Read Vaiphei THILSIAM THU 7 Bible Online

THILSIAM THU 7 - Vaiphei bible

THILSIAM THU 7

¹LALPA’n Noah kiang in, “Nang leh la chanaute zosia long ah chun lût un, nang chu tu’lai khangthakte lak ah ka mit mu in midik la hi ti ka hun he ta’ngal a.

²Sa thiang zosia lak ah a chal leh a nu kop sagi chiat la’n la; sathiang lo lak in a chal leh a nu kop khat chiat in;

³chunglêng vachate lak inle a chal leh a nu kop sagi chiat in, lei chung ah chisuan dingin la kiang ah la pui ding ahi.

⁴Ni sagi zaw leh lei chung ah hin ni sawmli leh jan sawmli gua zuksak ding ka hi’n, ka thilhing siam zosia lei chung ah kipat in hi’mangthai sik sek ding ka hi,” a ti’n.

⁵Tichun, LALPA’n a kiang ah thu a piak gual ah chun Noah in a bawl tai.

⁶Chun, lei chung ah tui a lêt lai ah chun Noah chu kum za guk mi ahi tai.

⁷Tui lêt ah kipat suakcha dingin Noah chu long ah chun a lut ta’n; a chapate tawh, a ji tawh, a chapate jiteu le ama chu tawh a lut khawm tau a.

⁸Sa thiang leh sa thianglo lak ah le, vachate lak ah le, lei ah bokvâk zosia lak ah le;

⁹Pathian in Noah kiang ah thu a piak gual in, a chal leh a nu, a kop kop in long ah chun a lût chiat tau a.

¹⁰Ni sagi zaw ah chun lei chung in tui a hung lêt tai.

¹¹Noah kum za guk a tin kum, a tha ni’na, a ni sawm leh sagi’ni, zia ni ngei ah chun tuithuk lian takte nâk zosia chu a hung kêkjak ta’n; van tukvante le a hung kihong tai.

¹²Tichun, sun sawmli leh jan sawmli sung lei chung in gua a zu a zu ta mai a.

¹³Zia ni ngei ah chun Noah, a chapa Shem, Ham tawh Japheth chuleh Noah ji tawh a chapa jiteu pathum, a leng un long in a lut tau hi;

¹⁴amau tawh kiton in, sa chitin amau chi dungzui chiat in, gancha chitin amau chi dungzui chiat in, ganhing leitual ah bokvâk zosia amau chi dungzui chiat in, vacha chitinte amau chi dungzui chiat in a lut tau a.

¹⁵Sa zosia, hinna nei zosia, a kop kop in Noah long ah chun a lut tau hi.

¹⁶Tichun, a lut tapote chu Pathian in a kiang ah thu a piak gual in sa zosia lak ah a nu leh a chal a lut un; chun, LALPA’n amau chu kot a khâk khum tai.

¹⁷Lei chung ah hin tui chu ni sawmli sung chu a hung um ta’n; tui chu a khang deu deu ah, long chu a lap kâng ta’n, lei ah kipat chun a lap sâng deu deu tai.

¹⁸Tui chu a khang deu deu in, lei chung mun tin a lua dim suak ta’n; long ahileh vang tui chung ah chun a kilap sâng deu deu tai.

¹⁹Lei chung ah tui a hung tam tâk ziakin, van nuai tângsâng zosia chu a hun chupmang zo tai.

²⁰Tângsâng pen pen chule tong sawm leh nga zet ah thûk in a chupmang suak tai.

²¹Tichun, lei chung ah tawi thei ganhing zosia, vachate, ganchate, sate, ganhing lei chung ah bokvâk zosiate, mihing zosia chu tawh a thi sik sek tau a;

²²a nâk ah hatna hu la zosiate leh mualkâng ah hing zosiate chu a thi sik sek tau a.

²³Chutichun, mihingte, gan honte, lei ah bokvâkte, chunglêng vachate zosia chu sukmangthai in a um tau ah; Noah leh a long sung ah umte bep chu dam in a um tau hi.

²⁴Lei chung pumpi chu ni za khat leh sawmnga sung tui in a chupmang suak tai.