Read Vaiphei THILSIAM THU 49 Bible Online

THILSIAM THU 49 - Vaiphei bible

THILSIAM THU 49

¹Chun, Jakob in a chate zosia a ko khawm ah, zia gual hin a gen a: “Ni nunung lam leh, la chung ua thil hung tung dingte ka hun gen piak theina dingin hung khawm un:” a tia.

²Nanghaw Jakob chate haw, hung kikhawm unla, hung ngai un; la pa’u Israel thugen hi ngai un.

³Reuben, nang hi ka cha upa pen, ka thilhitheina, ka hatna ga masa pen la hi; chungnunna leh thilhitheina chu nang â ding ahi.

⁴Tui gual ah det lo la hi’n, chungnung pen hi’na chang thei pua’n la; la pa khunpi la kai ziakin: zia chu la hi’buak ta’n, ka lupna la kãl ziakin.

⁵Simeon tawh Levi unau a hiu a; a chemjamteu chu thisan sua’na hiamhei in a la mang tau a.

⁶A vaihawmnau ah chun ka thagau le vapang ngai pua’n tin; a kipawl khawmna lak unle vapang pua’ng ka, a lung uh a nat in mihing a that un, kihelna’n bawngchal zagui a sâttan un.

⁷A lungnatnau chun hânsia dong ta hen; huham tak ahi ngal un: a thangtawmnau chunle hânsia dong ta hen, a nunsiat ziak un! Amau chu Jakobte lak ah kipat zendok ing ka tin, Israelte lak ah chun thejak ing ka.

⁸Judah, nang vang la suapite’n hun pakcha’n au: la khut chu la gâlte ngawng ah koi in la tin; la pa chapate chu la ma-âng in hung kûn in au;

⁹Judah hi sakeibaknei no ahi’n; ka chapa, la sa mat chu la nusia ta’n: sakeibakneichal gual ah bok in, a kije hen; sakeibakneinu gual ma’n, kua’n kaitho ngam ding a hem?

¹⁰Laltiang chu Judah lak ah mang pua’n tin, vaihawmna laltiang chu a kêngkâl ah kipat bei diak pua’n a;

¹¹A sakol no chu grep gui ah hên intin, a sabiltungno chu grep gui pha tak ah hên intin; a puansilte chu uain ah sawp intin, a puan chu grep thisan in sawp in a;

¹²a mitte chu uain sâng in san zaw’n tin, a hate chule bawngnawi sâng in vâm zaw’n a.

¹³Zebulun hi tuisuagiat pang ah chêng intin; kuang cholna tuipang hi’n a; a gamgi chu Sidon tiang hi’n a.

¹⁴Issakhar hi sabiltung hât tak, belam huang kikâl ah kual ahi:

¹⁵Cholngakna mun chu pha a sa’n, a gam chule nuam a sa’n; van-gik paw dingin a liangko a dawniam ah, van-gik pua nasem ding ah suak in a um tai.

¹⁶Dan hi Israelte lak ah nam khat ah sim hi’ntin, a mite lak ah vaihawm in a.

¹⁷Dan hi lamlian pâm ah gûl um gual hi’ntin; lam pâm ah thangchom, sakol keng chu sek, a chung ah chuangte a thalnga lam ah, ketha ziang gual chu hi’n a.

¹⁸Aw LALPA, la hukdamna chu ka ngâk zing hi.

¹⁹Gad hi gâl in sim intin, himaleh, ama’n a nung lam un sim zaw’n a.

²⁰Asher hi a nêk chu pha’n tin lengte nêk chi tui tak tak hun bawldok in a.

²¹Naphtali hi sakhipi thâzan, sakhino melpha tak tak hun hing gual chu ahi.

²²Joseph hi bâk ga nuam tak, tuihing kiang ah bâk ga nuam tak, a bâkjam in bâng a jam khup tawhbang ahi.

²³Thal kâpte chun a hi’genthei un; a kâp un, a naw chimit un;

²⁴Himaleh, ama thalpi chu khau tak in a um zing ah, a khutbânteu chu Jakob Pathian Mihat khut ah, Belam Chingpa Israel suangpi min in hi’hat in a um zing hen;

²⁵la pa Pathian in nangma hun panpi hen la, El Shaddai in hun maljawl hen la, chung lam van maljawlnate, nuai lam thûk tak ah maljawlnate, nawitui leh sûl lam ah maljawlnate’n, nangma hun maljawl dingpa ngei suk-hat in um ta’n.

²⁶La pa maljawlnate hi ei suante maljawlnate sâng in, kumtuang Tângsipte leh, kumtuang tângte gamgi maljawlna sâng in a nasa zaw ahi: ziate chu Joseph luchung in um hen la, a suapite lak ah khendan ah umpa liangko ah chun um ta hen.

²⁷Benjamin hi ngei gawlsan ahi: “jingkal ah sa man intin, nitâk lam leh a gallâk chu hawm in a,” a ti’n.

²⁸Ziate chu Israel nam sawm leh nite chu a hiu ah; chuleh, amau mimal mal in maljawlna a don ding dan dungzui chiat ua, a pau in maljawlna a piak lai ah; amau chung ngei ah a la gente chu ahi.

²⁹Chuleh, amau chu thu a vaithâk ah, a kiang un, “Ka chipite kiang ah vui in um ding ka hi tai. Hit mi Ephron lou ah kawlbûk, ka pate kivuina kiang ah khan ei vui un,

³⁰Kanaan gam ah Mamre kiang ah, Makpelah lou ah kawlbûk, Abraham in kivuina mun go ding ah, Hit mi Ephron kiang ah a lou pum ah a la chawkna mun ah khan,

³¹Abraham in a ji Sarah a la vui ta’n; zia tak ah chun Isak in a ji Rebekah le a la vui in; zia tak ma ah chun Leah le ka la vui tai.

³²Lou tawh a sung ah kawlbûk um chu Hit suante ah kipat in chawk ahi ta’ngal in,” a ti’n.

³³Jakob in a chapate kiang ah thu a vaithâk zaw phatin, a kengte chu a jalkhun ah a lângkâi ah, a lai a cha’ ta’n; a chipite kiang in vui in a um tai.