Read Vaiphei 2 SAMUEL 18 Bible Online

2 SAMUEL 18 - Vaiphei bible

2 SAMUEL 18

¹Ziaphatchun, David in a kiang ah sepai um zosia chu a kai khawm ah, sang khat chung ah hotu dingte leh za khat chung ah hotu dingte a guat a.

²Chuleh, David in a sepaite chu hon thum in a khen ah: hon khat chu Joab nuai in a koi ah, hon khat kit chu Zeruiah chapa, Joab suapipa Abishai nuai in a umsak ah. Hon thumna chu Git mi Ittai nuai in a koi hi. Lengpa’n a sepaite kiang ah chun, “Keima le la lak un pang zing tho ding ka hi,” ti’n a hil tai.

³Himaleh, sepaite chun, “Nang vang la hung kuandaw lo ding ahi. Jamsiatna bang um taleh, keimau hi ei ngaisak pua’n tiu in; a kimkhat hial hi thi leng unle bangma’n ei ngai lo ding a hiu hi. Himaleh, nang chu kei haw sîng khat sâng ah le lul zaw la hiziak in, khawpi ah kipat in ei panpi ding hun sawl lechin phazaw ding ahi,” ti’n a dawnhu tau hi.

⁴Lengpa chun a kiang un, “Nanghaw’n pha pen ding ah la ti dan dan un um mai ing ka,” ti’n a dawnhu a. Tichun, sepaite chu a za têl leh a sangtêl têl ah a kijawtdaw zung zung lai un, lengpa chu khawpi kul kotkhak bul ah chun a ding zing hi.

⁵Lengpa chun, Joab tawh, Abishai tawh Ittai kiang ah chun, “Keima ziakin tangval Absalom kha hun daidawp un aw,” ti’n a gen a. Absalom chung thu ah sepai hotute kiang ah a thu vaithâk chu sepaite zosia’nle a hiau hi.

⁶Tichun, sepaite chu Israelte do dingin gamlak ah chun a kuandok tau a; Ephraim gammâng lak ah chun a kido tau hi.

⁷Zia tak ah chun, Israelte chu David sepaite chun a zo tau ah, zia ni’ chun mi a that tam ma mau ah, sepai sîng ni hial a that tau a.

⁸Kido’na chun gam sung pumpi chu a lua ziang ta’n; chuleh, zia ni chun chemjam ah thi sâng in gamman ziak ah thi a tam zaw hial ui.

⁹Absalom leh David sepaite chu a hung kisitua phut ta mai ua. Absalom chu sabiltung ah chuang ahi’n; a sabiltung chu gangpi thingbuk lian tak nuai in a tai lut a. Gangpi thingbuk lak ah a sam a ki-awk phatin, ama chu chung sulo nuai sulo in a kikhâiden ta mai ah; a chuanna sabiltung chu a tai theng tai.

¹⁰Mi pakhat in ama chu a vamu ta’n, Joab kiang in, “Absalom kha gangpi thing ah kikhâi in ka vamu ve,” ti’n a vahil ta’n.

¹¹Joab chun a hung hil pa kiang ah chun, “La mu tak tak maw! Bang ding ah that ziang lo la hem? That hilechin dangka shekel sawm leh kawnggâk pakhat kipak tak ah hun pia mai ding hiveng,” ti’n a dawnhu tai.

¹²Himaleh, zia mipa chun Joab kiang in, dangka shekel sang khat ka khut ah piaksa hiziang leh le, lengpa chapa that dingin vang ka khut lâm pua’ng ka; lengpa’n nang leh Abishai leh Ittai kiangah: keima jal in tangval Absalom kha hun hawi un, ti ah thu a hun piak kha ka la he ngal in!

¹³A doidan kãl zawng tak ah chun a la bawl hita mawng lengle (lengpa het lo bangma a umlo ziakin,) nang in ei kilepsan ziang ding la hi’n, ti’n a dawnhu a.

¹⁴Joab in, “Nang kiang ah um hi hun a pâmmai bep hi,” a tia. Cheicha pathum a lakhawm ah, gangpi thing ah kikhâi zing ah dam nalai Absalom chu a lungchang jawn a sut piak tai.

¹⁵Joab galvan chawite tangval sawmkhat in Absalom chu a ûm un, a dawt chiat un, a that tau hi.

¹⁶Ziaphatchun, Joab in pengkul a hun mût ah, Joab in a sepaite a kokit tâk ziakin, a sepaite chun Israelte chu delzui talo in a hung kilekit tau.

¹⁷Absalom luang chu a lau ah, gammâng ah kawkhûk thûk tak khat in a pai lut ua, suang tam tak a siakhum tau a. Zia hun sung ah chun Israelte zosia chu amau In lam chiat in a chia kit zo tau hi.

