Read Vaiphei THILSIAM THU 31 Bible Online

THILSIAM THU 31 - Vaiphei bible

THILSIAM THU 31

¹Chun, Jakob in Laban chapate’n, “Jakob in I pau â zosia a lâk piak sik sek in, zia lopi’na a mu zosia hile I pa â lak ah pat a mu ngen ahi,” a tiu thuthang a la he ta’n.

²Jakob in Laban maisua chu tu’ma lam ah gual khan a chung in a tai ta puai ti a he’n.

³Chun, LALPA’n Jakob kiang in, “La suante gam, la chipite kiang lam in chia kit ta’n, la kiang ah um zing ding ka hi,” a ti’n.

⁴Tichun, Jakob in lou lam ah a gan-gual umna kimu dingin Rakhel leh Leah vako dingin mi a sawl a.

⁵A kiang un, “La pau mêl ka et leh tu’ma lam gual ah khan ka chung hin a tai ta puai ti ka hia’n. Himaleh, ka pa Pathian chu ka kiang in a um zing hi.

⁶La pau na hi theitawp in ka sêm hi ti nang unle la hiau a.

⁷Himaleh, la pau chun ei thêm ah, ka law hi sawmvei hial ei hi’danglam piak ta’n; ahi’n la, ei suksiat ding vang Pathian in a phal lo ahi.

⁸‘A jem pawlte chu la law ding hi hen,’ a ti leh, gan zosiate chun a jem pawl ngen a hun hing sek un: chun, ‘A jem tante chu la law ding hi hen,’ a ti leh, gan zosiate chun a jem tante ngen a hun hing kit sek un.

⁹Ziagual chun, Pathian in la pau ganchate chu lak piak in, kei kiang in ei pia ta ahi,” a tia.

¹⁰Chuleh, gante chu a huam kipat lai ua chun ka mang in ka vak dakdaw leh; a chal, gancha bawte zosia chu a jem tante, a jem pawlte leh a jem kâi zeng zungte ngen a hiu a.

¹¹Chun, ka mang ah chun Pathian vansawlchâk in, “Jakob,” ei hun ti’n. Ke’n le, “Zia hin ka um hi,” ka ti’n.

¹²Ama chun, “Hang khawdak in la en tiam in, kêlchal gancha baw zosia saw, a jem tante, a jem pawlte leh a jem kâi zeng zungte ngen ahi tau hi: Laban in la chung ah thil a bawl zosia hi ka mu suak ei vei.

¹³Keima hi suangphu ah, sathau la nu’na, ka kiang ah thu la tiamna mun, zia Bethel Pathian kha ka hi. Tu’hin, kipan inla, zia gam ah kipat hin pawtdok inla, la pianna gam ah chia kit ta’n,” ei ti hen, a ti ta’n.

¹⁴Chun, Rakhel leh Leah chun a dawnhuu ah, a kiang in, “Ka pau In ah kei uh â dingin chan ding leh go khop ding a um nalai ah a hem?

¹⁵Ama’n gam dang mi dan ah ei ngai hilo a hem? Ei zuak in, ka man uh le a ne zo ta’ngal in.

¹⁶Pathian in ka pau ah kipat sum a lak piak thil zosia chu eimau leh I chateu â ding ahi. Ahi’n, Pathian in la kiang ah a gen taphot chu hi mai in,” a tiu a.

¹⁷Chun, Jakob chu a kisa’n, a chapate leh a jite chu sangawngsau chung in a chuansak a;

¹⁸Kanaan gam ah a pa Isak kiang lam ah chia dingin a gan nei zosia, a thil khol khawm zosia, a gan lawdawsate, Paddan-aram gam ah a khol khawm zosia chu a somdok sik sek tai.

¹⁹Laban chu a belam mul mêt ding ah a chia mang kâl ahi’n; Rakhel in a pa In dawi pathian limte chu a la guk mang piak a.

