Read Vaiphei THILSIAM THU 42 Bible Online

THILSIAM THU 42 - Vaiphei bible

THILSIAM THU 42

¹Jakob in Aigupta gam ah bu a um hi ti a hun het phat in, a chate kiang in, “Bang ding ah ki-entua mai la hiu em?

²Aigupta gam ah bu a um hi ti ka he hen, thilo ah I damdaw theina ding un zia tak ah chun hang chiau inla, vapuau in,” a ti’n.

³Tichun, Joseph u te sawmkhat Aigupta gam ah bu chaw dingin a kipandok tau a.

⁴Joseph nau Benjamin bo chu a u te kiang in Jakob in a chiasak nuam pua’n; a chung in thil phalo khat tung kha tawl in ah, a ti ziakin.

⁵Chutichun, Israel chate chu midangte tawh bu chaw dingin a kiton tau ah, Kanaan gam ah le kial a tun ziakin.

⁶Tu’hin, Joseph chu a gam awptu a la hita’n; ama chu zia gam ah mi zosia kiang ah bu zuakpa chu ahi tai. Chun, Joseph u te chu a hung phat un, leitual sihial ah bokkhup in, chibai a bûk chiat tau a.

⁷Joseph in a u te chu a la mu’n, a vak he ziang ah; himaleh, amau chu gam dang mi gual in a la bawl ah, khau tak ah ho in, a kiang un, “Khoi ah kipat hung la hiu em?” a ti’n. Amau chun, “Kanaan gam ah kipat bu chaw ding ah hung ka hiu,” a tiu a.

⁸Joseph in a u te chu a la he nalai maleh, amau in vang a he ta puau hi.

⁹Joseph in amau chungchâng thu, a mang lam ah a la mute zosia kha a hedok veng veng ziang hi. A kiang un, “Entha mite la hiu, ka gam uh a jawnkhal dan he nuam ah hung la hiu,” a la ti’n.

¹⁰Amau chun a kiang in, “He pu, hilo e, la suakte hi bu chaw ding ah hung kei veu;

¹¹mi pakhat cha ka hiu ah, midik tak ngen ka hiu; la suakte hi entha mite ka hi kha ngai lo hial ui,” a tiu a.

¹²A kiang un, “Ka taksang puai. Gam jawnkhal dan entha hung la hiu hilam!” a ti tei tei a.

¹³Amau chun a kiang in, “Kei uh la suakte hi unau sawm leh ni, Kanaan gam ah um, mi pakhat chate ka hiu ah; a neupen chu tu’hin ka pau kiang in a um ah, pakhat chu a um ta puai,” ti’n a dawnhuu a.

¹⁴Joseph in a kiang un, “Entha mite la hiu ka ti kha, la hi ngei nau hi lam!

¹⁵Zia gual ah hin etchian in um in lau: La nau neupen uh chu zia tak ah la hun pui lo uh chun, Pharaoh hinna sâl in, zia tak ah kipat hin pawtdok him him pua’n lau ka ti la hiu.

¹⁶Midik tak la hiu leh hilo hetna dingin la lak ua pakhat hang chiau inla, la nau uh chu hun pui hen; a dang cheng hi chu suangkul ah a la um tadi in lau: chutilochun, entha mi la hi ngei mai ui ti Pharaoh hinna sâl in ka gen la hiu,” a ti ta’n.

¹⁷A leng un suangkul in ni thum a khum tai.

¹⁸A nithum ni chun Joseph in a kiang un, “Zia gual hin bawl leu chin hing in lau, Pathian ka lau ngal in:

¹⁹Midik tak la hiu chun, la suapi lak ua pakhat suangkul ah um den hen la; a dang cheng chu chiau inla, la chanauteu kial thuakte â ding bu puau in:

²⁰La nau neupen uh chu ka kiang ah hun pui un. Chutia chu la um uh leh la thuu chu kichian ta’n tin, thile thi pua’n lau,” a ti’n. Zia gual ah bawl chu lem a sa tau a.

