Read Vaiphei 2 SAMUEL 19 Bible Online

2 SAMUEL 19 - Vaiphei bible

2 SAMUEL 19

¹Joab kiang in, “Lengpa chu Absalom sûn in a kap kap ziang hi,” ti a hil tau a.

²Tichun, zia ni chun sepaite chun, “Lengpa chu a chapa thi ziak ah lungngai ma ma ahi,” ti a het ziak un, zia ni zaw’na chu sepai zosia â dingin lusûnna ni a hung hita mai hi.

³Sepaite chu kido’na ah guallel ziak ah zakcha tak ah kigêlmang gual in, khawpi lam in a hung kigelmang zo tau hi.

⁴Lengpa chu puan a kilukhu ah, aw ngai tak in, “Aw ka chapa Absalom, aw Absalom, ka chapa, ka chapa!” ti’n a kap chuai chuai tai.

⁵Ziaphatchun, Joab chu lengpa In ah a hung ah, a kiang in, “Tu’ni hin la sepai hotute, tu’ni tiang ah nangma hinna leh la chanute leh la chapate, la jite leh la thâikemte hinna hun hukdokte sumualpho dingin puan la kilukhu in,

⁶nang hun do-te hepi ah, nang hun hepite hua la hi maw. Tu’ni hin la sepai hotute lak ah milian leh mi lalte hi bangma ngai lo la hi dan la taklang chian ma ma hi; tu’ni hin Absalom dam hen la, kei haw zosia hi thi sik sek leng un kipak ding la hi hilam.

⁷Ziaziakchun, kin tak in pawtdok inla, la suakte zosia kiang ah hin thupha la choi ding ahi; LALPA min in ka hun tiam la hi, zia gual ah chu la chia daw lo leh vang, tu’jan ah kipat hin pakhat chale nang lam ah pang talo ding ka hiu hi; zia chu la neu ah kipat la thil tuakte zosia lak ah nang â ding ah huaisia pen hung hiding ahi,” ti’n a vagen a.

⁸Ziaphatchun, lengpa chu a thodok ah, kul kotkhak ah a chutna ngai ah chun a vakichudok ta’n. Ziaphatchun, sepaite kiang in, “En un, lengpa chu kul kotkhak bul in a kichu zing hi,” ti’n a hil tau a; tichun, sepaite chu a leng un lengpa kiang lam ah chun a hung tau a. Zia hun ah khan, Israelte zosia chu amau In lam chiat in a la chia kit zo chiat tau hi.

⁹Israel phung tin ah mipi zosia lak in kinialna a sosang ma ma ziang ta’n; amau chun, “Lengpa chun I mêlmateu khut ah kipat ei hukdok ta’n; chuleh, Philistinte khut ah kipat tu’hin ei hukdok tai; ahi’n la tu’hin, Absalom lau in a gam nusia’n a jam tai.

¹⁰Himaleh, I chung ua vaihawm ding ah I guat uh Absalom chu la kido’na’n a thi ta’n. Tu’hin, bang ziak ah lengpa ko kit ding thu gen lo ah um ziang la hiu em?” a kiti tau hi.

¹¹Lengpa David chun thiampu Zadok tawh Abiathar kiang in zia thu hi a vagen sak ah: “Judai gam ah upate kiang in zia hi vagen un, ‘Bang ding ah lengpa a In ah pui kit gawte lak ah a nunung pen hi gua la hiu em? Israelte zosia holimna chu lengpa’n a he suak ta’ngâl in.

¹²Ka chanaute la hiu ah, ka gu leh phe chanpite ma ma la hi’ngâl un; bang ding ah lengpa pui kit ding gawte lak ah a nunung pen ah pang la hiu em?’ ti in.

¹³Chuleh, Amasa kiang inle, ‘nang hile ka chanau kinaipi hilo la hem? Tu’ kipat hin, Joab thasâng ah ka sepaite hotu lianpen ah ka hun pansak lo ngei ngei leh, Pathian in a nop nop ei law mai zaw hen,’ vatiu in,” ti’n a sawl a.

