Read Vaiphei THILSIAM THU 24 Bible Online

THILSIAM THU 24 - Vaiphei bible

THILSIAM THU 24

¹Tu’hin, Abraham chu a upa ta’n, têk lam a manaw ma ma ziang ta’n; chuleh, LALPA’n bangkim in Abraham chu vangphatna a pia ta’n.

²Abraham in a suak, a In sung ah umte lak ah upa pen, a nei zosia chung ah thuneipa kiang ah chun, “Lungsiat tak in la khut kha ka malpi nuai in hun koi in;

³tichun, LALPA van leh lei Pathian min chu sâl in, ka umna Kanaan mite nungak lak ah mi hi, ka chapa ji dingin la hun neisak lo ding ahi;

⁴Ahi’n, ka gam lam ah, ka chanaute kiang ah chia inla, zia kipat chun ka chapa Isak ji ding la vapui ding ahi, ti la kihaksial ding ahi,” a tia.

⁵A suakpa chun, “Numei chun zia gam ah hin ei hun zui nuam lo mai thei ah; la chapa hi la hung pawtdawna gam ah chun pui kit ziang ding ka hi diam?” ti’n a dong a.

⁶Abraham in a kiang in, “Ka chapa hi zia gam ah chun puikit lo dingin chingthei in.

⁷LALPA, van Pathian, ka pa In ah kipat leh ka pianna gam ah kipat ei puidokpa leh ei hopa, ‘Zia gam hi la suante kiang ah hun pia’ng ka,’ ti ah ka kiang ah thu tiampa khan, ama ngei in la ma lam in a vansawlchâk chu chiasak intin, zia tak ah kipat chun ka chapa hi ji la hun neisak ding ahi.

⁸Ahi’n, numei chun a hun zui nop lo leh ka kiang ah la kitiamna hin thiang mai in la: banghitaleh, ka chapa hi zia kipat hin la puikit lo him him ding ahi,” a ti’n.

⁹Chutichun, a suakpa chun a khut chu a pu Abraham malpi nuai ah chun a gawl ta’n: zia thu ah chun a kiang in a kitiam tai.

¹⁰Ziaphatchun, suakpa chun a pu sangawngsau sawmkhat pui in, a pu nei thilpha chitin chu keng in a kipandok ta’n; Mesopotamia gam ah Nahor khua chun a chia tai.

¹¹Chun, nitâk lam ah numeite tuikhai hun lai tak in, dai kiang ah tuikul kiang ah chun a sangawngsaute chu a cholsak a.

¹²“Aw LALPA, ka pu Abraham Pathian, lungsiat in tu’ni hin ei lawtinsak in, ka pu Abraham chung ah la hepina latsak in.

¹³Entia, tuikul kiang ah ka ding ah, khua sung ah mite chanute le tui khai dingin a hung uh hi.

¹⁴Nungak kua kiang ah le, ‘Lungsiat in ka dawn ding tui ei pia’n,’ ka ti ah, ‘Dawn inla, la sangawngsaute dawn dingle pia’ng ka,’ ti ah phal tak ah ei pia pên chu, zia ngei chu la suak Isak ji ding ah la guat mi chu hi hen. Zia ngei ah hin ka pu chung ah hepina la nei hi ti hia’ng ka,” a ti tai.

¹⁵Zia thu chu a gen zaw ma’n, Abraham nau Nahor ji Milkah chapa Bethuel chanu Rebekah chu tuibêl a liangko ah pu’n a hung pawtdok a.

¹⁶Zia nungak chu et ziang inle a mêlpha ma ma ah, nungak thiangtho, pawsal him him in a kivoppi nai lo ahi. Tuikhuk ah chun a kum suk ah, a tuibêl thâl dim in, a hung kal to kit a.

¹⁷Suakpa chu ama tuak dingin a tai ah, a kiang in, “Lungsiat in la tuibêl ah tui kha ei dawnsak tiam in,” ti’n a don a.

¹⁸Ama chun, “Dawn in he pu,” ti’n kin tak in a tuibêl chu a domtha, a dawnsak ta’n.

¹⁹Chutia, a dawnsak nung ah chun, “La sangawngsaute’nle a dawn khop masangsiau khai ziang ing ka,” a ti’n.

²⁰Kin tak in a tuibêl chu gancha kuang ah chun a tei ah, tui thâl dingin tuikhuk lam ah chun a tai kit ah, sangawngsaute dawn ding ah chun a khai kit tai.

²¹Suakpa chun, LALPA’n a zinna chu a lawtin leh lawtin lo hetna dingin ama chu thipbek in a la en zing hi.

