Read Vaiphei THILSIAM THU 47 Bible Online

THILSIAM THU 47 - Vaiphei bible

THILSIAM THU 47

¹Tichun, Joseph in Pharaoh kiang in, “Ka pa, ka suapite, a belamteu, a bawng gualteu tawh, a nei zosiau tawh Kanaan gam ah kipat in a hung tung suk tau ah, tu’hin Goshen gam in a um tau hi,” ti’n a vahil ta’n.

²Chuleh, a suapite lak ah mi panga, Pharaoh kiang in a pui a.

³Pharaoh chun a suapite kiang ah chun, “Bang ah nêk hawl la hiu em?” ti’n a dong a. Amau chun, Pharaoh kiang in, “La suakte hi ei suantute ah kipat him ah belamching mite ka la hiu,” ti’n a dawnhuu a.

⁴Amau ma chun Pharaoh kiang in, “Zia gam ah hin um tadi ding ah hung ka hiu ah, ka gam ua la suakte gan-gualte nêk ding bangma a um ta puai; kial hi Kanaan gam inle a ke’nasa ma ma in; ziaziakchun, la suakte hi Goshen gam ah ei chênsak mai lechin ka tiu hi,” a tiu a.

⁵Ziaphatchun, Pharaoh in Joseph kiang in, “La pa tawh la suapite la kiang in a hung tau a,

⁶Aigupta gam chu la thu thu ahi; la pa tawh la suapite chu gam phatna pen pen ah chênsak inla, Goshen gam ah khin chêng ziangleu hita’n a: Chuleh, a lak ua mi matthei a um uh chun ka gancha honte chung ah hotu dingin koi ziang in,” a ti tai.

⁷Joseph in a pa Jakob chu Pharaoh ma ah chun a pui ah, a ma-âng ah chun a dinsak ah: Tichun, Jakob in Pharaoh chu a maljawl ta’n.

⁸Chuleh, Pharaoh chun Jakob kiang in, “Kum bang zat la hita em?” ti’n a dong a.

⁹Jakob in Pharaoh kiang in, “Ka khualzinna kum sung chu kum za leh sawmthum a hita’n, ka dam sung kumte hi a tawm in, a genthei um ahi; ei suante a khualzinnau kum jat le pha lo ahi,” a ti’n.

¹⁰Tichun, Jakob in Pharaoh chu maljawl kit in, Pharaoh kiang ah kipat in a pawtdok kit tai.

¹¹Joseph in a pa tawh a suapite chu umna ding mun a khual tupsak ah, Pharaoh thupiak dungzui in Aigupta gam phatna pen pen, Rameses mun chu a go ding un a pia tai.

¹²Joseph in a pa tawh, a suapite tawh, a pa Inkuante zosia chu a tam dan dungzui un a nêk ding uh a pechiat ah, a vâk tai.

¹³Ziaphatchun, gam tin ah nêk ding a um ta pua’n; kial a ke’nasa ma ma ziang a: Kial ziakin Aigupta gam leh Kanaan gam chu a chausia ten tau a.

¹⁴Joseph in a bu zokna man in Aigupta gam leh Kanaan gam ah dangka zosia chu a luak khawm zo ta’n: tichun, Joseph in zia dangka chu Pharaoh In sung in a hun la lût a.

¹⁵Aigupta gam leh Kanaan gam ah dangka zosia chu a mat zaw phat un, Aigupta gam ah mi zosia chu Joseph kiang in a hung tau ah, “Nêk ding ei pia’n, dangka la ka nei ta puau in, la ma-âng ah hin thi mai ding ka hiu em?” a hung tiu a.

¹⁶Joseph chun, “La ganchateu hun pia mai un; dangka la nei lo ua leh la gancha man un nêk ding hun pia’ng ka,” a la ti’n.

¹⁷Tichun, a ganchateu chu Joseph kiang in a hun kaikhawm un; Joseph chun zia sakol mante, belam hon mante, bawng hon mante leh sabiltung mante ah chun a nêk ding uh a pia’n: zia kum ah chun a gancha man un nêk ding a pia’n, a vâk tai.

