Read Vaiphei THILSIAM THU 28 Bible Online

THILSIAM THU 28 - Vaiphei bible

THILSIAM THU 28

¹Chun, Isak in Jakob a ko ah, a maljawl ah, thule a pia’n; a kiang in, “Kanaan gam ah nungakte lak ah mi ji’n la neilo ding ahi.

²Kipan inla, Paddan-aram gam ah la nu pa Bethuel In ah chia inla, la nu suapipa Laban chanute lak ah mi ji’n vanei in;

³El Shaddai chun maljawl in, nam chêngkhawmte pu la hung hitheina ding in, chi tam tak suansak in hun hi’pung ta hen.

⁴La malzinna gam, Pathian in Abraham kiang ah a piak hi la lua theina dingin, nang leh la suante le Abraham maljawlna chu donsak ta hen,” a ti’n.

⁵Tichun, Isak in Jakob chu a sawl mang ta’n: Paddan-aram gam ah Jakob leh Esau nu Rebekah suapipa Aram mi Bethuel chapa Laban kiang ah chun a chia tai.

⁶Esau chun, Isak in Jakob maljawl in ji nei ding ah Paddan-aram gam lam in a sawl mang tai ti leh, mal a jawl lai ah khan, “Kanaan gam nungakte ji la neilo ding ahi,” a ti leh,

⁷Jakob in a nu leh a pa thu awi in Paddan-aram gam lam in a chia tai, ti a hun he ta’n.

⁸Tichun, Esau in Kanaan gam nungakte a nei chu a pa a lungdam puai ti a he ta’n:

⁹Esau chu Ishmael kiang in a vachia ah, Abraham chapa Ishmael chanu Mahalath, Nebaioth suapinu chu ji dingin a vanei belap tai.

¹⁰Chun, Jakob chu Beer-sheba ah kipat in a pawtdok ah, Haran lam a zuan ta’n.

¹¹Mun khat a hung tung ah, ni a tum tâk ziakin a giak ta’n. Zia mun ah suang pakhat chu la’n, khapchâk in a mang ta’n; a ipmu dingin a lum tai.

¹²Mang a hun nei ah: Lei leh van kikâl ah hin leilawn a hung kidaw ah; chuleh, zia chun Pathian vansawlchâkte a suk a to in a lawn ui.

¹³Chuleh, a kiang in LALPA a hung ding ah: “Kei hi LALPA, la pu Abraham Pathian, Isak Pathian chu ka hi: la lupna lei kha nangma leh la suante kiang in hun pia’ng ka;

¹⁴la suante chu leivui jat hung hi’n au; thanglam, saklam, mallam leh simlam ah kijak intiu in, nangma leh la suante ah chun lei ah nam tin maljawl in hung um in au.

¹⁵La kiang ah um zing ing ka tin, la chiana tapo ah hun vêng zing ing ka tin, la kiang ah ka thugen hi ka bawl masang sia hun nusia lo ding ka hi,” a ti’n.

¹⁶Chun, Jakob ipmu chu a hung khanglo ah, “Zia mun ah hin LALPA chu a um ngei hi ti, ka la he pua ahi!” a ti’n.

¹⁷Tichun, a lau ta’n, “Zia mun hi a lau um na e! Zia hi mun dang ahi puai, Pathian In a la hi hilam, zia hi van kotkhak chu ahi,” a ti tai.

¹⁸Chun, Jakob chu jingkal ma tak in a tho ah, a suang khapchâk chu a la’n, suang chu a phu ah, sathau a sunkhum a.

¹⁹Chuleh, zia mun min chu Bethel a sak ah, a lim in zia khawmin chu Luz ahi.

²⁰Jakob in, “Pathian ka kiang in a um ah, zia ka chiana lampi hi ei vên ah, nêk ding vaithum leh sil ding puansil LALPA’n ei piak ahi chun,

²¹ka pa In lam ah lungmuang tak ah ka chia kitna dingin, LALPA chu ka Pathian hi’ntin;

²²zia suang, suangphu ding ah ka phu hile Pathian In hi’ntin: chun, ka kiang ah lei piak zosia chu sawm ah pakhat hun pia ngêi ngei ing ka,” ti’n a kitiam tai.