Read Vaiphei THILSIAM THU 30 Bible Online

THILSIAM THU 30 - Vaiphei bible

THILSIAM THU 30

¹Himaleh, Rakhel in vang Jakob chu cha him him a hinpiak puai ti a kihiat phatin, a suapinu chu a mitthîp ta’n; Jakob kiang in, “Cha ei pia’n, achutiloleh thi mai zaw’ng ka,” a tia.

²Chun, Rakhel chung in Jakob a lungna ta’n: “La gil ah ga hun pia phal lo Pathian thasâng ah um ka hia ah a hem?” a tia.

³Ama chun, “Entia, ka suaknu Bilhah saw pawl mai in; chutichun, ke’nle ama lak ah chate ka neitheina dingin, ka phei chung ah hin cha hing in a,” a ti’n.

⁴Tichun, a suaknu Bilhah chu a ji dingin a pia ta’n; Jakob in ama chu a pawl tai.

⁵Chun, Bilhah chun nau a hun vop ta’n, Jakob chu chapa a hun hinpiak tai.

⁶Rakhel chun, “Pathian in ei ngaitua ah, ka aw a hia’n, chapa ei pia a hita hi,” a ti’n; ziaziakchun, a min dingin Dan a sak tai.

⁷Chuleh, Rakhel suaknu Bilhah chun nau a vop kit ah, Jakob chu chapa dang pakhat a hinpiak kit tai.

⁸Chun, Rakhel in, “Nasa tak in ka suapinu ka buan ah, ka zo tai,” a ti’n; tichun, a min in Naphtali a sak tai.

⁹Chun, Leah chun chapa a nei kit ta puai ti a kihiat phatin, a suaknu Zilpah chu a pui ah, a ji dingin Jakob a pia ta’n.

¹⁰Tichun, Leah suaknu Zilpah chun Jakob chu chapa a hinpiak tai.

¹¹Leah chun, “A vangphat huai na e!” ti’n a min in Gad a sak tai.

¹²Leah suaknu Zilpah chun Jakob chu chapa dang pakhat a hun hinpiak kit a;

¹³Leah chun, “Ka hampha na lawm lawm e! Numeite chun hamphanu ei ti ding a hiu hilam,” a ti’n; tichun, a min dingin Asher a sak tai.

¹⁴Chuleh, bulâk hun in, Reuben in gamlak ah zawldi-âi a vamu’n, a nu Leah kiang in a hun chawi ah. Rakhel chun, a kiang in, “Lungsiat in la chapa zawldi-âi kha neukhat ei pia tiam in,” ti’n a don a.

¹⁵Ama chun a kiang in, “Ka pawsal lei chû piak hi thu duai ah la bawl ahi em? Ka chapa zawldi-âi natiangle ei chû piak gaw nalai maw?” a ti’n. Rakhel chun, “Ahiloleh, la chapa zawldi-âi man dingin tu’jan ah hin ama chu luppi in,” a ti ta’n.

¹⁶Chuleh, nitâk lam a hung hi chun Jakob chu lou ah kipat in a hung ta’n; Leah chu a dawn dingin a chia in: “Tu’jan ah hin lei luppi ding ahi, ka chapa zawldi-âi ah ka khêl la hi ta’ngal in,” a ti’n. Tichun, zia jan ah chun a luppi tai.

¹⁷Chun, Pathian in Leah pauchapna chu a ngaitha’n, nau a hun vop ta’n, Jakob chapa panga’na chu a hinpiak tai.

¹⁸Leah chun, “Ka suaknu chu ka pawsal kiang ah ka piak ziak in Pathian in ka law ei pia ta ahi,” a ti’n; tichun, a min in Issakhar a sak tai.

¹⁹Chuleh, Leah chun nau a vop kit ah, Jakob chapa pagukna a hinpiak tai.

²⁰Chun, Leah chun, “Pathian in mo ken pha tak ei piak ziakin, tu’hin chu ka pawsal chapa paguk ka hinpiak ta’n, ei ngaisâng ta’n ah,” a ti’n; a min in Zebulun a sak tai.

²¹Zia nung ah chunle chanu a nei kit ah, a min in Dinah a sak a.

²²Pathian in Rakhel chu a hezing ah, a pauchapna chu a ngaitha hen, a sûl le a hon piak tai.

