Read Vaiphei THILSIAM THU 27 Bible Online

THILSIAM THU 27 - Vaiphei bible

THILSIAM THU 27

¹Chun, Isak chu a hung têk ta’n, khua muthei lo khop ah a mit a hung thim phat chun, a chapa upa zaw Esau chu a ko ah, a kiang in, “Ka chapa,” a tia; ama chun, “Zia’ hin ka um hi,” ti’n a dawnhu a.

²Ama’n a kiang in, “Ngaitia, têksia ka hita’n, ka thina ding ni la het a hipua’n;

³tu’hin, la van matchâk, la thal bawm leh la thalchangte chawi in, gamvâk in vachia inla, sakhi ei va puak piak in;

⁴ka thi masang hin maljawlna ka hun piak theina dingin, ka duthusam gual tak in me ei bawl piak inla, ka nêk dingin ka kiang hin hun chawi in,” a tia.

⁵Chun, Isak in a chapa Esau a kihopi lai tak chu Rebekah in a la ngaitha zing ah. Esau chu sakhi vakâp ah hun paw dingin gam a vavâk ta’n.

⁶Rebekah chun a chapa Jakob kiang in, “Ngaitia, la pa’n la u Esau kiang ah:

⁷‘Sakhi sa ei hun puak inla, ne’ng ka tin, ka thi masang hin LALPA ma-âng ah maljawlna ka hun piak theina dingin, me tui tak ei siam piak in,’ a ti ka hiai.

⁸Chutichun, ka chapa, tu’hin ka thupiak gual in ka thu jawm in.

⁹Ganhon lak ah chia inla, kelno pani pha tak ei valâk piak in; la pa nêk ding in me tui tak, a duthusam gual tak in bawl piak ing ka.

¹⁰A thi masang hin a hun maljawl theina dingin, a nêk dingin la pa kiang ah la vachoi ding ahi,” ti’n a hil a.

¹¹Jakob chun a nu Rebekah kiang in, “Ngai tia, ka u Esau chu mi mul hau tak ahi’n, kei la mi nâm tak ka hi’n;

¹²ka pa chun ei la themvêl kha mai leh ama thêm hi bep ing ka tin, maljawlna piak malak sâng in, hânsia dong hi kha’ng ka,” a tia.

¹³A nu chun a kiang in, “Ka chapa, la hânsia law chan ding chu ka chung ah um ta hen, ka thu mang ziang inla, ei valâk piak mai in,” a ti’n.

¹⁴Tichun, a chia ah, a vala ta’n, a nu kiang in a hun chawi ah; a nu chun a pa me du gual tak, tui tak in a bawl piak tai.

¹⁵Chun, Rebekah chun a chapa upa zaw Esau puansil phapen a kiang ah um chu a la’n, a chapa naupang zaw Jakob chu a thuam ta’n:

¹⁶Chuleh, kelno vunte chun a khut leh a ngawng mâmnate chu a tuam piak a:

¹⁷Chutichun, me tui tak leh vaithum a siam chu a chapa Jakob kiang in a pia tai.

¹⁸Chun, ama chu a pa kiang in a chia ta’n, “He pa,” a ti’n. Ama chun, “Zia hin ka um hi, ka chapa kua zawk la hem?” a ti’n.

¹⁹Jakob chun, a pa kiang in, “La chapa upa zaw Esau ka hi; lei sawl gual ah khan ka hi zo tai: lungsiat in tho inla, maljawlna lei piak theina dingin chû’n la, ka sakhi sa hi ne ta’n,” a tia.

²⁰Ahi’n, Isak chun a chapa kiang in, “Ka chapa bangtidan a hem, la va mu kin-gang na e?” a ti’n. Ama chun, “LALPA la Pathian in ei lawtinsak ziakin ahi,” a ti’n.

²¹Isak chun, Jakob kiang in, “Ka chapa, lungsiat tak in ei hun nai tiam in, hun themvêl tiam ka, ka chapa Esau la hi tak tak na em,” a ti’n.

²²Jakob chun a pa Isak chu a vak nai ah; ama chun a la themvêl ah, “A aw chu la Jakob aw ahi ngal in, a khutte la Esau khut ahi ngal in,” a ti’n.

²³Chutia, a u Esau khut gual ah a khut a mul ziak ah chun a hethei ta pua: tichun, maljawlna chu a pia tai.

²⁴“Ka chapa Esau ngei la hinai maw?” a ti’n. Ama chun, “Hi e,” a ti’n.

²⁵Ama chun, “Ei hun koi nai piak in, maljawlna ka hun piak theina dingin ka chapa sakhi sa chu ne’ng ka,” a ti’n. Chun, a hun koi nai ah, a ne ta’n, uain le a la, a dawn tai.

²⁶Chun, a pa Isak chun, a kiang in, “Ka chapa, ei hun nai inla, ei chawp in,” a ti’n.

