Read Vaiphei THILSIAM THU 3 Bible Online

THILSIAM THU 3 - Vaiphei bible

THILSIAM THU 3

¹LALPA Pathian in gamsa a siam lak in gûl chu a gûkpil pen ah. Gûl chun numei kiang in, “Pathian in huan ah thingga him him hi la nêk lo ding uh ahi a ti em?” ti’n a dong a.

²Numei chun gûl kiang in, “Tilo e, huan ah thinggate hi ka nethei ui:

³Huan lai tak ah thingga pen hivang Pathian in la nêk ding uh ahi pua’n, khoile la khoi khâk lo ding uh ahi, achutiloleh, thi mai ding la hiu, ei ti ahi,” ti’n a dawnhu a.

⁴Himaleh, gul chun numei kiang in, “Thi maijen lo e,

⁵la nêk uh leh la mit uh hung vâk intin, Pathian gual in a sia leh pha he’ la hung um ding uh chu Pathian in a he ahi,” ti’n a dawnhu a.

⁶Tichun, numei chun thingga chu a mu phât in nêk ding ah kilawm leh mit hîp ma ma ahi ti leh, mi hi’pil thei ding ah thingga etlâ um tak ahi ti a het in a ga chu a lo ah, a ne ta’n; a umpi a pawsal chule a pia’n, ama’nle a ne tai.

⁷Ziaphatchun, a paniu in a mit uh a hung vâk ta’n, ngawnchang ahi dan uh a hung kihedok tau ah; theichang dua khui khawm in sil leh chên a kisiam tau a.

⁸Chun, nitâk lam ni nêm ah, LALPA Pathian huan ah a hung lên thawmgi chu a he tau ah. Pawsal leh a ji chun huan ah thing lak ah chun LALPA Pathian chu a la kisêlgûk san tau a.

⁹Himaleh, LALPA Pathian in pawsal chu a hun ko ah, “Khoi tak ah um la hem?” a ti’n.

¹⁰Ama chun, “Huan ah la thawm ka hia’n, ngawnchang ah um ka hiziak in ka lau ah, ka kisêlgû ahi,” ti’n a dawnhu a.

¹¹Pathian chun, “Ngawnchang la hi kua’n a hun hil a hem? Thingga nêk lo ding ka ti kha la la ne ta ahi maw?” a ti’n.

¹²Pawsal chun, “Ka umpi ding ah lei piak numei khan thingga chu ei pia’n, ka la nêk mai ahi,” a ti’n.

¹³Ziaphatchun, LALPA Pathian in numei kiang ah chun, “La thil hi hih bangtidan ahi em?” a ti’n. Numei chun, “Gûl in ei thêm ah, ka la nêk mai ahi,” ti’n a dawnhu tai.

¹⁴LALPA Pathian in gûl kiang ah chun: “Zia gual ah thil la la bawl tâk ziak ah hin, ganhing zosia lak in hânsia dong in, um chuam diak in la tin, la bok in vâk zing ta’n la tin, la dam sung in leivui ne zing ta’n la;

¹⁵nang leh numei hun kidosak ing ka tin, ama suan leh nangma suanle kidosak ing ka; ama’n la luchang vaw thidup intin, nang in a akkhawmit chu thidup in la,” a ti tai.

¹⁶Numei kiang ah chun: “La nauvopna la haksatna, nasa tak in belap ing ka tin, haksa tak in cha hing sek ta’n la; la nopna chu la pawsal lam ah hi’ntin; ama’n la chung ah thu nei zing in a,” ti’n a gen tai.

¹⁷Chuleh, Adam kiang in: “La ji thu la nung ah, thing pakhat, a ga la nêk lo ding ti ah thu ka piak, la nêk ziakin, leisiat hi nangma ziakin, hânsialaw in a um tai; la dam sung sia gim tak ah sêm in, a ga ne ta’n la tin;

¹⁸ling leh khaute le hun kêdaw sak ing ka tin; la thâichinte bep ne ta’n la.

¹⁹Leisiat ah kipat siam la hi’n, leisiat ah la kile’kit masia, la mai ah khawsa-ul luang zut zut kawm ah sêm gim in, an ne ta’n la tin; nangma leivui ah siam la hi’n, leivui ma ah kile’kit ding la hi’ngal ah,” a ti tai.

²⁰Chuleh, pawsal chun a ji chu mihing zosia nu ahiziak in, a min ding in Evi a sak tai.

²¹LALPA Pathian in pawsal leh a ji â dingin savun nîk leh puan a siam piak ah, zia chu a silsak tai.

²²Ziaphatchun, LALPA Pathian in, “Ngai un, mihingte chu eimau lak ah pakhat tawhbang in, a sia leh a pha hekhen thei a hung hi tau ah; tu’hin, hinna thinggate chu a khut ua kilaw ah ne’n, kumkhua’n hing zing kha’n au,” a ti’n.

²³Ziaziakchun, LALPA Pathian in ama a lakdawna lei ma ma chu let dingin, Eden huan ah kipat in a sawldok tai.

²⁴Mihing chu a nawdok ta’n; hinnathing lampi veng bit dingin Eden huan ah sualam pang ah vansawlchâk Cherubte leh mei chemjam phe zot zot te leh kipei te chu a koi tai.