²¹Chun, amau chun, “I naupau chung ah I thilbawl uh kha I thiamlo tak tak uh ahi; lungsiat ding ah ei dot tun tun lai ah, a lunggil lungkhamna zosia mu zing ngal ah I ngaisak nop lo uh kha. Ziaziakchun, zia lungkhamna hin ei pha a hita hilam,” a kitiu a.

²²Reuben chun, “Naupang chung ah thil hi’khial kiu in, ti’n la kiang ua ka gen him hilo a hem? La ngai puau ah ahi kha lam: Tu’hin, a thisan phuba chu a lâk uh a hita hilam,” ti’n amau chu a dawnhu a.

²³A kâl ua paulet mang sek a hiziak un, Joseph chun a thugen uh chu a hia’i ti a hepuau a.

²⁴Ama chu a kiheimang ah, a va kap ta’n; chuleh, a kiang un a hung kit ah, amau chu a ho ah. A lak ua kipat Simeon chu a pui chuam ah, a mit muu in a hên tai.

²⁵Joseph in a dipteu chu bu sung dim ding leh, a dangkateu chu a dip ua koi kit chiat ding leh, lampi kâl ah a nêk ding uh le pia ding in thu a pia’n. A thupiak gual in a bawl piak tau a.

²⁶A buu chu sabiltungte a puak sak ua; a kipandok tau a.

²⁷A lak ua mi pakhat in giabuk ah sabiltung an pia ding in a dip a vak hon leh, a dangka chu a dip kânna gawl bulchin ah chun a mudok ta mai a.

²⁸A suapite kiang ah chun, “Ka dangka a la koi kit uh hilam, ka dip ah hin a la um ziang hi,” a ti leh, a lunggim ma ma ziang tau a: “Pathian in zia gual ah ei bawl ziang hi bangtidan a dia aw!” ti’n, lau ah kithing kawm in a ki-entua ziang tau a.

²⁹Chun, Kanaan gam ah a pau Jakob kiang a hung tung kit tau ah; a chung ua thil tung zosia chu a hil tau ah; a kiang in,

³⁰“Zia gam hotupa chun, khau tak in ei ho in, gam entha hiding in ei ngaw hen.

³¹Ahi’nla, kei un, ‘Midik tak ka hiu in, entha mi ka hi puau;

³²unau sawm leh ni ka hiu ah, pa pakhat chate ngen ka hiu in; pakhat chu a um ta pua’n, a neupen chu tu’hin Kanaan gam ah ka pau kiang in a um hi,’ ka tiu a.

³³Chuleh, zia gam ah hotupa chun, ‘Hiti hin midik tak la hiu ti hethei ing ka: la lak ua mi pakhat ka kiang in nusiau inla; la chanau kial thuakte â dingin bu puau inla, chia tau in:

³⁴La nau neupen uh chu hun pui un; chutileh, entha mi la hi puau, midik tak la hi’nau ti hia’ng ka. Chun, la suapipau hile hun thâdok piak ing ka tin, zia gam ah hin sumkawl vei ta’n lau,’ ei tii,” a tiu a.

³⁵A dip ua bu a sunthâk lai un, a dangka chûn uh chu a dip un a la um chiat ta’n. Amau leh a pau chun dangka chûnte chu a muu in a beidong ma mau a.

³⁶Chun, a pau Jakob chun a kiang un, “Nang uh hin ka chate lei sûnsak uh ahi: Joseph la a um ta pua’n, Simeon la um talo; Benjamin nasan tu’n pui suk la gaw kit ua. Zia thil zosia hi ka chung in a tung ta mai in,” a ti’n.

³⁷Reuben chun a pa kiang in, “La kiang ah ka hun pui kit lo ngei ngei leh keima chate pani hi that ziang in. Ama chu ka khut ah ei vopsak lechin, la kiang ah hun pui kit mai ding ka hi,” ti’n a dawnhu a.

³⁸Hilehle, ama chun, “Ka chapa hi la kiang un hung pua’n ah: a u a thi ta’n, ama bepcha ahi ta’ngal in. La chiana lampiu ah chun tuaksiat hun tuak kha pal leh, ka samkâng hi lungngaina’n Sheol ah mual liampi mai ding ka hi’ngal in,” a ti tai.