²³Nau a hun vop ta’n, chapa a nei ah; “Pathian in simmaw ah ka umna hi a lamang tai,” a ti’n;

²⁴a min in Joseph a sak ah, “LALPA’n cha dang le ei piak belap ta hen,” a ti’n.

²⁵Chun, Rakhel in Joseph a hin nung ah chun, Jakob in, Laban kiang in, “Keima umna ngai, ka In leh ka gam lam ua kha ka um kit theina dingin ei chiasak ta’n;

²⁶la na ka sep law pen ka jite leh ka chate hi ei pia’n la, ei chiasak ta’n; la na ka sep piak dan hi la henai,” a ti’n.

²⁷Laban chun a kiang in, “Lei hepi thei ahi chun um nalai ta’n la; LALPA’n nangma ziak ah hin maljawlna ei piak ahi ti ka hechian hi;

²⁸chuleh, la law ding chule ei gen in, pena’ng ka,” a ti’n.

²⁹Chun, Jakob in, “Bangti’n la na ka sêm em, bang gual in la ganchate ka chingna em ti la he na hilam:

³⁰Kei hung ma’ khan tawmcha la nei ah, tu’hin vang tam tak a pha tau hi; ka kiheina lam taphot ah LALPA’n a hun maljawl la hi hilam. Ahi’nla, bangtik leh keima Insung chan ding ka sêmdok ta diam?” a tia.

³¹Chun, ama chun, “Bang hun pe ding ka hi em le?” a ti’n. Jakob in, “Bangmacha ei pia kin; ei pia le chin la ganhonte ka vâk ah ka hun chin piak ngai kit ding ahi’n;

³²tu’ni hin la ganhon chu vaen suak ing ka tin, belam hon lak ah a vom in a kâp gial leh a kâp cheng lek luk leh a pivom taphot leh, kêl hon lak ah a gial leh pawl phel phul taphot chu ka law dingin kilâk ing ka.

³³Chutichun, ka law ding ah ka lakte entha la hung phat leh, ka hun nunung lam hin ka diktat dan chu taklang mai in ah. Kêl hon lak ah a gial leh a pawl phel phul hilote leh, belampi lak ah a vom hilo taphot chu nang â ka gûk dan in sim khawm mai in,” a ti’n.

³⁴Laban in, “A pha ngut hi, la gen gual chu hihen,” a tia.

³⁵Tichun, zia ni ma ma chun Laban in kêlchal lak ah a vam ah jem tan, a vam in a kâp cheng phel phul taphot leh, kêlpi lak ah a vam ah gial leh a vam in a kâp cheng phel phul, a vam ta phot leh, belam hon lak ah a vom taphot chu a chuam in a koi ah, ama chate a chinsak ta’n;

³⁶Jakob in Laban gan-gual dang zosia chu a chin zing lai in, ama leh Jakob kikâl ah ni thum lam chiana ah gamla in a koichuam tai.

³⁷Chun, Jakob in hiangzau thing leh makha thing leh sething tiangpum a la’, a hawng a khok pawl dit diat ah, mol ah chun a pawlna mun chu a latsak a.

³⁸Chun, gan honte’n a tui dawn seknau ah kuang, tui luanna munte ah chun, gan honte mazawn chiat ah chun mol kikhok pawlte chu a koi ta’n: tui dawn ding ah a hung phat uh leh, a huam uh a kipan sek in.

³⁹Tichun, gan honte chu molte zawn ah chun a huam uh a kipan tau ah; a jem gialte, a jem cheng phel phulte ngen a hun hing ta sek un.

⁴⁰Jakob chun belamnote chu a chuam in a koi ah, a gan-gualte chu Laban gan-gual lak ah a jemtan leh a vom zosiate lam chu a ngatsak sek ah; ama gan-gualte chu a chuam in a koi sek ah, Laban gancha lak ah chun a koi ngai pua’n.

⁴¹Chun, gancha hat deute chu a huam hun sîn leh mol lak ah chun a huam theina ding un, Jakob chun tui luanna, gancha mu ah chun a molte chu a koi sek a.

⁴²Himaleh, gancha jawngkhal deute a hiu leh a koi ngai pua’n: chutichun, a no phalo deute chu Laban chan a hisek in; a hat cha cha chu Jakob chan a hisek hi.

⁴³Tichun, Jakob chu nasa tak in a hung pung ta’n; gan-gual tam tak tak te, suak pawsal leh numeite, sangawngsaute leh sabiltungte le a hun nei tai.