²⁰Chun, Jakob chu Aram mi, Laban het lo kâl in a gûk in a la kigel mang ta’n; a jam mang ding chu ama a la hil masa puai.

²¹Chutichun, a nei zosia tawh a tai mang ta’n; chun, a kipan ah, Euphrates luipi a kân in, Gilead tânggam lam zuan in a chia tai.

²²Chun, a ni thum ni chun Jakob a jam mang tai ti Laban a hil phat un,

²³a chanaute a pui in, ni sagi lam tiang in a vadel ah; Gilead tâng gam ah chun a vadel pha ta’n.

²⁴Ahi’n, Aram mi Laban kiang ah chun jan ah a mang in Pathian a kilâk ah, “Jakob kiang in a sia hi’n, a pha hileh bangma gen lo dingin chingthei in,” a ti’n.

²⁵Laban in Jakob chu a delpha ta’n. Jakob in a puan In chu tâng gam in a la jak ah. Laban inle a chanaute tawh Gilead tâng gam ah chun a puan In uh a jak tau a.

²⁶Laban in Jakob kiang in, “La thil bawl dan hi bangtidan a hem, ka hetlo kâl in la la tai mang ziang ah; chemjam mang ah pui mang suakte gual in ka chanute la la pui mang ziang a?

²⁷Bang ziak ah a gûk ah tai mang ah, a gûk ah ei nusia, kipaknate, Lâte, khuangneute leh tingtangte tawh ka thâk theina ding ah ei gen masa lo hial la hem?

²⁸Chuleh, bangatia ka tute, ka chanute ka chawp malam phal lo la hem? La thilbawl hi ngolhuai tak ahi.

²⁹Hun bawlsia thei ka hi’n; himaleh, la pa Pathian chun tu’jan ah khan, ‘Jakob kiang in a sia hi’n a pha hileh bangma gen lo ding in chingthei in,’ ti’n ei hil a.

³⁰Ahi’n, la pa In lam ah chia nuam malehchinle, bangatia ka Inkuan pathian limte lei gûk mang piak khel khel a hem?” a ti’n.

³¹Jakob in Laban a dawnhu a, “La chanute hi thagum in ei lâkpiak ziang kha’n la ti ka lau ziak ahi;

³²kuale la pathiante lim la mû’na taphot chu hing pua’n a. Ka Inkuante mit mu ah hin nang â ka kiang ah um chu enchian inla, kilâk ziang in,” a ti’n. Rakhel in a la gûk lam Jakob in a la hepuai.

³³Chun, Laban chu Jakob puan In ah te, Leah puan In ah te leh a suaknu panite puan In ah te chun a lût pek ah; himaleh, a mu zo puai. Ahi’n, Leah puan In ah kipat chun a pawtdok ah, Rakhel puan In ah chun a lut kit a.

³⁴Rakhel in a Inkuan pathian limte chu a la lâk, sangawngsau chungdâp chutnate lak ah a la koi, a la chut khum ahi’n. Laban in a puan In sung zosia chu hawl suak maleh, bangma a mu ta puai.

³⁵Rakhel in a pa kiang in, “La ma ah ka din theilona ziak hin ka LALPA lungna ki’hen: numei dan pangai chu ka chung ah a tun lai tak ahi ngal in,” a ti’n. Tichun, a In dawi pathian limte chu a hawl a hawl ah; himaleh, a mu zo ta puai.

³⁶Chun, Jakob chu a hung lungna ta’n, Laban chu a vau tai: “Bang ka hi’khial ah, bang a hem ka gitlona, hiti lawm lawm ah lei hun delzui ziang hi?

³⁷Ka van zosia la sua lumlet ah, la In sung van him him bang la mu em? Ei te ni chungchâng ah thupukna a siam theina ding ua, ka chanaute tawh la chanaute hin a dik leh a maw ei tan piak uh hen.

³⁸Kum sawmni hial la kiang in ka la um ta hen; la belampite leh la kêlpite’n no a nei khial ngai puau ah; la belam hon lak ah a chalte le ka me kha puai.