¹⁴Amasa chun Judah mite zosia lungthim chu pum khat ah luangkhawm dingin a la thembi ta’n; tichun, lengpa kiang in thu a tut un, “Hung kit ta’n, nang tawh, la suakte zosia tawh hung kit tau in,” a tiu a.

¹⁵Tichun, lengpa chu a hung kit ta’n, Jordan lui a hung tung ah; chuleh, Judah mite chu lengpa tuak ding leh Jordan lui pui gâl kâi dingin Gilgal ah a hung tau hi.

¹⁶Lengpa David tuak dingin, Bahurim ah kipat in Benjamin phung ah mi, Gera chapa Shimei chu Judah mipite tawh kiton in a hung suk tau a;

¹⁷amau chu Benjamin phung ah mi sang khat inle a hun zui un. Chun, Saul Inkuante suakpa Ziba chunle a chapa sawm leh nga tawh a suakte mi sawmni hun pui in, lengpa masang ah Jordan lui a la tung masa dingin a hun del suk un;

¹⁸lengpa lung lam lam a bawltheina ding un, lengpa Inkuante pui gâlkâi dingin a chiau ah; lengpa chu Jordan lui a hung gâl kâi ding kuan in, Gera chapa Shimei chu lengpa âng in a hung bokkhup a;

¹⁹lengpa kiang ah chun, “Ka lalpa, lengpa hin Jerusalem la pawtsan ni’ la suakpa’n ka la bawlkhial dante kha hezing ah, ei mawsak lo dingin ka lalpa hi ka hun ni la hi; zia chu lengpa hin tepte zing ta ki’hen.

²⁰Keima la suakpa hin ka bawlkhial dan tak ka he ta’ngâl in; ziaziakchun, ngai in, tu’ni hin la kiang ah Benjamin Inkuante lak ah kipat nangma lengpa, ka lalpa tuak ding ah hung masa pen ka hi,” ti’n a gen a.

²¹Zeruiah chapa Abishai in a dawnhu ah, “Shimei hin LALPA sathaunu’ a la hosiat tâk ziakin, thalup mai ding hilo a hem?” a hun tia.

²²Himaleh, David chun, “Nanghaw Zeruiah chate haw, bang kisakla’na la hiu em; tu’ni hin ka mêlma pan gua la hiu em? Tu’ni hin Israelte lak ah mi pakhat bêk thalup ding ahi ka tia hem? Tu’ni hin Israelte chung ah leng ka hi tai ti kihet lo eisa la hiu em?” ti’n a dawnhu a.

²³Lengpa chun Shimei kiang in, “Thi lo ding la hi,” ti’n a gen a. Chun, lengpa chun that lo dingin thu a tiam tai.

²⁴Saul tupa Mephibosheth chu lengpa dawn dingin a hung suk a; ama chun lengpa a la sun ma ma ziak in, lengpa a pawt daw ah kipat dam tak ah a hung kile’kit masangsia, a keng sil lo, a khamul met lo leh a puante le sawp lo in a la um a.

²⁵Jerusalem ah kipat lengpa dawn ding ah a hung phatin, lengpa chun a kiang in, “Mephibosheth, bang ding ah ei hun zui lo la hem?” ti’n a dong a.

²⁶Ama chun, “Aw lengpa, ka lalpa, la suakpa hi kengbai ahi ziakin, ka suakpa kiang ah, ‘Sabiltung ah ei chuansak inla, lengpa chu zui ing ka,’ ka tileh, ka suakpa’n ei thêm in.

²⁷Ama’n la suakpa hi lengpa kiang in ei la heksia Himaleh, lengpa, ka lalpa hivang Pathian vansawlchâk tawh bang ah pil la hi ngâl a; ziaziakchun, pha lasak dan dan in bawl mai in.

²⁸Ka Insung mite hivang lengpa, ka lalpa âng ah a thisa ka hi mai ui; ahi’n la, la suakpa hi nang in la dawkan ah annete lak in lei pansak ah. Lengpa kiang ah bang dang dotbe nalai ding ka hem?” a tia.

²⁹Lengpa chun, a kiang in, “Bang ding ah la chungchâng thu gen nalai ding I hiu em? Nang leh Ziba hi gam chu kihawm ziang un ti’n thupukna ka siam tai,” ti’n a dawnhu a.

