Read Vaiphei 2 SAMUEL 13 Bible Online

2 SAMUEL 13 - Vaiphei bible

2 SAMUEL 13

¹Hun bang chan a hem nung in, David chapa Absalom in suapi nungak mêlpha tak pakhat a nei ah, a min chu Tamar ahi. Chuleh, David chapa Amnon in ama chu a dawicha ta’n.

²Nungak thiangtho ahi’n, bangma a law theilo ziakin Amnon in a suapinu a ngaina lam in a kidamlosak tai.

³Ahi’n, Amnon in gualpha pakhat a nei ah, a min chu Jonadab, David suapipa Shimeah chapa ahi; ama chu mi dawhathûk tak ahi.

⁴Ama chun a kiang in, “Bang ding ah nang lengpa chapa hi’ngal ah, a ni’ ni ah gawng huai huai ziang la hem? A ziak ei hil lo ding la hem?” ti’n a dong a. Amnon in a kiang in, “Ka suapipa Absalom suapinu Tamar ka dawicha ei ve!” ti’n a hil tai.

⁵Jonadab in a kiang in, “Kidamlosak inla, lupna’n lum den in la, la pa chu nang ve ah a hung tak leh a kiang in, ‘Ka suapinu Tamar hung hen la ka nêk ding ei hung pia hen; ka umna mun a hin ka nêk ding ei siam piak hen la, ka mu’na ngei ah a siam chu ama khut ah kipat in ne’ng ka,’ ti’n a la gen lechin,” ti’n a hil tai.

⁶Tichun, Amnon chu kidamlosak in, a lum den ta’n; chuleh, lengpa chu a ve ah a hung phatin, Amnon in lengpa kiang ah chun, “Lungsiat tak in ka suapinu Tamar hung hen la, a khutsuak ka nêktheina dingin ka mit mu ngei ah hin vaithum pêk ni ei hung bawl piak leh ka nuam hi,” ti’n a la gen tai.

⁷Tichun, David in Tamar chu a In ah a ko ah, a kiang in, “La suapipa Amnon In ah vachia inla, a nêk ding an vasiam piak in,” ti’n a sawl a.

⁸Tichun, Tamar chu a suapipa Amnon In lam ah chun a chia ah, ama chu a la lum zing ah. Amanu chun changbuang a la, a mêk ah, a mit mu ngei ah chun vaithum a bawl piak tai.

⁹Amanu chun kuang ah koi in a âng ah chun a lui piak ah; himaleh, Amnon chun a ne nuam diak pua’n. Amnon in, “Mi zosia sawldok sik sek in,” a tia. Tichun, mi zosia’n a pawtsan tau a.

¹⁰Ziaphatchun, Amnon in Tamar kiang in, “An chu ka pindan sung lam ah hun dom lut inla, nangma khut ngei ah ne tiam ing ka,” a tia. Tichun, Tamar chun a vaithum bawlte chu a suapipa Amnon pindan sung lam ah chun a domlut ta’n.

¹¹Himaleh, a nêk ding a hun chawi nai phatin, ama chun a la man ta mai ah; chuleh, a kiang in, “Ka suapinu, hung inla, ka kiang ah hin hung lum in,” a la ti tai.

¹²Amanu chun, “Ka suapipa, hilo e, ei pawngbawl kin; zia tawhbang hi Israelte lak ah bawl ngai ahi puai; zia gual khop ah thil ngolhuai hi bawl him him kin!

¹³Zia gual ah mualphona chu khoi tak ah vâkdawpi ding ka hi tam? Nang le Israelte lak ah mi chavaite lak ah khat hung hiding la hi. Zia sâng ah chun, lengpa kiang ah genzaw tiam in; nang tawh ka kichen ding chu phal ding ahi ngal in,” a tia.

¹⁴Himaleh, a thugen chu a ngaisak nuam pua’n; ama sâng ah thagum hatzaw ahi ziakin a pawngbawl ah, a luppi tai.

¹⁵Ziaphatchun, Amnon in ama chu a hun muda ma ma ziang ta’n; a dawichâkna sâng ah khan a huatna chu a hung nasa zaw diak ta ahi.

¹⁶Himaleh, amanu chun, “Ka suapipa, ahi puai; lei sawl mang guatna hi la gitlona sâng ah khawk zaw ahi,” a tia. Himaleh, a thugen chu a ngaisak nuam puai.

¹⁷Amnon in a suak tangval chu a ko ah, a kiang in, “Zia numei hi ka kiang ah kipat kaidok inla, kot kam in,” a tia.

¹⁸(Amanu chu puanâk chual bânsau ah kithuam ahi’n; zia hun lai ah lengpa chanu, nungak thiangthote chu zia gual ah chu kithuam sek him a hiu ah.) Tichun, a suakpa chun a kaidok ah, a nung in kotkhak chu a kam tai.