²²Chun, sangawngsaute chun tui a dawn khop phat un, suakpa chun nâkbu shekel kimkhat bûk ding leh chaucha pani, shekel sawm ah gik a hun ladok a;

²³chuleh, a kiang in, “Kua chanu la hi em lungsiat in ei gen tiam in, la pa In ah tu’jan giakna ding mun a um thei diam?” ti’n a dong a.

²⁴Ama’n a kiang in, “Nahor â ding ah Milkah in a hinpiak, Bethuel chanu ka hi,” a tia.

²⁵Zia ban ah chun, “Bupawl le gancha an ding ka hau un, giakna ding le ka nei ui,” a ti nalai a.

²⁶Suakpa chu a kûn ah, LALPA chu chibai a bûk ta’n;

²⁷“Ka pu chung ah hepina leh dikna haisan diak lo LALPA, ka pu Abraham Pathian chu pâk in um ta hen. Kei hile LALPA chun ka pu suapite In lam in ei pui ahi hilam,” a ti tai.

²⁸Ahi’n, nungak chu a tai ah, zia thu chu a nu chanaute a vahil tai.

²⁹Rebekah chun suapi pawsal pakhat a nei in, a min chu Laban ahi; Laban chun tuikhuk lam ah mi chu a del ziang ta’n.

³⁰Nâkbu leh chaucha a suapinu bute chu a mu in, “Zia pa chun hitia hin thu a gen hi,” ti thu a suapinu Rebekah ah kipat a het phat ah chun, zia mipa kiang lam ah chun a chia tai. Chuleh, ama chu tuikhuk pâm ah sangawngsaute lak ah chun a la ding zing hi.

³¹Laban in, “Nang, LALPA maljawlna dongpa, hung inla, ka In ah hung lut in: bang ding ah pawlam ah ding zing la hem? In leh munle sangawngsaute giakna dingin ka siamtup zo ta vei!” a hung ti’n.

³²Tichun, mipa chu In sung ah chun a lut ah, Laban in sangawngsaute van a thap piak ah; sangawngsaute â dingin bupawl leh gan an a pia’n, ama keng leh a lawite keng silna dingin tui le a pia tai.

³³Chun, Abraham suakpa ma-âng ah nêk ding a lui piak ah; himaleh, ama chun, “Ka hungna thu ka gen masang sia bangma ne pua’ng ka,” a tin. Ziaphatchun, “A leh, gen ta’n la,” a tiu a.

³⁴Chutichun, a hun gen pan ta’n: “Keima hi Abraham suakpa ka hi:

³⁵LALPA’n ka pu chu nasa tak in vangphatna a pia hen, mi lopi tak a hung hi tai: LALPA chun a kiang in belam honte, bawng honte, dangkate, sanate, suak numeite, suak pawsalte, sangawngsaute, sabiltungte le a pia’n.

³⁶Ka pu ji Sarah chun a têk nung in ka pu â dingin chapa pakhat a nei ah; ama kiang ah chun a nei zosia a pe sik sek tai.

³⁷Ahi’n, ka pu chun, ‘Ka umna gam ah Kanaan mite nungak lak ah mi ka chapa ji ding ah la pui piak lo ding ahi;

³⁸ka pa In lam ah ka chanaute lak ah chia inla, ka chapa ji ding la va hawl ding ahi,’ ti’n ei kitiamsak a.

³⁹Ka pu kiang ah chun, ‘Numei chun ei zui nuam talo bang leh lah?’ ka ti’n.

⁴⁰Ama chun, LALPA, a ma-âng ah ka dinsekna pa chun a vansawlchâk chu la kiang ah hun sawl intin, la chiana ding ah chun hun lawtinsak in a: Ahi’n, ka chapa â dingin ka chanaute leh ka pa chanaute lak ah mi chu ji la neisak ding ahi:

⁴¹Ka chanaute kiang ngei la tun phat leh ka kiang ah la kitiamna hin thiang ta’n la: Nungak chu a piak nop lo ua lehle ka kiang ah la kitiamna hin thiang ta’n la,” ei ti ahi.

⁴²Tu’ni hin tuikhuk kiang ka hung tung ah, “Aw LALPA, ka pu Abraham Pathian, ka chiana hin lei lawtinsak ding leh en tia,

⁴³tuikhuk kiang ah hin ka ding hi! Nungak tuikhai ding ah hung suk kua kiang ah le, Lungsiat tak in ka dawn dingin la tuibêl ah tui kha ei pia’n,” ka ti ah;

⁴⁴“Dawn inla, la sangawngsaute â dingle khai piak ing ka,” ti tapo chu, zia mi ngei chu ka pu chapa ji ding ah LALPA’n numei ei guat piak chu hihen, ka ti’n.

⁴⁵Chutia, ka lungthim ah ka gen zaw ma chun, Rebekah hi a tuibêl pu’n a hung suk ah; tuikhuk ah chun a chia suk ah; tui a hun pua’n: “Lungsiat in la tui kha ei dawnsak tiam in,” ka ti’n.

