Read Vaiphei THILSIAM THU 45 Bible Online

THILSIAM THU 45 - Vaiphei bible

THILSIAM THU 45

¹Ziaphatchun, Joseph chu a kiang ah ding zosiate mai ah chun a kisûm zo ta pua’n, “Mi zosia ka kiang ah kipat pawt un,” ti’n a kiko dok ta’n. Joseph a suapite kiang ah a kihiatsak sung ah chun kuama a kiang in a um puau a.

²Chun, a kap chuai chuai ta’n, Aiguptate’n le a hiau a, Pharaoh chanaute’nle a hiau a.

³Joseph chun a suapite kiang in, “Joseph kha ka hi. Ka pa chu a dam nalai na maw?” a ti’n. Himaleh, a suapite chu a âng ah chun lungdong talua’n, a dawnhu thei le a um ta puau a.

⁴Joseph ma ma chun a suapite kiang in, “Lungsiat tak in ei hun nai tiam un,” a ti’n. A vanai tau a. Ama chun, “La suapiu Joseph, Aigupta gam ah lei zok mang uh kha ka hi.

⁵Himaleh, zia tak ah chia ding ah lei zok mang ziak ua khan lungkham kiu inla, ki’awimaw diak kiu in: Hinna hukhing dingin Pathian in la ma lam ua ei la sawl masak ahi.

⁶Zia kum ni sung hi gam ah kial a tung ta hen, kum nga dang um nalai ding ahi; zia sung sia chu lou bawlna um pua’n tin, bu lâkna le um diak lo ding ahi.

⁷Lei ah hin suan leh pâk nei nalai ding ah ka hun umsak theina ding leh, hing dam ah ka hun hukhin theina dingin, Pathian in ei la sawl lut masa ahi.

⁸Chuleh, zia tak ah ei sawl lut hi nang uh la hi puau ah, Pathian a hi zawi: Ama chun Pharaoh â ding ah pa leh a In sung zosia ah hotu leh, Aigupta gam pumpi vaihawmpa dingin ei siam ta’ngal a.

⁹Kin tak in ka pa kiang ah chiau inla, a kiang in, ‘La chapa, Joseph in zia gual hin a tii: Pathian in Aigupta gam pumpi hotu’n ei siam tai; ka kiang lam ah hung suk inla, hung khawdâng sawt kin.

¹⁰Goshen gam ah um in la tin, ka kiang naicha um ding la hi; nang, la chate, la tute, la belamte, la bawng honte, la nei zosia tawh:

¹¹Zia tak ah chun ke’n hun enkol ing ka tin, kial umna ding kum nga’n a sam nalai ngal in; chutilochun, nangma, la Inkuante, la nei zosia hile la hung chatga lona ding un,’ a tii tiu inla.

¹²Chuleh, ngai tiam un, nangmau mit mu ngei leh ka nau Benjamin mit mu ngei in keima kam ngei ah ka gen lai tak hi la mu chiat uh hi.

¹³Aigupta gam ah hin bang gual bep ah choisân ah um ka hi em ti leh, la thil mu zosiau hi ka pa hil tei tei unla. Kinawu inla, ka pa chu la hun pui suk ding uh ahi,” a ti’n.

¹⁴Chun, a nau Benjamin chu a ngawng ah kawi in a kap ta’n, Benjamin inle a ngawng kawi in a kap tai.

¹⁵Chun, a suapite zosia chu a chawp ah, a kâ khum chiat ah: zia nung chun a suapite chu tawh a kiholim tau a.

¹⁶Joseph suapite a hung ui ti thuthang Pharaoh In ah chun a la he tau a: Zia chun Pharaoh leh a suakte chu a kipak ma mau a.

¹⁷Pharaoh chun Joseph kiang in, “La suapite kiang ah gen in: ‘Hiti hin bawl un: La ganchateu chu bu puak sak unla, Kanaan gam ah chia kit unla.

¹⁸La pau tawh, la Inkuan un hung suk unla, ka kiang ah hung un; Aigupta gam phatna pen pen hi ka hun piak ah, a gam hausakna hi la chan theina ding un,’ a tii, ti’n la,” a ti’n.

¹⁹Chuleh, zia hile gen dingin thu ka hun pia la hi: “Zia gual hin bawl un: La nauteu leh la jiteu â dingin Aigupta gam ah hin kângtalaite pui to unla, la pau hun pui in, hung tau in:

²⁰La thuamphuau le ngaitua buai kiu in, Aigupta gam ah thilpha zosia hi nang uh â ahi ngal in,” a ti nalai a.

²¹Israel chate chun zia gual ah chun a bawl tau ah: Joseph in Pharaoh thupiak gual ma chun kângtalaite chu a kiang un a pia’n, lampi a nêk ding uh tawh a pia tai.

²²A kithenna ding un puanle a pechiat ah; Benjamin kiang ah chun dangka thîk za thum tawh, a kithenna ding puan panga a pia’i.

²³Chun, a pa kiang ah chun zia gual hi a thot ah: Aigupta gam ah thilpha chi chuam chuam paw dingin sabiltungchal sawmkhat tawh, lampi kâl ah a pa nêk ding bu tawh, vaithum paw dingin sabiltungpi sawmkhat a thot a.

²⁴Ziaphatchun, a suapite chu chia kit dingin a hil ah, a chia dok ding kua’n ua chun, a kiang un, “Lam kâl ah la kinak malam lo ding uh ahi,” a ti malam a.

²⁵Tichun, Aigupta gam ah kipat chun a chia to tau ah, Kanaan gam ah a pau Jakob kiang chu a hung tung tau a.

²⁶A kiang in, “Joseph kha a la dam nalai hi! Aigupta gam pumpi vaihawm ah pang ei vei!” ti’n a hil tau ah. Jakob lungthim chu chau phut in, a thugen uh chu a taksang ziang thei pua’n.

²⁷Himaleh, a kiang in Joseph thugen zosia chu a hil un: A chuanna ding kângtalai Joseph in a hun thot chu a mu phât in a pau Jakob lungthim chu a hung hal huai tai.

²⁸Israel chun, “A pha’i! Ka chapa Joseph chu hing dam ah um nalai ahi maw! Ka thi masang in hang mu’ng ka,” a ti tai.