Read Vaiphei THILSIAM THU 35 Bible Online

THILSIAM THU 35 - Vaiphei bible

THILSIAM THU 35

¹Pathian in Jakob kiang in, “Kipan inla, Bethel ah chia to in, zia tak ah chun chêng inla; la u Esau kiang ah kipat la tai mang lai ah la kiang ah kilâk Pathian â ding ah khan mâichâm siam in,” ti’n a hil ah.

²Tichun, Jakob in a chanaute leh a kiang ah um zosia kiang in, “La lak ua gam dang pathian um zosia pai mang unla, kihithiangtho unla, la puanteu le theng un:

³Kipan hitiu in, Bethel ah chia to hitiu; tichun, ka lungjin lai ah ei dawnhu ah, ka chiana lam zosia ei kitonpi zing, Pathian â ding ah mâichâm ka bawltheina dingin,” ti’n a gen a.

⁴Chutichun, pathian dang a la nei zosiau leh a bil ua a bateu zosia, Jakob kiang in a hun piau ah; Jakob in ziate chu Shekhem khua kiang daipâm ah gangpi thingbul nuai ah chun a vui mang tai.

⁵Chutia, a chia pek lai ua chun, a kîmvêl ua khawpite chung ah chun Pathian launa a um ah; tichun, kuama’n Jakob chate chu a del ta puau a.

⁶Jakob chu a kiang ah um zosia tawh Kanaan gam ah Luz khua (Bethel le kiti) chu a hung tung tau a.

⁷Zia tak ah chun mâichâm a siam ah, a u kiang ah kipat a tai mang lai ah, Pathian a kiang ah a la kilâk ziakin, a mun chu El-Bethel a sak tai.

⁸Rebekah donnu Deborah chu a thi ta’n, Bethel nuai lam ah gangpi thingbul nuai ah chun a vui tai: zia mun chu Allon-bakuth a sak tai.

⁹Paddan-aram gam ah kipat Jakob a hung pawt daw lai in, Pathian a kiang in a vakilâk kit ah, a maljawl ta’n.

¹⁰Pathian chun Jakob kiang in, “La min Jakob ahi’n, la min chu Jakob hita pua’n tin, Israel hizaw ta’n a,” a ti tai. Tichun, a min chu Israel sak ahi tai.

¹¹Chuleh, Pathian in a kiang ah, “El Shaddai chu ka hi; la chisuan pha hen la, hung pung ta’n; nam pakhat leh nam chi chuam chuamte la lak in hung piang in la khalbe’ kipat hin leng leh lalte le hung pawt in au.

¹²Abraham tawh Isak kiang ah gam ka la piak kha nangma kiang ah hun pia’ng ka tin; chuleh, la nung ah la suan leh pâkte kiang ah zia gam chu pia kit ing ka,” a ti tai.

¹³Chuleh, Pathian in ama a ho’na mun ah kipat chun a chia to san kit a.

¹⁴Jakob in ama a ho’na mun tepte’na dingin suangphu a bawl ah; a chung in dawn chi thilpiak a sung ah, sathau a sun khum tai.

¹⁵Chutichun, Pathian in ama a hona mun min chu Jakob in Bethel a sak tai.

¹⁶Bethel ah kipat chia pek in, Ephrath khua a tunna ding uh gamla thim tak hi nalai in, Rakhel chun nau a vei ah, a gim ma ma ta’n.

¹⁷Gim tak ah a thok zing lai ah chun a naulai domnu chun, “Lau kin, chapa dang nei kit ding la hi,” a ti’n.

¹⁸A thi ding kua’n ah chun a min dingin Benoni a sak in; himaleh, a pa chun vang Benjamin a sak hi.

¹⁹Rakhel chu a thi ta’n, Ephrath khaw zotna lampi chun a vui tau a. (Ephrath khua chu Beth-lehem ahi.)

²⁰A thân chung ah chun Jakob in suang a phu ah: Zia chu tu’tiang hin Rakhel thân suangphu a hizing tai.

²¹Ahi’n, Israel chu a chia pek ah, Eder Insâng khêl ah puan In a jak tai.

²²Zia gam ah chun Israel a châm sung in Reuben chun a thâikem Bilhah chu a valuppi ah, Israel in zia chu a he tai. Chuleh, Jakob chate chu pawsal sawm leh ni a hiu a.

²³Leah chate chu: Reuben (Jakob cha upa pen,) Simeon, Levi, Judah, Issakhar tawh Zebulun a hiu a;

²⁴Rakhel chate chu: Joseph tawh Benjamin a hiu a.

²⁵Rakhel suaknu Bilhah chate chu: Dan tawh Naphtali a hiu a.

²⁶Leah suaknu Zilpah chate chu: Gad tawh Asher a hiu a. Ziate hi Jakob chapate, Paddan-aram gam ah a neite chu a hiu hi.

²⁷Jakob chun Kiriath-arba khua, Abraham tawh Isak umna Mamre mun ah a pa Isak kiang a hung tung ta’n (Kiriath-arba khua chu Hebron ahi.)

²⁸Isak dam sung chu kum za leh sawmgiat ahi.

²⁹Chun, Isak chu a thi ta’n; upa tak in a têk thi tai. A chipite kiang ah vui in a um tai: a chapa Esau leh Jakob in a vui tau hi.