³⁹Gamsa peliamte le la kiang ah ka hun pui ngai puai; a mangte thasâng keima’n ka dit sek ah: sûn hileh, jan hileh a kigumang taphot, lei ditsak sek hi.

⁴⁰Zia gual hin ka um sek in: sûn ah nisa ka thuak ah, jan ah khawvot in ei hi’genthei ma ma sek ah, iple ka ipmu khop ngai puai.

⁴¹Zia kum sawmni sung hi la In ah ka um ah; la chanute law dingin kum sawm leh li la na ka sêm in; la ganchate law dingin kum guk la na ka sêm kit ah. Ka law chu la sawmvei hial lei suk danglam piak in.

⁴²Ka pa Pathian, Abraham Pathian, Isak in a Lau-pa chu ka kiang ah umlo hivang leh, tu’hin le ngawnchang ah ei chiasak ngei ngei ding la hi hilam. Pathian in ka genthei dan leh ka sepgim dan a mu’n, zia jan ah chun a hun vau ahi chulam!” ti’n a dawnhu a.

⁴³Laban in Jakob kiang in, “Chanute hi keima chanute ngen a hiu ah, naupangte hile keima naupangte ngen a hiu ah; ganchate hile keima ganchate ngen a hiu; la mu zosia hi kei â ngen ahi sik sek ui. Tu’ni hin zia ka chanute chung leh, a cha hinteu chung ah hin bang a hem ka bawl thei ding?

⁴⁴Hung tiam in, thutiam bawl hitiu: zia chu nangma leh keima kikâl ah hiatpitu hi hen,” ti’n a dawnhu a.

⁴⁵Tichun, Jakob in suang pakhat a la’n, a phu a.

⁴⁶Chun, Jakob in a chanaute kiang in, “Suang hun lakhawm un,” a ti’n. Suang a hun lak khawm uh chu a tiang khawm un, a kiang ah chun an a ne tau a.

⁴⁷Laban in zia suang tian khawm chu Jegar-sahadutha a sak ah; Jakob in Galeed a sak hi.

⁴⁸Laban chun, “Zia suang tian khawm hi tu’ni keima tawh nangma kikâl ah hiatpitu ahi,” a tia. Ziaziakchun, a mun min in, Galeed sak den ahi tai.

⁴⁹Laban chun, “I kikhen phat leh LALPA’n ei vêng gêl ta hen” a ti ziakin, a suangphu chu Mizpah a sak a.

⁵⁰“Ka chanute hi la hi’genthei ah, ka chanute hilo mi dang ji la nei chun, en in, kuama I kiang ah a umlo inle Pathian chu keima tawh nangma kikâl ah hiatpitu ahi,” a ti nalai a.

⁵¹Laban in Jakob kiang in, “Zia suang kitiang khawm leh suang kiphu, keima leh nangma kikâl ah kikoi hi en tiam in.

⁵²Thil phalo kibawl piak tua lo dingin, keima zia suang kitiang khawm khêl ah hin la kiang lam ah hung pua’ng ka tin; nang le zia suang kitiang khawm leh zia suang kiphu khêl ah hin ka kiang lam ah hung kin la, zia suang kitiang khawm hi ei hiatpitu hihen la, zia suangphu hile ei hiatpitu hi hen.

⁵³Abraham Pathian, Nahor Pathian leh a pau Pathian chun I kikâl in vaihawm ta hen,” a ti kit a. Jakob inle a pa Isak in a Lau-pa min chu sâl in a kitiam tai.

⁵⁴Chuleh, Jakob in tâng ah chun kithoina a siam ah, a chanaute chu vaithum ne dingin a ko ah, vaithum ne zo in, tâng ah chun a giak tau a.

⁵⁵Chuleh, Laban chu jingkal ma tak in a tho ah, a tute leh a chanute chu a chawp ah, a maljawl zaw in a nusia ah, a umna lam in a chia kit tai.