³⁰Mephibosheth in lengpa kiang ah chun, “Lengpa, ka lalpa dam tak in la hung tung kit ta’ngâl hen, a leng in ama chang ziang hen,” ti’n a dawnhu tai.

³¹Ziaphatchun, Rogehim ah kipat in Gilead mi Barzillai chu a hung suk ah; Jordan gâl lam ah lengpa pui gâl kâi ah Jordan gâl lam ah a la kitonpi a hi’n.

³²Barzillai chu teksia, kum sawmgiat ah upa ahi tai. Ama chu mi hausa tak a hiziak in, lengpa Mahanaim ah a um lai ah nêk ding a la pia ahi.

³³Barzillai kiang in lengpa’n, “Ka kiang ah hung gâl kâi inla, Jerusalem ah hin ka kiang ah um inla, hun vâk ing ka,” a tia.

³⁴Himaleh, Barzillai in lengpa kiang ah chun, “Jerusalem ah lengpa kiang lam ah chun hung lengle, kum bang zat tak dam nalai ding ka hem?

³⁵Tu’hin kum sawmgiat ka hita’n; a nuam leh nuam lo le ka hekhen ta pua hilam. La suak hin a nêk leh dawn haw hile a tuina hekhen thei nalai lei sak a hem? Pawsalte leh numeite La sak haw chule ngai thatnopna nei talo kei ve! Bang ding ah la suak hin, lengpa puakgik ding bep ah ka lalpa hi subuai nalai ding ka hem?

³⁶La suak hin lengpa hi Jordan lui gâl chan hung zui to ham ham ing ka. Lengpa’n ka sep phat man ah kipakman lei piak khel khel ka ngêk dang em?

³⁷Lungsiat tak in la suak hi ei kile’kitsak ziang in la, ka khuau ah, ka nu leh pa thân kiang ah hin hung thi mai zaw’ng ka. Ahi’n, zia tak ah um la suak Chimham hi, ama hin ka lalpa, lengpa hun zui hen la; pha lasak dan dan in ama chung in bawl zaw mai ta’n,” a ti tai.

³⁸Lengpa chun a dawnhu ah, “Chimham in ei hun zui theng hen la, nang a ding ah pha ka sak gual tak in ama chung in a la bawl mai ing ka; ka hun bawl piak ding ah la dawi taphot chu hun bawl piak ding ka hi,” a tia.

³⁹Ziaphatchun, mipi zosia chun Jordan lui a gâl kâi tau ah, lengpa chule a gâl kâi tai; lengpa chun Barzillai chu a chawp ah, vangphatna a pia’n; tichun, a In lam in a kile’kit tai.

⁴⁰Lengpa chu Gilgal lam zuan in a chia pek ah, Chimham inle a zui pek ah; Judai mipi zosia tawh Israel mipi a kimkhat chun lengpa chu a hun pui pek tau hi.

⁴¹Ziaphatchun, Israel mipi zosia chu lengpa kiang in a hung un, a kiang in, “Bang ding ah ka unauteu Judai gam ah mite hin hun kineisak chuam ah, lengpa leh a Inkuante zosia Jordan lui gâl lam ah pui kai in, David nungjuite zosia le pui mang chuam a hiu em?” a hung tiu a.

⁴²Judah mipite zosia chun Israel mipite kiang in, “Lengpa hi ka chanau kinaipiu ahi. Zia thu ah hin bang ding ah lungna la hiu em? Lengpa neisa bang ka neu ah a hem? Ama’nle bang ei pia chuam sâm ah a hem?” a tiu a.

⁴³Himaleh, Israel mipite chun Judah mipite chu a dawnhuu a, “David ah hin nanghaw sâng ah chan nei tam zaw ah, chan sawm hial nei ka hiu hi. Bang ding ah ei simmaw la hiu em? Lengpa puikitna ding thu ah le a vaisawm masa hilo ka hiu em?” a tiu a. Himaleh, Judai gam ah mipite chu Israel mipite sâng in a kam hat zawu hi.