²⁷Chun, a vanai ah, a chawp ah: chun, ama chun a puan gim chu a hia’n, maljawlna chu a pia ta’n: “Entia, ka chapa gim hi, LALPA maljawl gam gim gual chu ahi:

²⁸Pathian in van dâichîm leh, lei phatna leh bu tam tak hun pia ta hen:

²⁹Nam chuam chuamte’n la na sêm uh hen la, chi chuam chuamte’n chibai hun bûk tau hen: la suapite chung ah leng in um inla; la nu chate’n chibai hun bûk tau hen: Hânsia hun law tapo chu, hânsialaw khum in um uh hen la, maljawlna hun pe tapo chu, maljawlna piak in um tau hen,” a ti tai.

³⁰Chun, Isak in Jakob maljawlna a piak zaw phat ah chun, Jakob chu a pa kiang ah kipat pawtdok man ham ham in, a u Esau chule a gam vakna kipat in a hung tung ngal a.

³¹Ama chunle me tui tak a bawl in, a pa kiang in, “He pa, tho inla la chapa la maljawlna dingin, a sa huansa hi ne ta’n,” a hun ti’n.

³²Chun, a pa Isak chun, “Kua la hem?” a ti’n. Ama chun, “La chapa, la chapa upa zaw Esau ka hi,” a ti’n.

³³Isak chu nasa tak in a kithing ta’n, “Sakhi sa ka kiang ah hun chawi ah, la hung tun ma’n ka nêk zaw ah, ka la maljawl tâk kha kua a hita dia aw! ahi’n, ama chu maljawl in um ta tho tho in a,” a ti’n.

³⁴Esau in a pa thugen chu a het phat in, thasia tak in a kap chuai chuai ah; a pa kiang in, “Aw he pa, kei, keima ngei hile ei maljawl ham ham ta’n la” a tia.

³⁵Ama chun, “La nau in ei hung thêm ah, la maljawlna ding chu a la lâkpiak ta ahi,” a ti’n.

³⁶Ama chun, “A min Jakob a la sak uh hi a la sa dik ten uh hilo a hem? Nivei hial ei lân ta hen: ka cha upa hi’na ei lâkpiak a; tu’hin, ka maljawlna chan ding lai ei lâkpiak kit tâk hi,” a ti tai.

³⁷Isak in Esau kiang in, “Ngaitia, ama chu la lal dingin ka siam tai; a suapite zosia le ama suak dingin ka la pia tai: bu leh uain in ka vâk ta hen, ka chapa nang â dingin bang ka hun bawl piak ta dia aw!” a ti’n.

³⁸Esau chun a pa kiang in, “He pa, maljawlna pakhat bep a hem la nei? Aw he pa, keile ei maljawl ham ham ta’n la,” a ti’n.

³⁹Tichun, Esau chu ngai tak in a kap ta’n. A pa Isak chun a dawnhu a: “Ngaitia, la umna ding chu lei phatlona gam, chung lam van daichîm kiaklona mun hi ding ahi.

⁴⁰La hinna ding chu la chemjam hi’ntin; la suapi na sep piak in la tin; chun, zia gual hi hi’ntin: la thok zaw lo phat leh, a ngawngkol chu la ngawng ah kipat in, khen bong ta’n la,” a ti tai.

⁴¹Chutia, a pa’n a maljawl ziak ah chun Esau in Jakob chu a muda ma ma ta’n: ahi’n, Esau in a lungthim in, “Ka pa sûnna ding ni la a nai ta’n, zia phat chuleh ka nau Jakob chu that mai ing ka,” a ti’n.

⁴²A chapa upa zaw Esau thugen chu a nu Rebekah kiang in a la gensawn tau ah; tichun, mi sawl in, a chapa neuzaw Jakob chu a ko ah, a kiang in, “Ngaitia, la u Esau in nangma hun tha gua’n a kithamuan hi.

⁴³Ka chapa, ka thumang inla, kipan inla, Haran khua ka suapipa Laban kiang lam in tai mang in;

⁴⁴la chung ah la u lungnatna a dai masia, zia tak ah chun ni bang jat a hem vaum phot mai in.

⁴⁵La u lungnatna hi la chung ah a bei ah, a hetmil phat leh mi hun sawl ing ka tin, hung pui dawsak na’ng ka. Bang ziakin em la paniu ah ni khat thu ah ka hun chân khawm mai ding?” a ti’n.

⁴⁶Chun, Rebekah chun, Isak kiang in, “Hit numeite ziakin, hin hih ka chim ta luai: Jakob in zia gam nungak, zia tawhbang Hit chanute haw lak ah mi hi ji’n a hun nei kit nâk lai vang chun chu, kei â dingin hin hi bang phachuam ding a hem?” a tia.