Read Vaiphei 2 SAMUEL 10 Bible Online

2 SAMUEL 10 - Vaiphei bible

2 SAMUEL 10

¹Hun bang chan a hem zaw ah chun, Ammonte lengpa a thi ziakin a chapa Hanun in a go a lua a.

²David chun, “Nahash ka chung ah a ginum gual in keile a chapa Hanun chung ah ka ginum ding ahi,” a tia. Tichun, David in a pa thi chu gâl dingin palai a sawl a. David palai sawlte chu Ammonte gam a tun phat un,

³Ammonte lak ah miliante chun a lalpau kiang in, “David in la pa a ja man ah a gâl ding ah mi a hun sawl hiding in la gingcha tak tak na em? David in palai a hun sawlte hi khawpi lâk ding dan ngaitua ah entha ding ah a hun sawl hi zaw lo a hem?” a tiu a.

⁴Tichun, Hanun in David palai sawlte chu a man ah, a khamul uh a kimkhat a mêtthâk piak ah, a puanâk chual uh a kimkhat ah ât tan piak in, a sawl mang kit a;

⁵Zia thu chu David a hil phat un, amau chu zakcha ma ma a hiziak un, amau lamtua dingin mi a sawl a. Lengpa chun, “La khamul uh a sau kit masia Jeriko khua’n um tadiu in la, ziazaw chuleh hung kit na’n lau,” a ti tai.

⁶Ammonte chun a chung un David a lungdam puai ti a het phat un, Ammonte chun Beth-rehob leh Zobah ah Aramte keng sepai sîng ni tawh, Maakah lengpa sepai sang khat tawh, Tob mite sepai sîng khat leh sang ni a chial tau a.

⁷Zia thu chu David in a het phat in, Joab tawh a sepai hangsan zosia chu a sawl tai.

⁸Ammonte chu a hung kuan un, a khawpiu kotkhak bul in a chângpang tau ah; Zobah leh Rehab ah Aramte chu, Tob tawh Maakah mite chu tawh gamlak in a pang tau hi.

⁹Joab in a ma lam leh a nung lam ua hun ûmtua dingte chu a mu phât in, Israelte lak ah hat diakte chu Aramte do dingin a sepdok a;

¹⁰a sepaite lak ah a dang cheng chu, a suapipa Abishai mapuina’n Ammonte do dingin a guatdok a.

¹¹A kiang un, “Aramte chu a hung hat zawk ua leh ei hung panpiu in la, Ammonte chu a hat zawk ua leh, hung ing ka tiu in, hung panpi ing ka tin.

¹²I mipiteu leh I Pathian uh khawpi hûkna dingin hangsan tak leh tawmngai tak in pang hitiu; LALPA‘n pha asak dan dan in hun bawl ta’n ah,” ti’n a gen a.

¹³Tichun, Joab tawh a kiang ah um zosia chu Aramte do dingin a kuan un; chuleh, a naw jam tau hi.

¹⁴Ammonte chun Aramte a jam tau ti a mu phât un, amau le Abishai lawi chu ki’chan a jam ua, khawpi sung in a tailut tau ah. Ziaphatchun, Joab in Ammonte zo in, Jerusalem lam in a hung kit tai.

¹⁵Aramte chun Israelte a zaw lo dan uh a het phat un a kiko khawm tau a.

¹⁶Hadadezer in Euphrates luipi gâl lam ah Aramte puidok dingin mi a sawl ah; tichun, Hadadezer sepaite hotu pen Shobakh chu tawh a leng un Helam khua a hung tung tau.

¹⁷Zia thu chu David a hil phat un, Israel sepaite zosia a ko khawm ah, Jordan lui gâl kâi in, Helam khua tiang in a chiau a. Aramte chu David do ding ah a la kiguanggal in, a kido tau hi.

¹⁸Israelte chun Aramte chu a del jak tau a; David in Aramte sakol kângtalai sepai hon za sagi tawh, sakol sepai sîng li a that ah; chuleh, a sepai hotu pen uh Shobakh chule a liam ah, zia mun chun a thi den tai.

¹⁹Hadadezer thunuai ah um leng zosia’n, Israelte’n a zawu ahi tai ti a kihiat phat un, Israelte tawh kilemna a hung siam ua, a suak in a pang tau hi. Tichun, Aramte chun Ammonte chu a panpi ngam ta puau hi.