Read Vaiphei THILSIAM THU 40 Bible Online

THILSIAM THU 40 - Vaiphei bible

THILSIAM THU 40

¹Chomkhat zaw in, Aigupta leng uain pepa tawh a vaithum siampa chun a puu Aigupta leng chu a hi’lungna tau a.

²Pharaoh chu a suak hotu panite, a uain pete lak ah hotu pen tawh, a vaithum siamte lak ah hotu pen chung in a lungna ta’n.

³Suangkul vêng hotu pawl In ah, Joseph umna mun ah khan a hun khum tai.

⁴Amau vêng hotupa chun amau chu Joseph khut in a koi ah, amau chu a la kaikol ah; ni bang jat a hem a tâng tau a.

⁵Suangkul ah um Aigupta leng uain pepa tawh vaithum siampa chun, a paniu in jan khat thu’n umzia nei tak mang a hun nei gêl tau a.

⁶Chuleh, jingkal in Joseph a kiang un a valut ah, lungngai tak ah um a hiu ti chu a vamu ta’n.

⁷Tichun, “Bangtidan ah tu’ni hin lungngai mêlpu la hiu em?” ti’n Pharaoh suak hotu, a pu In ah tângte ni chu a dong ta’n.

⁸Amau chun a kiang in, “Mang ka nei un, ei hilchian piak thei kuama a um puau hen,” a tiu a. Joseph in a kiang un, “Mang hilchiannate chu Pathian â hilo a hem? Ei hil tiam un,” a tia.

⁹Tichun, uain pia hotu pen chun Joseph kiang in a mang chu a hil ta’n: “Ka mang lam in, ka âng ah hin grep gui a la um in;

¹⁰grep gui ah chun a bâk pathum a um in. A dua hung mengdok pan pan in a hung pâk ngal ah; kin tak in grep gate chu a hung min ziang ta mai in.

¹¹Pharaoh no te chu ka khut in a la um ah; grep ga chu ka la lo ah, Pharaoh no in ka la sûk in, no chu Pharaoh khut in ka la pia’i,” a tia.

¹²Joseph chun a kiang in, “Zia hi a hilchetna chu ahi: bâk pathum chu ni thum ahi’n;

¹³ni thum sung ah hin Pharaoh chun hun thâdok intin, la nasep ngai kha hun sepsak kit intin: a uain pepa la hi’lai ah la piak gual ma khan, Pharaoh no chu a khut in pia kit ding la hi.

¹⁴Ahi’n, chan pha la chan kit phat leh ei hun hezing in aw; lungsiat tak in hepina ka chung in hun latsak ngei ngei inla, Pharaoh kiang in ka chung thu hun gen inla, zia In ah kipat hin ei puidok in.

¹⁵Hebraite gam ah kipat ei gûk mang uh ka hi’n; zia gam ah hinle suangkul ah lutna ding khop ah sukkhial bangma ka nei puai,” a tia.

¹⁶Vaithum siampa chunle a hilchianna chu a pha lam ahi ti a het phat in, Joseph kiang in, “Ke’nle mang ka nei in: vaithum law pathum in ka lu chung in ka la suangsawn in;

¹⁷a law Chungnung pen ah chun Pharaoh an ding ah siam, jat tam tak a la um ah; ahi’n, vachate’n ka law suanthua, ka lu chung ah kipat chun a la ne lui lui un,” a tia.

¹⁸Joseph chun a dawnhu ah, “Zia hi a hilchianna chu ahi: Law pathum chu ni thum ahi’n;

¹⁹ni thum sung ah hin Pharaoh hin hun that in, thing lêk ah hun khai intin; tichun, vachate’n la sa chu ne lui lui ding a hiu,” a ti piak tai.

²⁰Pharaoh chun, a nithum ni a pian champha ni chun a suakte zosia â dingin luaithe’na a siam ah; a suakte lak ah uain pepa tawh vaithum siam hotu liante ni luchang chule a dom sâng tai.

²¹Uain pia hotupa chu a no piak nasep ngai sêm dingin Pharaoh khut in no a pia kit tai;

²²himaleh, vaithum siam hotupa chu vang, Joseph in a mang a hilchian piak gual in a khailum tai.

²³Ahi’nla, uain pia hotupa khan, Joseph chu hezing talo in, a hemil veng veng ziang tai.