Read Vaiphei THILSIAM THU 26 Bible Online

THILSIAM THU 26 - Vaiphei bible

THILSIAM THU 26

¹Tu’hin, zia gam ah chun, Abraham dam lai ah kial tung tilo kha a tung kit a. Isak chu Philistinte lengpa Abimelekh kiang ah Gerar khua chun a vachia a;

²LALPA a kiang in a hung kilâk ah, “Aigupta gam ah chia kin; ka hun kawkmu ding gam ah chun chêng zing in:

³Zia gam ah hin um tadi inla, la kiang in um ing ka tin, hun maljawl ing ka tin; zia gam zosia hi nangma leh la suante kiang ah hun pia’n, la pa Abraham kiang ah ka tiam kha hi’det ding ka hi:

⁴Van ah aksi jat in la suante hi’pung ing ka tin, zia gam zosia hi la suante kiang in hun pia’ng ka; la suan ah chun khawvel nam tinte hung navak intiu in;

⁵Abraham chun ka thu a awi ah, ka thuhilte, ka thupiakte, ka thuguatte leh ka dante tiang in a zop ziak ah khan,” a tia.

⁶Tichun, Isak in Gerar khua chun um mun a khual den tai;

⁷zia khua mite chun a ji chung châng a dong tau a: Ama’n, “Ka suapi ahi,” a ti’n; a mêl a phat ziakin zia khua mite hin Rebekah ziak hin ei that kha’n au, ti’n, “Ka ji ahi,” a ti ngam lo ahi.

⁸Zia tak ah chun sawt tak a um nung in, Philistinte lengpa Abimelekh chun a tukvan ah kipat in a vak en ah; Isak in a ji Rebekah a sai lai tak a vak mu ta’n.

⁹Abimelekh in Isak chu a ko ah, “La ji ngei ahina hilam: bang ding ah, ‘Ka suapinu ahi,’ la ti a hem?” a ti’n. Isak chun, “Ama ziakin thi kha’ng ka ti ka lau ah ahi,” ti’n a dawnhu a.

¹⁰Abimelekh chun, “Ka chung ah la thil bawl hi bangtidan a hem? Mite lak ah kua a hem khat in a la luppi kha thei ei ve, ka chung ua hin thil phalo hun tunsak thei ding la hi,” a ti’n.

¹¹Abimelekh chun, “Kuale zia pa hi a hem, a ji a hem khoi tapo chu thalup ngêi ding ahi,” ti’n mi zosia thu a pia tai.

¹²Isak in zia gam chun thâi a chîng in, zia kum ah chun ale’ zakhat a mu’n: LALPA’n a maljawl ngal a.

¹³Tichun, ama chu a hung hausa ten ta’n, nasa tak ah mi lopi hung hi hial khop in a hung hausa deu deu ta’n;

¹⁴belam honte, bawng honte a nei in, Inkuanle tam tak a nei in; Philistinte chun a mitthîp hial ziang tau a.

¹⁵(Zia hun ah chun, a pa Abraham dam lai ah, a pa suakte’n tuikul a la chawsau zosia chu Philistinte chun a la huk dim kit zo tau ah, lei a la sung dim ta mai un.)

¹⁶Abimelekh chun, Isak kiang in, “Ka kiang ua kipat chia mang ta’n, keihaw sâng in la lopi zaw ta’ngal ah,” a ti tau a.

¹⁷Isak chu zia’ kipat chun a pawt ah, Gerar phâijawl ah chun a puan In a jak ah, um mun a khual tai.

¹⁸Isak chun, a pa Abraham dam lai ah tuikul a chawsate zosia chu a cho kit ah; Abraham thi’nung ah khan Philistinte chun a la huk bing kit man tau a: A pa’n a min a sak gual ma khan a min a sak kit chiat tai.

¹⁹Chun, Isak suakte chun phâijawl chu a cho un, zia tak ah chun Tuinâk a mu tau a.

²⁰Chun, Gerar khua ganchingte chun, “Tui hi kei uh â ahi,” ti’n Isak ganchingte chu tawh a kinial tau a: Chutia, ama tawh a kinial ziak ua chun tuikul min chu Esek a sak tai.

²¹Tuikul dang a cho kit un, zia chule kichu’pi gua in a kinialpi kit tau a: A min dingin Sitnah a sak kit tai.

²²Chun, zia kipat chun a kichawn ah, tuikul dang a cho kit ah; zia chu vang a kichu’pi ta puau a: “Tu’hin chu LALPA’n mun awngthawl tak ei siam piak ta’n, zia gam ah hin suan tam tak hing tai tiu,” ti’n, a min dingin Rehoboth a sak tai.

²³Zia kipat chun Beer-sheba lam in a chia to tai.

²⁴Zia jan ah chun LALPA a kiang in a hung kilâk ah, “Kei, la pa Abraham Pathian chu ka hi: Lau kin, la kiang in ka um zing hi, hun maljawl ing ka tin, ka suak Abraham ziakin la suante chu hi’pung ding ka hi,” a ti’n.

²⁵Zia tak ah chun mâichâm a siam in, LALPA min chu a lam ah, zia tak ah chun puan In a jak tai. Isak suakte chun zia tak ah chun tuikul a cho kit tau a.

²⁶Chun, Gerar khua kipat chun Abimelekh chu a gualpa Ahuzzath tawh, a sepai lamkai Phikol tawh a kiang in a hung un.

²⁷Isak chun a kiang un, “Lei mudau ah lei sawl mang un, bang ziak ah ka kiang ah hung la hiu em?” ti’n a la dong ta’n.

²⁸Amau chun, “LALPA la kiang in a um hi ti kichian tak in ka muu ah; ziaziakchun, nang tawh kei uh kikâl ah thuthung siam ah, kitiamna bawl leu hin ti ah hung ka hiu;

²⁹kei un ka hun khoi siat lo gual ua leh thilpha bep lo ngal la chung ah bawl lo ah, thamuang tak ah ka hun chiasak gual un, kei uh le ka siatna ding him him uh la hilona dingin; tu’hin, nang chu LALPA maljawlna dongpa la hita ngal in,” a tiu a.

³⁰Tichun, ama chun luaithe’na a siam piak ah, ne leh dawn khawm in a um tau a.

³¹Jingkal ma tak in a tho ah, a kitiam gêl tau ah; Isak chun amau chu a chiasak ta’n, a kiang ah kipat in thamuang tak in a chia tau hi.

³²Zia ni chun Isak suakte a hung un, a tuikul chanchin uh a hung gen ua, a kiang in, “Tui ka mu tau hi,” a tiu a.

³³Chun, zia tuikul min ah chun, Shibah a sak in; ziaziakchun, zia khawmin chu tu’tiang ah hin Beer-sheba a hi den tai.

³⁴Chun, Esau chu kum sawmli mi ahi in, Hit mi Beeri chanu Judith tawh, Hit mi Elon chanu Bashemath chu ji’n a nei a;

³⁵ziate chu Isak leh Rebekah lungthim hi’genthei pên te chu a hitau hi.