Read Vaiphei THILSIAM THU 9 Bible Online

THILSIAM THU 9 - Vaiphei bible

THILSIAM THU 9

¹Chun, Pathian in Noah leh a chate chu a maljawl ah, a kiang un, “Suan tam tak nei in hung pung unla, lei hi hun lua dim tau in.

²Nangmau kichâtna leh launa lei ah sa zosia leh chung ah leng vacha zosiate hin nei intiu in; lei ah bokvâk zosia leh tuisuagiat sung ah um zosiate chu la khut ua piak ahi sik sek tau hi.

³Thilhing tawi thei chitinte chu la nêk ding uh hita’n tin; anche lohingte ka hun piak gual ma khan bangkim ka hun pia sik sek la hiu.

⁴Ahi’n la, sa a hinna, a thisan pum in la nêk khawm lo diu ahi.

⁵La thisan uh, la hinnau thisan phuba la ngei ngei ding ka hi’ngal a: Sa zosia lak ah la’ng ka tin, mihing lak ah le, mi tin a suapiteu lak ah le, mihing hinna phuba chu la ngei ngei ding ka hi.

⁶Kuale mihing thisan suatu chu, mihing ma ma in ama thisanle hun sua in a; Pathian kibatpi ah mihing siam ahi ngal a.

⁷Nang uh vang chi tampi suang in hung pung unla: lei ah hin cha tam tak hing unla, a chung ah hin hung pung tau in,” a ti tai.

⁸Chun, Pathian in Noah leh a kiang ah um a chate kiang ah chun:

⁹“Ngai un, keima’n nangmau kiang leh la nung ua la suanteu kiang tiang inle ka thuthung chu ka hi’det hi.

¹⁰La kiang ua thilhing um chitinte, la umpiu vachate, ganhingte, gamsate kiang leh long sung ah kipat hung pawtdok zosia, lei ah sa chitinte kiang tiang in ka thuthung chu ka hi’det hi.

¹¹Chuleh, la kiang ua ka thuthung hi’det ing ka tin; hinna nei zosia le tui ah hi’mangthai kit ta pua’ng ka tin, lei chung pumpi suksiatna dinginle tui let kit ta pua’n a,” a ti’n.

¹²Pathian in, “Zia hi Keima tawh nangmau leh la kiang ua um thilhing chitinte kikâl ah, suan hung um ding zosia tiang ah ka thuthung tepte’na hiding ahi:

¹³Sûm ah ka uizo ka jamsak ah, zia chu keima tawh lei kikâl ah thuthung tepte’na hi’n a.

¹⁴Lei chung ah sûm ka ji’nsak phat leh uizo hung kilang intin,

¹⁵kei leh nang tawh sa zosia lak ah thilhing chitinte kikâl ah ka thuthung siam chu hezing ing ka tin; chutichun, sa zosia hi’mangthai dingin tui chu lêt kit ta pua’n a.

¹⁶Uizo chu sûm ah chun jam sek intin; tichun, Pathian tawh lei chung ah hinna nei zosia kikâl ah ka kumtuang thuthung chu ka hetzing theina dingin hun en sek ing ka,” a ti’n.

¹⁷Pathian in Noah kiang ah chun, “Zia chu keima tawh lei chung ah hinna nei zosia kikâl ah ka thuthung sukdet tepte’na chu ahi,” a tia.

¹⁸Noah chapate, long ah kipat pawtdokte chu: Shem, Ham tawh Japheth a hiu a. (Ham chu Kanaante pa ahi’n).

¹⁹Ziate pathum chu Noah chapate a hiu ah. Ziate ah kipat chun khawvel pumpi dâp suak mihingte hi hung pawtdok a hiu a.

²⁰Noah chu lou bawl masa pen ahi’n, grep a chîng masa pen a;

²¹Grep tui chu a dawn ah, a hung kham ta’n; chuleh, a puan In sung ah chun nîk leh puan don lo in a ipmu tai.

²²Chun, Ham, Kanaante pa chun a pa lum sual chu a mu’n, paw lam ah um, a suapi pawsal panite kiang ah chun a vahil a.

²³Chutichun, Shem leh Japheth chun puan a lau ah, a khut ua jawn kawm ah kinungtawl in a chiau ah, a pau lum sual chu a vakhu tau ah; a mai uh langkhat lam nga zing a hiziak un, a pau lum sual chu a mu puau hi.

²⁴Chun, Noah chu a khamna kipat a hung pil phat ah chun a chapa neupen in a la bawl phat dan chu a hun he ta’n; a kiang ah chun:

²⁵“Kanaan chu hânsialaw in um hen la, a suapite suak niam penin um hen,” a ti’n.

²⁶Chuleh, “Shem chu LALPA Pathian in, maljawl hen la, Kanaan chu a suak in um ta hen.

²⁷Pathian in Japheth chu hi’lian hen la, Shem puanbûk ah chun um hen la; Kanaan chu a suak in um ta hen,” a hun ti tai.

²⁸Tui lêt nung ah chun Noah chu kum za thum leh sawmnga a dam nalai hi.

²⁹Tichun, Noah dam sung chu kum za kua leh sawmnga ahi’n, chun a thi tai.