Read Vaiphei THILSIAM THU 6 Bible Online

THILSIAM THU 6 - Vaiphei bible

THILSIAM THU 6

¹Lei chung ah mihing a hung pun ua, chanute a hung pian tam phat ah chun,

²pathian chapate chun mihing chanute chu mêlpha a sa ma mau ah; tichun, a dawi taphot uh chu a kichenpi ziang tau a.

³Ziaphatchun, LALPA’n, “Ka thagau mihingte kiang in umsak zing ta pua’ng ka, amau chu la phe leh vo mai ahi ngal un; a dam sung uh chu kum za leh sawmni tiang bep hita’n ah,” a ti’n.

⁴Zia lai ah chun Nephilimte chu lei ah hin a um un. Zia nung ah chunle pathian chapate’n mihing chanute chu a pawl ua, amau tawh chate a nei nalai ui. Ziate chu nidang lai ah mihat, mi minthangte kha a la hiu a.

⁵Chun, LALPA’n lei chung ah mihing gitlo dan nasat zia leh a lungthim ngaituanau zosia le gitlona dim zing ahi ti a he ta’n.

⁶Lei chung ah mihing a la siam tâk ziakin, LALPA chu a kisik in, a lungthim a na ma ma ziang tai.

⁷Tichun, LALPA’n, “Ka mihing siamte hi lei chung ah kipat in hi’mangthai mai ing ka, mihing hileh, ganhing hileh, a bokvâkte hileh, chung leng vachate natiang in, amau ka la siam hi ka kisîk ta ahi,” a ti’n.

⁸Himaleh, Noah chun Pathian ja’ngaina a chang hi.

⁹Ziate hi Noah suante a hiu: Noah chu midik leh ama khang ah mite lak ah demna bei ahi: Noah chu Pathian tawh a kivop zing ui.

¹⁰Noah in chapa pathum: Shem, Ham leh Japheth te hi a hing hi.

¹¹Pathian mit mu in lei hi siatna’n a dim ah; hiamngamna ngen ah dim ahi tai.

¹²Pathian in lei hi a en ah, a se zo ta’n; lei chung ah hinna nei zosia hindan dik ah a hin tâk lo ziak un.

¹³Pathian in Noah kiang in, “Taksa zosia subei ding ka hi tai, amau haw ziakin lei chung hi kipawngbawlna’n a dim ah; ziate ziak ah chun, a leisiat natiang hile susia khawm ding ka hi.

¹⁴Nang â dingin Gopher thing in long kibawl in la; long ah chun pindan chuam chuam siam in la tin, a sunglam leh a pawlam chu thingnâi ah la jutbit ding ahi.

¹⁵La bawl ding dan chu zia gual hi ahi: long dung sau dan chu tong za thum hi hen; a vai letdan chu tong sawmnga hi’ntin; a sândan chu tong sawmthum hihen.

¹⁶A long chung lam tukvan ah kipat tong khat ah sâng in a chung ding la bawl ding ahi; chuleh, a pang in a kotkhak bawl in la tin, a sawng nuainung, a sawng pani’na leh a sawng thumna tiang nei in ah la siam ding ahi.

¹⁷Chuleh, ngai in, keima ngei in taksa zosia, hinna ding ah hatna nei zosia chu van nuai ah kipat hi’mangthai dingin lei ah hin tui lêt sak ding ka hi. Lei chung ah thil um zosia thi sik sek ding a hiu.

¹⁸Himaleh, ka thuthung la chung ah hi’det zaw ding ka hi; long ah chun la chapate tawh, la ji tawh, la chapate jite chiat tawh, nangma tawh la lut ding uh ahi.

¹⁹Nangma tawh hinghoi khawm dingin hinna nei zosia, chitin lak ah pani chiat la kiang ah long sung ah la pui lût ding ahi. Amau chu a nu tawh a chal chiat a hi’diu ahi.

²⁰Vachate amau chi dungzui chiat in, ganchate le amau chi dungzui chiat in, lei chung ah ganhing zosia amau chi gual chiat in, chitin lak ah pani chiat in, humbit ah um dingin la kiang ah a hung diu ahi.

²¹Chuleh, a an ding un a nêkthei zosiau lakhawm in la, la kiang ah koikhawm in; chutichun, nang leh amau â dingin an nêk ding hung hi’n a,” a ti’n.

²²Zia gual chun Noah in a bawl ta’n; Pathian in thu a piak gual in a bawl tai.