Read Vaiphei 2 SAMUEL 14 Bible Online

2 SAMUEL 14 - Vaiphei bible

2 SAMUEL 14

¹Zia hun ah chun, Zeruiah chapa Joab in, lengpa chun Absalom a ngai ma ma ziang hi ti a hun he ta’n.

²Tekoa khua numei pil tak pakhat vako dingin Joab in mi a sawl a. Zia nu kiang ah chun, “Lusûn gual in kisiam in la, lusûnna puan ah kithuam in sathaule kinu’ lo in, hun sawt tak mithi sûn ta gual in kisiam in.

³Lengpa kiang ah vachia inla, a kiang in zia gual hin vagen in,” ti’n a hil a. Tichun, Joab in a thugen dingte chu a hil tai.

⁴Tekoa numei chu lengpa kiang a hung tun phatin, a maichang ah leitual sihial ah jâna pia’n chibai a bûk ah; lengpa kiang ah chun, “Aw lengpa, ei panpi in!” a tia.

⁵Lengpa chun a kiang in, “Bang a hem la buaina chu?” ti’n a dong a. Amanu chun, “A khawk ngei! Ka pawsal a thi tâk ziakin meithâi ka hi tai!

⁶La suaknu hin chapa pani a nei in, amau chu lou lam ah a kisual un; a phel ding kuama a um lo ziakin pakhat chun pakhat zawk chu a that ta mai a.

⁷Ka chanaute zosia’n ei lang bawl chiat tau a. Amau chun, ‘A suapipa thatpa chu ei pedok in, a golua ding zaw hiziang leh le a thi ding ahi,’ a tiu in. Tichun, ka kinepna um sun chule thâlup ah, ka pawsal min leh a suan a pâkte chule, lei chung ah sukmangthai a gaw tau hi,” ti’n a gen tai.

⁸Lengpa chun zia numei kiang ah chun, “La In lam in chia in, la chung thu ah hin thupiak hun bawl ding ka hi,” ti’n a gen a.

⁹Tekoa numei chun lengpa kiang in, “Ka lalpa, lengpa, keima leh ka Inkuan in zia chung thu hi mawpaw mai ing ka tiu in, lengpa leh a lalchutpha chu thiammaw chang kiu hen,” ti’n a gen a.

¹⁰Lengpa chun, “Kuale la kiang ah zia thu gen kit taphot chu ka kiang ah hun pui ziang in, bangma hung law kit talo ding ahi,” a tia.

¹¹Amanu chun, “Lungsiat tak in, lengpa chun thisan phuba lakgawte chun bangma lawsak lo dingin LALPA la Pathian chu hezing inla, chuleh, ka chapa chule that kiu hen,” ti’n a don a. Lengpa chun, “LALPA min in ka kihaksial hi, la chapa samzang khat ziang le lei tual in ketha pua’n a,” ti’n a dawnhu tai.

¹²Ziaphatchun, numei chun, “Ka lalpa, lengpa kiang ah hin lungsiat tak in la suak hi kam khat bêk ei gen sak nalai in,” ti’n a don ah. Ama chun, “Gen ta’n la,” a tia.

¹³Numei chun, “Bang ding ah nang in Pathian mite chung ah zia gual ah chu bawl gua la hi em? Lengpa’n a mi nawmangsa a In ah a hung kitsak nop lo leh zia thu la gendaw chun thiamlo a hun chan tai.

¹⁴I leng un thizo ding I hitau hi; luak kit thei tâk lo ding ah, leitual ah tui kibua tawhbang I hitau hi. Himaleh, Pathian in vang hinna khat châle lamang lo ding ahi; nawdaw ah um chu a kum a khua’n a um den saklona dingin, lampi hun gual tuak piak ding ahi.

¹⁵Tu’hin, mite’n ei suklau ziak un, zia thu hi lengpa, ka lalpa kiang ah gen ding ah hung kuan ka hi; la suak hin, ‘Lengpa kiang ah vagen ing ka, lengpa chun a suak thil dotna gual ah a hun bawl khâk leh.

¹⁶Lengpa chun, ka thugen hi ngaitha’n, a suak hi a chapa, Pathian ah kipat a golua ding uh lâkpiak ah thâlup gawte khut ah kipat a hukdaw thei khâk leh,’ ka ti ziak ahi.

¹⁷La suak hin, ‘Lengpa, ka lalpa kamsuak ziakin chawldam ing ka,’ ti ka ngaitua ziak ahi; lengpa, ka lalpa chule Pathian vansawlchâk gual ah a pha leh a sia khendan thei ahi ngal a. LALPA la Pathian in hun umpi zing ta hen!” a ti tai.

