Read Vaiphei THILSIAM THU 33 Bible Online

THILSIAM THU 33 - Vaiphei bible

THILSIAM THU 33

¹Jakob chu a vak dakdaw leh, Esau tawh a nungzui mi za li a kiang lam hun zuante chu a vak mu ta’n. A chate chu Leah, Rakhel leh a suaknu panite kiang ah chun a hawm jak chiat a.

²Suaknute leh a chateu chu a matawng pen in a koi ah, Leah leh a chate chu a bân in a koi ah, Rakhel leh Joseph chu a nunung pen in a pansak a.

³Ama chu a ma-âng un a chia ah, a u kiang a tun ma’ sagivei leitual si’n chibai a bûk a.

⁴Esau chu ama lamtua dingin a tai ah, a kawi ah, a ngawng leh ama ngawng situa in, a chawp ah, a kap tau a.

⁵Chuleh, Esau chu a vak dâk ah, numeite leh naupangte chu a mu ta’n: “La hun puite hi kuate a hiu em?” ti’n a dong a. Ama chun, “Pathian in a lungsiat ziak ah la suak kiang ah a piak naupangte a hiu,” ti’n a dawnhu a.

⁶Chutichun, suaknute chun a chateu tawh a hun nai un, a kûn un, chibai a bûk chiat tau a.

⁷Leah inle a chate tawh a hun nai un, a kûn un, chibai a bûk un; zia nung ah chun Joseph leh Rakhel chunle a hun nai un, kûn in chibai a bûk tau a.

⁸Esau chun, “Gan-gual ka kituakpi zojai kha bangtidan a hem?” ti’n a dong ah. Ama chun, “Ka lalpa, la hepina ka mutheina dingin ka ti ahi,” ti’n a dawnhu a.

⁹Esau in, “Ka nau, ke’nle ka hau nai, la nei zosia chu nang in kichan kit ta’n,” a ti piak a.

¹⁰Jakob chun, “Hilo e, lei hepi chun lungsiat tak in ka kipakman piak kha ei pom piak in. La mêl ka mu hin Pathian mêl mu gual in ka kingai ah, zia gual lawm lawm ah doisakna hi tawh lei la lop ngal in.

¹¹Pathian in ei hepi ziak leh, ka nei tam hun tawk ziak ah hin, lungsiat tak in ka thil hun piak kha ei pom piak in,” ti’n a phût hâm hâm ah. Tichun, a pom tai.

¹²Esau chun, “Hung in, kipan hitiu in, chia hitiu; lamkai piak ing ka,” a ti’n.

¹³Himaleh, Jakob chun, “Naupangte hi a hat nai puau ah, belam leh bawng hon, ka kiang ah umte hi a no nei a hiu ti ka lalpa’n la hiai; ni khat mai a chia hat tâk luat na ziak bep unle gan-gualte hi thi ziang thei ding a hiu.

¹⁴Ka lalpa, lungsiat tak in la suak ma-âng in chia pek inla; Seir tâng ah ka lalpa, la kiang ka hung tun masang sia, ka ma ah gan honte leh naupangte hi a chia thei dan dan un, awl cha cha’n hun som ing kau,” ti’n a dawnhu tai.

¹⁵Esau chun, “Ka kiang ah um mi khenkhatte bêk hi hun nutsia piak leng la,” a ti’n. Ama chun, “Bang ziakin em ka lalpa, la doisakna ei musak mai in,” a ti’n.

¹⁶Chutichun, Esau chu zia ni ma ma chun Seir tâng lam zuan in a chia kit tai.

¹⁷Jakob chu Sukkoth mun in a chia ah, ama â dingin In a sa’n, a gan-gualte â dingin bawk a khaw in; ziaziakchun, zia mun chu Sukkoth a sak den tau hi.

¹⁸Jakob, Paddan-aram gam ah kipat hung pawtdok chu dam tak in Kanaan gam ah Shekhem khawpi a hung tung ta’n; khawpi pâm in gia mun a khual tai.

¹⁹Shekhem pa Hamor chate ah kipat dangka shekel za khat ah mun a la chawkna khan a puan In a jak tai.

²⁰Zia tak ah chun mâichâm a siam ah, a min in, El Elohe Israel a sak tai.