¹⁹Himaleh, Tamar chun a puanâk chual chu a botthêk ah, leivui kibuak khum in, a lujang ah a khut kiltua in a chia mang ta’n, a chia kawm in ngai tak in a kap jak tai.

²⁰A suapipa Absalom chun a kiang in, “La suapipa Amnon in hun sumualpho ahi maw? Ka suapinu, tu’hin thip hiat hiat phot in; ama chu la suapipa ahi ngal in, khawksak dâ mai in,” ti’n a gen a. Tichun, Tamar chu a suapipa Absalom In ah chun kuama tawh kipawl lo in a kikulkhup tai.

²¹Lengpa David in zia thu zosia chu a het phat in a lungna ma ma ah; himaleh, a chapa Amnon chu a chapa upa pen a hepi ma ma ziak in a gawt nuam puai.

²²Himaleh, Amnon in Absalom suapinu Tamar a pawngsual ziak ah chun, Absalom in Amnon chu a haw ma ma ziang ah, a kiang in a sia hin, a pha hileh bangma a gen puai.

²³Kum ni nung in Ephraim kiang ah Baal-hazor ah chun Absalom in belam mulmêtna a nei ah, zia tak ah pang ding ah chun lengpa chapate zosia le a chial a.

²⁴Absalom chu lengpa kiang in a hung ah, a kiang in, “La suakpa hin belam mul ka mêtsak in; lengpa leh a suakte zosia’n la suakpa hi ei hung zui lo ding la hiu em?” ti’n a gen a.

²⁵Himaleh, lengpa chun Absalom kiang in, “Ahipuai, ka chapa, I leng un chia puai tiu, nang â ding ah buai um hizaw kha’n a,” a tia. Chial tei tei maleh, a chia nuam diak lo phatin a maljawl tai.

²⁶Ziaphatchun, Absalom in, “La hung lo ding leh ka suapipa Amnon bêk hung hen,” a tia. Lengpa chun, “Bang ding ah Amnon hung diak ding a hem?” ti’n a dong a.

²⁷Himaleh, Absalom in Amnon leh lengpa chapate zosia’n a zui masangsiau chu a chial a. Tichun, lengte luaithena gual in Absalom in luaithe’na thupi tak a siam tai.

²⁸Ziaphatchun, Absalom in a suakte chu thu a pia’n, “Amnon zukham ah lim tak ah a hung um hun chu a la entha zing unla; chuleh, keima’n la kiang ua, ‘Amnon chu sat un,’ ka hun ti phat leh ama chu la tha ziang diu ahi. Lau kiu in; keima thu hun piak hilo a hem? Hang tak leh kipawsalsak tak in um un,” a tia.

²⁹Tichun, Absalom suakte chun, Absalom thupiak gual ah chun Amnon chung in a bawl tau a. Ziaphatchun, lengpa chate zosia chu a kipan ua, a sabiltung chung ua chuang in a tai mang zo tau hi.

³⁰Chutia, In lam del ah a tai zing lai ua chun, David kiang in, “Absalom in lengpa chate khat le hawi lo in a that gam tai,” ti thu a la tung man a.

³¹Lengpa chu a dingdok ah, a puan a botthêk ah, lei tual ah chun a kizam ta’n; chuleh, a kiang ah ding a suakte zosia chunle a puan uh a botthêk chiat tau hi.

³²Himaleh, David suapi Shimeah chapa Jonadab chun, “Ka lalpa chun lengpa chapa tangvalte a that gam tau ti ziang ki’hen; Amnon bep a thalup ahi. Absalom in a suapinu Tamar kha, Amnon in a pawng sual ah kipat khan; Absalom in zia thil hi a la tup ahi tai.

³³Ziaziakchun, tu’hin, lengpa, ka lalpa chun lengpa chate zosia thi gual ah ngai in, a la lungkham him him kin; Amnon bep chu ahi ngal in,” ti’n a hun gen tai.

³⁴Absalom ahileh vang a jam mang tai. Gâlvêng ah pang tangval chu a vak datdaw leh, mipi tam tak tângpang ah Horonaim lampi lam ah kipat hungte chu a vak mu ta’n.

³⁵Jonadab in lengpa kiang in, “En in, lengpa chate zosia chu la suakpa’n a gen gual gual in a hung tau saw lam,” a tia.

³⁶Zia thu chu a gen zaw zaw in lengpa chate chu a hung tung un, aw ngai tak in a kap tau ah; chuleh, lengpa tawh a sepaite zosia chule ha-kâ in a kap tau hi.

³⁷Absalom ahileh vang, Geshur lengpa Ammihud chapa Talmai kiang in a jam ah. David in a chapa chu nisi’n in a sûn tai.

³⁸Absalom chu Geshur ah jam in, kum thum a vaum tai.

³⁹Chun, David in Amnon thi a sûnna a lungdam tâk ziakin, a chapa Absalom ngai in a lunghel ma ma hi.