a khang kidang lo in, a leng ua hung khawm in, In chu a hung ûm tau a;

⁵Lot chu a hun ko ua, “Tu’jan ah la kiang ah mi hung lûtte kha khoi lam ah a um tau em? Amau ka pawl theina ding un ei hun pedok in,” a tiu a.

⁶Lot chu a pawt ah, kot a nung khâk zaw phat ah chun a kiang un a vachia a;

⁷a kiang un, “Ka hun ni la hiu, unaute haw, chuti lawm lawm ah chun gilo kiu in;

⁸ngai un, pawsal pawl khâk nai lo chanu pani ka nei hi; amau hi hun pedok ing ka tin, la nop nop uh law mai un: ziate hivang bangma law kiu in, ka In hung bêl ahi ngal un,” ti’n a dawnhu a.

⁹Himaleh, amau chun, “Pawtdok in,” a ti bep uh le hilo in, “Zia mihingpa phiangsan hi zia tak ah hin a hung pêm lut in, tu’hin vaihawm ah pan a gaw nalai sêt in, tu’hin chu la zinte chung ah bawl sâng in nangma chung ah bawlsia zaw ding ka hiu,” a ti nalai sêt un. Tichun, Lot chu hun baw in, kotkhak hi’siat gua’n a hun nai tau a.

¹⁰Ahi’n, a zinte chun a khut uh a hun lâm un, Lot chu a kiang ua In sung ah chun a kai lut un, kot chu a khâk chak tau a.

¹¹Chuleh, kotkhak bul ah mite chu a têk a khang in a mit uh a hi’thûm piak un; tichun, kotkhak hawl in a kimai sau sau ziang tau hi.

¹²Mite chun Lot kiang in, “Zia khawpi’ hin chanau kinaipi, mâkpate, chapate, chanute leh a dang him himle la nei awm? Ziate zosia chu puidok sik sek in.

¹³Zia khawpi ah mite sualna thuak zo lo ah kiko thawm hi, LALPA ma-âng ah a tun nasat ma ma tâk ziakin; zia khawpi hi hi’mangthai dingin LALPA’n ei sawl uh ka hiu.

¹⁴Chutichun, Lot chu a va pawtdok ah, a chanute kichenpi ding a mâkpa hung hidingte kiang ah chun, ‘Tho unla, zia khawpi hi nusia un; LALPA’n zia khawpi hi hi’mangthai ding ahi ngal ah,’ ti’n a vagen a. Himaleh, ama chu a mâkpa hidingte ngai ah chun tawt thu gen gual bep ahi tai,” a tia.

¹⁵Ahi’n, phalvak ah chun vansawlchâkte chun, “Tho unla, la ji tawh zia tak ah um la chanute pani hi puidok in; chutilochun, zia khawpi gawtna hin hi’mangthai khawm in um kha’n lau,” ti’n Lot chu a tomnaw tau a.

¹⁶Himaleh, ama chu a muang ma ma ah; LALPA’n ama chu a hepi ma ma ziakin, mite chun ama leh a ji leh a chanu panite a khut ua man in, khawpi pawlam ah chun a kaidok tau a.

¹⁷Chutia, a kaidaw zaw phat ua chun, “La hinnau humbitna ding in taidok unla, nung lam en lo hial in, phâijang ah hin le la chawl him him lo ding uh ahi; tâng lam ah khin taidok un; chutilochun, mangthai kha’n lau,” a tiu a.

¹⁸Ziaphatchun, Lot in a kiang un, “Ka LALPAte, zia gual chu hi ki’hen;

¹⁹ngai un, tu’hin la suak in la hepinau ka mu ta’n, nang in la ja’ngaina chu la hi’lian ah, ka hinna humbitna ding ah ka chung ah la latsak ta’ngal in; tâng sâng lam ah son chu tai zo pua’ng ka, thil phalo in ei hun huam in thi ziang kha’ng ka.

²⁰Ngaitia, zia khua saw taina dingin a nai pen ah, khawneuchale ahi ngal in. Zia tak ah son ei tai lut sak zaw ta’n aw; tichun, ka hinna hi humbit in um ding ahi,” ti’n a don a.

²¹Chun, ama’n a kiang in, “Aw le, la thil dot chu ka hun phal piak hi, la gen gual in zia khua chu suksiat hipua’n a.

²²Kin-gang inla zia tak ah chun tai in; zia tak chu la tun masia bangma bawl theilo ding ka hi’ngal in,” a ti’n. Ziaziakchun, zia khawmin chu Zoar a sak tau a.

²³Lot Zoar khua a tun tawh kituak in nisa a hung suak tai.

²⁴LALPA chun Sodom leh Gomorrah khawpi chung ah chun, van ah LALPA kiang ah kipat in mei leh kât a hun zuksak ta’n;

²⁵zia khawpite chu tawh phâicham zosia le, khawpi sung ah mi zosia le, lei ah thilkek zosiate chule a hi’mangthai sik sek tai.

²⁶Himaleh, Lot nung lam ah a ji chu a la kinung hei ah, chi khuam a suak tai.

²⁷Chun, Abraham chu jingkal ma tak in, LALPA ma-âng ah a dinna mun ah khan a hang chia a;

²⁸Sodom leh Gomorrah lam leh phâicham gam zosia chu a vak thîl ah; chuleh, zia gam ah meikhu chu hâltuina meikhu gual in a kitung to vung vung ziang tai.

²⁹Chun, Pathian in phâicham khawpite a hi’mangthai lai ah khan, Pathian in Abraham chu a hezing in; tichun, Lot chênna khawpite a hi’mangthai lai ah chun Lot chu sukmanthaina lak ah pat in a hukdok tai.

³⁰Lot chu Zoar khua kipat in a chia to ah, Zoar khua chun a chên ngam lo ziakin tânggam ah chun a chanu panite chu tawh a vachêng tau a; tichun, a chanute chu tawh kawlhawm ah chun a chêng den tau a:

³¹Ahi’n, a upa zaw’nu chun, a naunu kiang in, “I pa hi a têk ta’n, khawvel dan gual ah ei pawl dingin, zia gam ah hin pawsal pakhat chale a um ta pua ngal a.

³²Hung in, I pa hi uain dawn khamsak hitin, suan mang lo ah I siam theina dingin luppi hi ti,” a ti ta.

³³Zia jan ah chun a pau chu uain a dawn khamsak tau ah; a upa zaw’nu chu lut in a pa kiang ah chun a valum ta’n; ama valup lam leh a thawdok kit lam chu a pa’n a he diak puai.

³⁴Chuleh, a jing ah chun, a u-nu chun a naunu kiang ah chun, “Ngaitia, tu’jan ah khan I pa kiang in ka valum in, tu’jan hinle uain dawn khamsak kit hi tin, nang chia inla, I pa suanbei lo ah I siam theina dingin a kiang in valum in,” a ti’n.

³⁵Zia jan ah chunle a pau chu uain a dawn khamsak kit tau ah; a naunu chu tho in, a pa kiang ah chun a valum ta’n: a pa chun a valup lam leh a thawdaw kit lam chule a he diak puai.

³⁶Zia gual chun Lot chanute chun a pau ah kipat in nau a hun vop gêl tau a.

³⁷A upa zaw’nu chun chapa a hun nei ah, a min in Moab a sak in; ziapa chu tu’lai ah Moab mite hun suanpa hi ahi.

³⁸A nau nu’nle chapa a hun nei in, a min in Ben-Ammi a sak ah; ziapa chu tu’lai ah Ammon mite hun suanpa hi ahi.