¹⁸Zia kum chu a hung bei phatin, a kum hung thak kit ah chun a kiang in a hung kit tau ah, “Ka dangka zosiau ka mat zaw tâk dan uh leh, ka gancha nei zosiau nang kiang ah ka hun piak dan teu hi ka lalpau kiang ah hin îm pua’ng kau: He pu, la mit mu ah hin ka taksau leh ka gamteu bep lo ngal bangma a um ta puai:

¹⁹La ma hin kei uh tawh ka gam uh hi mangthai ziang ding ka hiu ah a hem? Keimau hi ka gam pum un ka nêk man ding un ei chaw mai in; tichun, keimau tawh ka gam uh hi Pharaoh suakte hi mai ing kau: Thilo ah hing leh dam ah ka umtheina ding uh leh gam hi a siat lona ding in, buchi ei pia’n,” a hung tiu a.

²⁰Tichun, Joseph in Pharaoh â dingin Aigupta gam pumpi chu a chawk piak ta’n, kial chu a kiak nasat ma ma ziakin, Aigupta mite chun a lou uh a zuak mang zo tau ah: Gam pumpi chu Pharaoh â ahi sik sek tai.

²¹Mihingte a hiu leh Aigupta gamgi langkhat ah kipat langkhat tiang in a suak in a koi sik sek ta’i

²²Thiampute gam bep chu a chaw pua’n; thiampute chun Pharaoh lak ah kipat chanvo a nei un; Pharaoh chanvo piak chu a ne sek un; ziaziakchun, a gam uh chu a zuak puau hi.

²³Ziaphatchun, Joseph in mite kiang ah chun, “Ngai un, tu’ni hin nanghaw hi la gam pum ua Pharaoh â ding ah ka hun chawk la hitau. Zia tak ah hin nanghaw â ding ah buchi a um hi; lou ah chîng un.

²⁴Chuleh, pawltâk phat leh zia gual hi hi’n a: Pharaoh â dingin a mun nga ah khen mun khat pia’n la tiu in: A mun li chu nangmau â ding hi’n a: Zia chu a chi ding tawh la Inkuanteu nêk ding leh la chateu nêk ding hi’n a,” a ti’n.

²⁵Amau chun, “Nang in ka hinnau la hukhin tak ziakin, Pharaoh suakte hi mai ing kau,” a tiu a.

²⁶Joseph in Aigupta gam ah dan pakhat, tu’ni tiang ah zui ding ah kisiam Pharaoh in a lei ga mun nga ah khen a mun khat a chan ding, ti hi a hun siam ta’n. Thiampute gam bep chu Pharaoh a chang puai.

²⁷Tichun, Israel chu Aigupta gam ah, Goshen bial ah chun a chêng ta’n; gote a kikhawl khawm un, chi tam tak a suan ua, nasa tak in a pung tau hi.

²⁸Aigupta gam in Jakob chu kum sawm leh sagi a dam ah: Jakob dam sung zosia chu kum za sawmli leh sagi ahi.

²⁹Israel thi’na ding hun a nai phatin, a chapa Joseph a ko ah, a kiang in, “Tu’hin, la doisakna ka chan ahi chun, ka malpi nuai ah hin la khut hun gol inla, ginum tak leh dik tak ah ei enkol dingin thu tiam in, Aigupta gam ah hin ei vui kin la;

³⁰ei suantute kiang ah ka chia phat leh, Aigupta gam ah kipat hin ei pawdok unla, amau kivuina mun ah khan ei vui in,” a ti’n. Ama chun, “La gen gual gual in hun bawl ing ka,” a ti’n.

³¹Ama’n, “Ka kiang ah kitiamna nei in,” a ti’n; ama le a kitiam ngal tai. Tichun, Israel chu a jalkhun si’n a kûntha suk tai.