⁴⁶Ama hin a liangko ah tuibêl chu kin-gang tak in a hun domtha’n: “Dawn inla, la sangawngsaute dawn dingle hun pia’ng ka,” a ti’n.

⁴⁷Ziaphatchun, “Kua chanu la hem?” ti’n ka dong ah; ama’nle, “Nahor chapa Bethuel chanu Milkah in a hinpiak ka hi,” ti’n ei dawnhu a. Tichun, a nâk ah nâkbu ding leh a khut ah chaucha dingte hi ka bûsak ta ahi.

⁴⁸Chuleh, ka lu kûn in LALPA chu chibai ka bûk ta’n; LALPA, ka pu Abraham Pathian, ka pu unaupa chanu, a chapa ji ah neisak ding ah lampi dik ah ei puipa chu ka chawihoi ta ahi.

⁴⁹Tu’hin, ka pu chung ah ti tak tak ah hepina la nei ua, dik tak ah la bawl ding uh leh ei hil un; la hilo ding uh leh le ei hil ziang un: Changlam a hem, veilam a hem ah ka kihei theina ding in, a ti tai.

⁵⁰Ziaphatchun, Laban leh Bethuel in a dawnhu tau a: “Zia thil hi LALPA kiang ah kipat hung pawt ahi. La kiang in a sia hi’n a pha hileh bangma genthei ka nei puau hi.

⁵¹Entia, Rebekah chu la ma’n a um hilam, pui inla, chia tau in: LALPA’n a ti gual ah chun la pu chapa ji ding in um ta hen,” a tiu a.

⁵²Abraham suakpa’n zia thute chu a het phat in, a mai ah lei si’n, LALPA chibai a bûk tai.

⁵³Chuleh, suakpa chun dangka leh sana kicheinate, puante a hun ladok ah, Rebekah a pia ngal ah; a suapipa leh a nu kiang inle kicheina manpha tak takte chu a pia’n.

⁵⁴Tichun, ama leh a kitonpite chun nêk leh dawn dingte chu ne leh dawn zo in a giak tau a. Jingkal ah a hung thawdok phat un, “Ka pu kiang lam ah ei chiasak tau in,” a ti’n.

⁵⁵A suapipa leh a nu chun, “Bawinu chu ka kiang un chomcha, ni sawm vêl um tadi hen la, ziazaw chuleh chia bep hen,” a tiu a.

⁵⁶Himaleh, ama’n, “Ei hi’vaigei kiu in, LALPA’n ka chiana hin ei lawtinsak ta’ngal in: ka pu kiang lam ka tun vak theina ding un ei chiasak mai un,” ti’n a dawnhu a.

⁵⁷Amau chun, “Bawinu chu ko ing ka tiu in, ama ngei dong ing kau,” a tiu a.

⁵⁸Rebekah chu a ko tau ah, “Ziapa hi la zui nuam em?” ti’n a dong tau a. Ama chun, “Ka zui nuam hi,” a ti’n.

⁵⁹Chutichun, a suapinuu Rebekah chu ama donnu tawh, Abraham suakpa tawh, a lawite chu a zuisak tau a.

⁶⁰Rebekah chu maljawlna a piau ah, a kiang in: “Ka suapinuu nang chu, sâng tam tak mun sangsawmte nu hung hi’n la: la suante chun a mêlmateu kul kotkhak lua pek tau hen,” a tiu a.

⁶¹Ziazaw chun, Rebekah chu a suaknu tawh a sangawngsau chung in a chuang ua, mipa chu a zui tau a: Tichun, suakpa chun Rebekah chu pui in, a chia tai.

⁶²Tu’hin, Isak chu Beer-lahai-roi lam ah kipat in a hung ah, Negeb gam ah um ahiziak in;

⁶³nitâk lam ah chun Isak lou lam ah hunthip mang dingin a hung pawtdok ah; a hung dakdaw leh, sangawngsaute’n ama a hun zuan ua.

⁶⁴Rebekah chule a hang dakdok ah, Isak a vak mu phât in sangawngsau chung ah kipat in a kum a;

⁶⁵suakpa kiang ah chun, “Loulai ah ei dawn ding ah hung saw kua a hem?” a tia. Suakpa chun, “Ka pu ahi saw lam,” a tia. Ziaphatchun, maikhûna puan a la’n, a kikhu khum tai.

⁶⁶Suakpa chun a thil hi dan zosia chu Isak a hil a.

⁶⁷Isak in Rebekah chu a nu Sarah puan In ah chun a pui lût ah; tichun, a kichenpi ta’n; a hepi ma ma ah. Tichun, a nu thi’nung ah chunle Isak chu a hung thamuang thei tai.