Read Vaiphei THILSIAM THU 22 Bible Online

THILSIAM THU 22 - Vaiphei bible

THILSIAM THU 22

¹Zia nung ah chun, Pathian in Abraham chu a patep ta’n, a kiang in, “Abraham,” a ti’n. Ama’nle, “Zia hin ka um hi,” ti’n a dawnhu a.

²A kiang in, “La chapa, la chapa neisun Isak, la hepi ngawi ngawi kha pui inla, Moriah gam ah chia inla, zia tak ah tâng pakhat ka hun hilna ding mun ah chun hâlmang thillat in hun pia’n,” a ti’n.

³Abraham chu ma tak in a tho ah, a chuanna ding sabiltung siamtup in, a chapa Isak chu tawh a suakte tangval pani a pui ah, hâlmang thillatna ding thing a ek ah, a kipandok tau ah, Pathian in a hilna mun lam ah chun a chia tai.

⁴A ni thumni chun Abraham chu a vak dakdok ah, a mun chu a vak gâl mu tai.

⁵Tichun, Abraham in a suak tangvalte kiang ah chun, “Zia tak hin sabiltung hi tawh a la um unla, kei tawh naupang hi zia tak ah son vachia in, Pathian vaho ing ka tiu in, la kiang un hung kit pai ziang ding ka hiu,” a ti’n.

⁶Abraham chun hâlmang thillatna matchâk ding thing chu a la’n, a chapa Isak chu a putsak ah; ama chun mei tawh chemcha chawi in, a kiton pek tau a.

⁷Chuleh, Isak in a pa Abraham a hun ko ah, “He pa,” a ti’n. Ama’nle, “Ka chapa, zia hin ka um hi,” ti’n a dawnhu ah. Ziaphatchun, a chapa chun, “Ngaitia, mei leh thing bep a um in; hâlmang thillat ding belamno khoi ah um maw?” ti’n a hun dong a.

⁸Abraham chun, “Ka chapa, Pathian in Ama â ding ah hâlmang thillat ding chu hun ngaitua kawm na’n a,” a tia. Tichun, a kiton pek tau a.

⁹Chun, Pathian in a ti’na mun chu a vatung tau ah; zia tak ah chun Abraham in mâichâm a siam ah, thing chule a siakhawm ah. A chapa Isak chule a kântom ah, mâichâm thing chung ah chun a lupsak tai.

¹⁰Abraham in a chapa tha’na dingin chemcha chu a la’n, a khut a hun lâm a.

¹¹Himaleh, van ah kipat in LALPA vansawlchâk chun a hun ko ta’n: “Abraham, Abraham,” a hun ti’n. Ama’nle, “Zia hin ka um hi,” ti’n a dawnhu a.

¹²Ama’n, “Naupang chung ah khan la khut tha kin la, ama kha bangma law diak kin; la chapa neisun lei piak ding la îtchâk lo ziakin Pathian la lau hi ti tu’hin ka hechian tai,” a hun tia.

¹³Chuleh, Abraham chu a dakdok ah, a et leh, a nung lam ah chun belamchal pakhat, a kî thingbuk ah ki-awk a la um ah: Abraham in belam chu a vaman ah, zia chu a chapa thasâng ah hâlmang thillat dingin a mang tai.

¹⁴Abraham in zia tak mun chu Jehovah Jireh ti a sak ah; tu’ni tiang ah hin, “LALPA tâng ah chun piak in um nai tiu,” a ti sek gual uh hin.

¹⁵Chuleh, a niveina dingin LALPA vansawlchâk in van ah kipat in Abraham a hun ko a:

¹⁶“Zia thil hi la hi tâk ziak leh, la chapa neisunle itcha lo ah lei piak tâk ziakin, keima ka kitiam hi, LALPA’n a ti’n:

¹⁷Hun maljawl ngei ngei ing ka tin, van ah aksi jat leh tuisuagiat pâm ah piaunel jat in la suante hi’pung ing ka tin, la suante chun a mêlmateu kul kotkhak hun lak piak in au:

¹⁸Ka thu la zop ziak ah hin la suante ah kipat in khawvel chitin maljawlna piak hi’n au,” a ti’n.

¹⁹Tichun, Abraham chu a suak tangvalte kiang lam in a chia kit ah; a kipan un, Beer-sheba lam zuan in a chia pek tau ah; ahi’n, Abraham chu Beer-sheba mun ah chun a chêngden tai.

²⁰Zia nung ah chun, “Ngai tia, Milkah khanle la nau Nahor chu chate a nei piak ta ei vei!” ti Abraham a hil tau a.

²¹A cha masa pen chu Uz ahi’n, a nau Buz tawh Aram pa Kemuel tawh;

²²Chesed, Hazo, Pildash, Jidlaph leh Bethuelte a hiu a.

²³Bethuel in chanu Rebekah a nei a. Zia a cha pawsal pagiatte chu Milkah in Abraham naupa Nahor â ding ah a hin piakte chu a hiu a.

²⁴A thâikemnu Reumah inle Tebah, Gaham, Tahash leh Maakah te hi a hinpiak nalai hi.