¹⁸Absalom chun a damlai ah khan, Lengpa Phâicham ah chun suang a la kiphu ah, ama chun, “Ka min hetzingna dingin chapa ka nei pua’n,” a ti ziakin ama min het zingna ding ah a la phu ahi. Tu’ni tiang ah hin zia chu Absalom Hetzingna Suang ti ahi nalai hi.

¹⁹Ziaphatchun, Zadok chapa Ahimaz in, “Lengpa kiang ah LALPA‘n a mêlmate chung ah phuba a lak dan thu hil dingin vatai ing ka,” a tia.

²⁰Joab in a kiang in, “Tu’ni hin chanchin chu la vahil lo ding a hi; tu’ni hin lengpa chapa thi ahi ziakin, la vahil lo ding ahi; nidang leh vahil na’n la,” ti’n a dawnhu a.

²¹Ziaphatchun, Joab in Kush mi kiang ah chun, “Chia inla, la thil mu gual gual hi lengpa vahil in,” a tia. Kush mi chun Joab chu salâm a pia’n a tai veng veng tai.

²²Ziaphatchun, Zadok chapa Ahimaz chunle Joab kiang in, “Bang thil tung ding hitaleh, Kush mi chu ke’n le delzui ing ka,” a tia. Joab chun a kiang in, “Ka chapa, zia thu ah hin kipakman bang ma mulo ding la hi ti kihe ngal in bang ding ah tai gua la hem?” a tia.

²³Ama chun, “A bang chu hitaleh, vatai ding ka hi,” a ti tei tei a. Tichun, “Vatai mai ta’n,” ti’n a dawnhu tai. Ziaphatchun, Ahimaz chu phâijang lampi’n a tai ah, Kush mi chu a taikhel tai.

²⁴Zia hun ah chun, David chu kul kotkhak pani kikâl ah a la chut lai tak ahi’n. Gâlvêngpa chu kulbâng kotpi chung lam ah a vakal to ah, a khawdat leh, amau lam hun zuan ah pawsal pakhat ama ngawn ah hung tai a vak gâl mu ta’n.

²⁵Gâlvêngpa chu a kiko ah, lengpa kiang in a hil a. Lengpa chun, “Ama ngen ahileh, chanchin gen ding khat nei hi’n a,” ti’n a dawnhu a. A hung tai pek ah, a hung tung vang vang ta’n.

²⁶Chuleh, gâlvêngpa chun mi dang pakhat a nung ah hung tai le a vak mu kit phatin, kul kotkhak vengpa chu a ko ah, “Entia, midang pakhatle ama ngen in a hung tai hi!” a tia. Lengpa chun, “Ama chule chanchin tut ding ah hung ahi chu,” ti’n a gen a.

²⁷Gâlvêngpa chun, “A hung tai masa zaw saw Zadok chapa Ahimaaz bang kasa ngei,” a tia. Lengpa chun, “Ama chu mipha ahi’n, thupha tut ding nei hiven ti,” a tia.

²⁸Ziaphatchun, Ahimaz in lengpa a hun ko ah, “Bangkim a pha to zel hi,” a tia. Lengpa âng ah chun a bokkhup ah, “Ka LALPA, lengpa chung ah khut lâmte lak ah hun hukdokpa LALPA la Pathian chu pâk in um ta hen,” a hun tia.

²⁹Lengpa chun, “Aleh, tangval Absalom kha a pha na em?” ti’n a dong a. Ahimaz in, “Joab in la suakpa ei sawl lai khan, mipi a buai veng vung un, bang thu ahi ka he man ta puai,” ti’n a dawnhu a.

³⁰Lengpa chun, “Hung kihei inla, zia hin hung dingin,” a tia. Tichun, a hung kihei ah, a hung ding a.

³¹Ziaphatchun, Kush mi chu a hung tung ah, Kush mi chun, “Lengpa, ka LALPA â ding ah thu kipak um ka hun tut hi! Nangma do ah pang zosiate khut ah kipat in LALPA‘n tu’ni hin a hun hukdok ta’ngal a,” a hun ti zui a.

³²Lengpa chun Kush mi kiang ah chun, “Aleh, tangval Absalom a pha na em?” ti’n a dong a. Kush mi chun, “Lengpa, ka LALPA siatna ding tup ah pang zosia chung in, zia tangval gual gual ah chun um chiat tau hen,” a ti tai.

³³Lengpa chu a dâ ma ma ziang ta’n; tichun, kul kotkhak chung ah pindan ah lut in, a kap ta’n; a chia kawm kawm in, “Aw, ka chapa Absalom! Nang sâng in keima thi zaw mai leng ka nuam na e! Aw Absalom, ka chapa, ka chapa!” ti’n a kap malam pek tai.