Read Vaiphei THILSIAM THU 37 Bible Online

THILSIAM THU 37 - Vaiphei bible

THILSIAM THU 37

¹Jakob chu a pa malzinna gam, Kanaan gam ah chun a chêng ta’n.

²Zia hi Jakob Inkuante chanchin chu ahi: Joseph chu kum sawm leh sagi ahi lai in, a suapite tawh gan a ching khawm ua; a pa jite Bilhah tawh Zilpah chate kithuapi in a pang ah; chuleh, a phatlonau chu Joseph in a pa kiang in a hilsawn sek hi.

³Israel chun Joseph chu a têk nung cha ahiziak in, a chate lak in a hepi diak ah; puanâk chual jem chuam chuam ah pawl a siam piak a.

⁴Chun, a pau chun ama chu a ute zosia sâng in a hepi zawi ti a u te’n a he tau ah; ama chu a muda ma ma ziang tau ah: pau pha’nle a ho nuam ta puau hi.

⁵Khat vei chu, Joseph in mang a hun nei ah, a u te kiang ah a gen phat in, amau chun a muda zaw diak tau a.

⁶Ama chun a kiang un, “Lungsiat tak in ka mang thu hi ngai tiam un:

⁷Loulai ah hin buphalte I la kân lom un; kei buphal chu a hung thodok ah, a hung ding ta mai ah; ziaphatchun, nang uh buphalte chun a hun ûm kîmvêl tau ah; kei buphal chu chibai a hun bûk chiat ta mai un,” a tia.

⁸Chun, a u te chun a kiang in, “Nang cha hin maw ka chung ua vai la hawm ding? Nang tawhbang cha hin maw ka chung ua thu la nei ding?” a tiu a.

⁹Mang a hun nei kit ah, a suapite kiang ah chun, “Ngai tiam un, mang ka nei kit in: Nisa leh thapi tawh aksi sawm leh khatte khin bokkhup in chibai ei la bûk ziang veu,” a tia.

¹⁰Himaleh, a pa tawh a u te kiang ah a gen phatin, a pan a gai ta’n; a kiang in, “Bang mang hile mat la hem! Kei tawh la nu tawh la u te zosia’n leitual si hial ah chibai hun buk lawm lawm ding ka hiu em!” a tia.

¹¹A u te chun a mitthîp ma ma tau ah; a pa bo chun a thugen chu a lungthim in a vop zing hi.

¹²Zialaichun, a u te chu Shekhem tuam ah chun a pa’u gan-gual ching dingin a chia tau a.

¹³Israel chun Joseph kiang in, “La u te’n Shekhem lam ah hilo a hem gan a chin uh? Hung tiam in, a kiang un hun sawl ing ka,” a ti’n. Ama chun, “Ei sawl in” a ti ta’n.

¹⁴A pa chun a kiang in, “La u te a dam nau em, ganchate chule a pha pha nau em vaen tha’n la; a chanchin uh ei hung hil kit in,” a tia. Tichun, Hebron guam ah kipat chun a sawldok ah, Shekhem chu a vatung tai.

¹⁵Loulai ah a vâk vêl vêl chu mi pakhat in a hun mu ta’n; “Bang hawl la hem?” ti’n a hun dong a.

¹⁶Ama chun, “Ka u te hawl ka hi: khoilam ah ganching a hitau em lungsiat in ei hil ta’n la,” a ti’n.

¹⁷Ama chun, “Zia pat hin a pawt tau kha lam: ‘Dothan lam ah chia hitiu’ a tiu ka hiai,” ti’n a dawnhu a. Tichun, Joseph chun a u te a hawl pek ah, Dothan lam ah chun a vamu tai.

¹⁸Amau chun gamla tak ah kipat in a la mu tau ah; a kiang uh a hung tun ma’n ama tha ding dan a la ngaitua zo tau a.

¹⁹Amau chun, “En tiam un, mang neipa a hung hi.

²⁰Hung un, that hitiu in, khûk sung ah hin pai lut hitiu in, ‘Sahâng in a that tai,’ ti mai hitiu; a mangte chu bangti’n a hung um him him em hia’i tiu,” a kitiu a.

²¹Ahi’n, Reuben in zia thu chu a he ta’n, a kiang un, “A hinna vang la puai tiu,” ti’n a khut ua kipat in a hinna chu a hukdok tai.

²²Reuben in a pa kiang ah a pui kit theina dingin a khut ua kipat hukdaw theina ding a ngaitua ziakin, “Thisan chu sua kiu inla, gamkeu ah khuk sung khat ah hin khelut ziang un, a chung ah khut tha kiu in,” a la ti ahi.

²³Joseph a u te kiang a hung tun phat ah chun, a puanâk chual jem chuam chuam ah kibawl, a âklai chu a lîpthâk piak tau a:

²⁴A pui un, kawkhûk ah chun a khelût tau a: Kawkhûk chu tui umlo’na, a ngawn ahi.

²⁵Chun, an ne dingin a kichu khawm tau ah; chuleh, a vak khawdat ua leh Ishmael khualzinte, a sangawngsau hon uh tawh Gilead gam ah kipat gimtui leh thingnâi damdawi tawh murra pua’n, Aigupta gam ah chia suk dingte a vak mu tau a.

²⁶Judah chun a suapite kiang ah chun, “I nau uh I thau ah, a thisan I suau ah, I ipmang mai uh chu bang phachuam ding a hem?

²⁷Hung un, Ishmaelte kiang ah sawn zuak zaw mai hitiu: ama hi I nau uh, I suapiu leh I taksa ngei ngei uh ahiziak in a chung ah khut tha puai tiu,” a ti’n. A suapite chunle lem a sa tau a.

²⁸Chuleh, Midian sumdawng mite chun a hun phâk phat un, Joseph khûksung ah um chu a suapite chun a kaidok ua, Ishmaelte kiang ah chun dangka shekel sawmni in a zuakdok tau a. Joseph chu Aigupta gam lam in a pui tung tau hi.

²⁹Reuben in kawkhûk lam a va etkit phat ah chun, Joseph a la um ta pua’n; tichun, a puanâk a bot thêk tai.

³⁰A naute kiang in a chia kit ah, “Naupang la um talo; khoilam suding ka hi tam!” a ti’n.

³¹Chuleh, Joseph puanâk chual chu a lau ah, kêlcha pakhat a that ua, a thisan lak in a puanâk chual chu a dia tau a.

³²Chun, puanâk chual bân sau, jem chuam chuam ah kibawl chu a pa kiang in a hun chawi tau ah: “Zia hi ka mu ziang un, la chapa puanâk ahi leh hilo en tiam in,” a tiu a.

³³Ama chun a la he ngal a, “Ka chapa puanâk chual ahi ma ma hi! Gamsa nêk zaw a hita hilam. Joseph chu matheilo in puaitel ah um hi ngei ding ahi tai,” a ti’n.

³⁴Tichun, Jakob in a puan a bot thêk ah, saidip puan sil in, ni sawt tak a chapa chu a sûn tai.

³⁵A chapate zosia tawh a chanute zosia’n a thamuan guau ah; himaleh, ama chu thamuan a nuam pua’n, “Lusûn kawm in Sheol ah ka chapa kiang in chia ding ka hi,” a ti ta mai a. Tichun, a chapa chu a kâ tai.

³⁶Zia hun sung ah chun, Midiante’n Joseph chu Aigupta gam ah Pharaoh nuai ah mivêng haw lawi lak ah hotu pakhat, Potiphar kiang in a zuak tau hi.