Read Vaiphei THILSIAM THU 2 Bible Online

THILSIAM THU 2 - Vaiphei bible

THILSIAM THU 2

¹Chutichun, lei leh van chu a sung ah um zosia chu tawh siam zaw ahi tai.

²Chuleh, Pathian in a ni sagi ni chun a thilsiam ding zosia a siam zaw tâk ziakin, ni sagi ni chun a thilsiam a haisan tai.

³Tichun, Pathian in a ni sagi ni chu maljawl in, a chang tai: Pathian in a thilsiam zosia a haisan ni chu a hithiangtho tai.

⁴Lei leh van a siam dan kha zia gual hi ahi: LALPA Pathian in lei leh van a siam lai ah khan,

⁵lei ah hampa lohing him him a um naipua’n; anchelohing him himle a kek nai pua’n, LALPA Pathian in lei chung ah gua a zuksak naipua’n, leilet dingin mihingle a um nai diak puai;

⁶Ahi’n la, lei ah kipat in sûm a hung jing ah, lei chung pumpi a hun chapno sek hi.

⁷LALPA Pathian in lei ah leivui in mihing a siam ah, a nâk hawmte ah chun hinna hu a tha’lût ah; mihiam chu mihing a hung suak tai.

⁸LALPA Pathian in sualam ah Eden Huan a bawl ah, a mihing siam chu zia tak ah chun a umsak ta’n.

⁹Chun, lei ah kipat in LALPA Pathian in thing mit hîp tak tak leh nek thei chitin a kesak in; hinna thingle huan lailung tak ah chun a kesak ah; a sia leh a pha hetna thingle zia tak ah chun a kesak hi.

¹⁰Eden ah kipat chun huan chapno dingin lui a luang ah, zia kipat chun lui chu kâ pali a kisua hi.

¹¹Zia luikâ khatna chu Pishon lui ahi’n, zia lui chu Havilah gam zosia kualkhum ah luang ahi’n; zia lui ah chun sana a um hi.

¹²Zia gam ah sana chu a hoi ma ma ah; zia tak ah chun bdelium leh onik suangmantamte le a um hi.

¹³Luikâ pani’na chu Gihon ahi’n; zia lui chun Kush gam zosia a luan kualkhum hi.

¹⁴Luikâ pathumna chu Tigris ahi; zia lui chu Assuria gam sua lam kâi ah luang ahi. Chun, luikâ pali’na chu Euphrates ahi.

¹⁵LALPA Pathian in a pawsal siam chu a pui ah, Eden huan kaitua ding leh vêng dingin a koi tai.

¹⁶LALPA Pathian in, pawsal kiang ah chun, “Huan ah thingga zosia la nop nop la nethei hi;

¹⁷Ahi’n la, a sia leh a pha hetna thingga pen hi la nêk ding ahi puai; la nek ni’ ni’n, thi ding la hi,” ti’n thu a pia.

¹⁸LALPA Pathian in, “Pawsal ama ngawn ah a um hi a pha puai: ama panpi dingin a kithuapi ding ah kilawm siam piak ing ka,” a ti’n.

¹⁹Tichun, LALPA Pathian in lei ah kipat in gamsa chitin leh chunglêng vacha chitin a siam ta’n; a min ding un bang sak ding ahi diam ti hetna dingin, Adam kiang ah chun a hun pui khawm chiat ah: thilhing zosia ama’n a min uh a la phuak zosia chu min in a nei den tau a.

²⁰Chutichun, Adam in gancha zosiate, chunglêng vachate leh gamsa zosia chu a min uh a sak chiat ta’n; himaleh, mihing â ding ah chun a panpi ding, a kithuapi ding ah kilawm a um him him puai.

²¹Chutichun, LALPA Pathian in pawsal chu tui tak in a i-mutsak ah, a i-mut kâl in a nâkgu lak ah pakhat a ladok ah, zia mun chu taksa phe in a huk dim ta’n;

²²LALPA Pathian in pawsal ah kipat a lakdaw nâkgu chu numei in a siam ah, pawsal kiang ah chun a hun pui tai.

²³Adam chun: “Zia zet hi chu ka gu ah kipat gu nei ah siam, ka taksa ah kipat taksa nei ah siam ahi; pawsal ah kipat lâkdaw ahiziak in, Numei ti ding ahi,” a ti’n.

²⁴Ziaziak ah hin, pawsal in a nu leh a pa nusia in, a ji lam ah bek intin; tichun, taksa pumkhat hung hita’n au.

²⁵Chuleh, pawsal tawh a ji chu ngawnchang gêl a hiu ah; himaleh, a zakcha diak puau hi.