¹⁸Ziaphatchun, lengpa chun numei kiang ah chun, “La kiang ah ka hun dot taphot chu îm la nei lo ding ahi,” a tia. Numei chunle, “Ka lalpa, lengpa chun hun gen ta’n la,” ti’n a dawnhu a.

¹⁹Lengpa chun, “Zia thu ah hin Joab a pang kha em?” ti’n a dong a. Numeinu chun, “Lalpa, lengpa min sâl in ka gen hi: Ka lalpa, lengpa thugen ah kipat in kuama veilam a hem, changlam a hem in a pêtmang thei puau hi. La kiang ah zia thu zosia hi la suak in ka hung gen theina dingin, la suak Joab chun thu ei pia’n, ei sawl ka hi.

²⁰La thilbawl dan la thentheina dingin Joab in zia gual hin a bawl ahi. Himaleh, ka lalpa hin lei chung ah thil um zosia hethei dingin, Pathian vansawlchâk gual ah pil la hi’ngal ah,” ti’n a dawnhu tai.

²¹Ziaphatchun, lengpa chun, Joab kiang in, “A pha ma ma hi, la dotna chu ka hun lawtinsak tai; chia inla, tangval Absalom chu vapui kit ta’n,” ti’n a gen a.

²²Joab in lengpa ja’na leh malzawlna pia’n, a maichang ah leitual si’n chibai a bûk ah; chuleh, Joab in a kiang ah chun, “Tu’ni hin la suak dotna lengpa’n lei lawtinsak tak ziakin, lengpa, ka lalpa hin la suak hi ei doisak la hi ti ka he tai,” ti’n a dawnhu a.

²³Tichun, Joab chu a kipandok ah, Geshur ah a vachia ah, Absalom chu Jerusalem lam in a hun pui kit tai.

²⁴Lengpa chun, “Ama In lam in chia hen la; ka kiang ah vang hung ki’hen,” ti’n a gen a. Tichun, Absalom chu ama In ah a chia ah, lengpa kiang in vang a hung kilâk puai.

²⁵Zia lai ah chun, mêlphat lam ah gen phat dingin Israelte zosia lak in Absalom gual khop ah mêlpha a um puau ah; a kengpek ah kipat a lujang tiang ah demna ding neuchâle umlo ahi.

²⁶A lujang sam a mêt phat leh, (a giksak hial phat leh, kum khat sung ah khatvei a mêt thâk sek ahi’n) a gik dan chu a teu leh, lengpa thilgik te’na dan ah chun shekel za ni a ting sek hi.

²⁷Absalom in chapa pathum leh chanu pakhat a nei ah, a min chu Tamar ahi. Ama chu numei mêlpha tak ahi.

²⁸Tichun, Absalom chu Jerusalem ah lengpa mêl mu lo in kum ni ving veng a um ta’n.

²⁹Ziaphatchun, lengpa kiang ah chia ding ah Joab sawl gua’n a ko dingin mi a sawl ah; himaleh, Joab chu a hung nuam pua’n; a niveina’nle a sawl kit ah, a hung diak puai.

³⁰Ziaphatchun, a suakte kiang in, “En tiam u, Joab lou hi kei bân tak in a um ah, zia tak ah chun barli bu a chîng in; chiau inla, mei in vahâl un,” ti’n a sawl a. Tichun, Absalom suakte chun a lou chu mei in a vahâl tau a.

³¹Ziaphatchun, Joab a kipan ah, Absalom In ah a chia ah, a kiang in, “Bang ding ah la suakte’n ka lou ei hâl tum piak ziang a hiu em?” a tia.

³²Absalom in Joab kiang ah chun, “En in, la kiang ah, ‘Hung inla, lengpa kiang ah, Geshur ah kipat bang ding ah hung ka hi em? Zia tak ah chun hung um den mai leng kei â dingin phazaw ding hive’n,’ ti’n ei vagen piak lechin ka tia. Tu’hin lengpa kiang ah ei chiasak inla, mawna nei ka hileh ei that mai hen,” ti’n a gen a.

³³Ziaphatchun, Joab chu lengpa kiang in a chia ah, a vahil ta’n; chuleh, Absalom chu a ko tai. Tichun, lengpa kiang in a chia ah, lengpa âng ah leitual in a bokkhup ah, lengpa chunle Absalom chu a chawp tai.