Read Vaiphei 2 SAMUEL 20 Bible Online

2 SAMUEL 20 - Vaiphei bible

2 SAMUEL 20

¹Zia lai chun, Benjamin phung ah mi Bikhri chapa, mi dukdak lo Sheba kiti hi a um in. Ama chun pengkul a mut ah, zia gual hin tâng a sam ta’n: “David ah hin bangma chan I nei puau hi, Jesse chapa ah hin chanvo I nei puau hi! Aw Israelte haw, la puan In lam chiat un chia tau in!” ti’n tâng a sam tai.

²Tichun, Israel mipi zosia’n David nusia’n Sheba chu a zui tau a; himaleh, Judah mipite chun a lengpau chu Jordan lui ah kipat Jerusalem tiang in ginum tak in a zui pek tau hi.

³David chu Jerusalem ah a In a hung tung ta’n; chuleh, lengpa’n a In enkol ding ah a nutsia a thâikem sawmkhatte chu a ko khawm ah, pha tak ah veng bit in In khat ah a chên khawmsak ah, a nêk leh dawn ding uh bangkim a pia’n; maleh, a kiang un vang a valut ta puai. Tichun, meithâi gual in a thi tiang un a khumbil tai.

⁴Ziaphatchun, lengpa chun Amasa kiang in, “Ni thum sung in Judai mipite zosia hun ko khawm inla, nang le zia tak ah chun la um ding ahi,” a tia.

⁵Tichun, Amasa chu Judai gam mipite chu ko khawm dingin a kuandok ah; himaleh, a kokhawmna ding ah hun sung in a hun ko khawm man ta puai.

⁶David in Abishai kiang in, “Tu’hin Bikhri chapa Sheba chun Absalom sâng ah ei subuai zaw ding ahi; la pu sepaite hi pui in la delzui in; achutiloleh kuldette a la kilâk man intin, suakcha khatto in a,” a tia.

⁷Joab sepaite chun a delzui tau ah, Kherith mite, Pelethte tawh sepai hangsan zosia’n a zuidok tau a; Jerusalem ah kipat in Bikhri chapa Sheba hawl in a kuandok tau hi.

⁸Gibeon ah suangpi lian tak umna mun a tun phat un, Amasa chu amau lamtua dingin a hung ah. Joab in a sepai puanâk chung ah a kawnggâk ah chun chemjam a pâi ah kithun a gâk dên ah; a chia kawm in a hung kizukdok kha ta’n.

⁹Joab in Amasa kiang ah chun, “Ka suapipa, la pha na maw?” a tia. Joab in a changlam khut ah chun Amasa khamul ah man in chawp a gua’n.

¹⁰Himaleh, Amasa in Joab khut ah chemjam chu a la mu pua’n; Joab in a gilpi a dawt piak ah, a gilzang a pawt hial ziang ah, a thi den tai. A vel in a sun kit ta puai. Ziaphatchun, Joab tawh a suapipa Abishai chun Bikhri chapa Sheba chu a delzui tau.

¹¹Joab sepaite lak ah pakhat chu Amasa luang kiang ah dingin, “Joab leh David lam ah pang taphot in Joab zui un,” a tia.

¹²Amasa chu a thisan kilui lak in lamlian ah chun a kizam ah, Joab sepaite zia mun hun haw tapo a din malam ziang uh chu a mu’n. Chutia, mi a hung tapo a din ziang uh chu a mu phât in, lamlian ah kipat Amasa luang chu a paw mang ah, gamlak in a pai ah, puan a khu’khum tai.

¹³Lamlian ah kipat a kai mang phat ah chun, Bikhri chapa Sheba del ding in mi zosia’n Joab chu a hun delzui thei tau hi.

¹⁴Sheba chun Israelte phung tinte gam chu, Abel ah kipat Beth-maakah tiang in a haw malam pek ah; tichun, Bikhri mite zosia chu a hung khawm un, a zui tau.

¹⁵Joab sepaite chu Beth-maakah ah Abel mun ah chun a hun ûm tau a; khawpi pangjul ah chun panmun a siam un, zia panmunte ah chun a châng tau a. Joab sepaite chun khawpi kulbâng chu sukchim a gaw tau hi.

¹⁶Ziaphatchun, numei pil tak khat hi khawpi sung ah kipat in a hung kiko ah, “Ngai un, ngai un! Joab kiang ah zia gual hin vagen un: ‘Hung in, la kiang ah gen nop khat ka nei hi,’ a tii, vatiu in,” a tia.

¹⁷Ama chun zia nu kiang chu a hun nai ah,; numei chun, “Joab chu la hi em?” ti’n a dong a. Joab in, “Aw, ka hi,” ti’n a dawnhu a. Ziaphatchun, a kiang in, “La suak thu gen hi ngai in,” a tia; ama’nle, “Ka ngai hi,” a tia.

¹⁸Amanu chun, “Nidang lai ah chun mite’n, ‘Abel khua’n va kiho’lem un,’ a ti sek un; tichun, thubuai a la kiholem sek ui.

¹⁹Israelte lak ah kichamna dawi leh ginum tak ah pangte lak ah khat ka hi’n; Israelte khawpi gun tak khat hi sukmangthai gua la hiu; LALPA go hi valzaw la guat ziang a hem?” a tia.

²⁰Joab in, “Ahipuai, ahipuai! sukmanthai leh valzaw ziang ka gaw him him puai!

²¹Zia chu thil um dan ahi puai! Ephraim tânggam ah Bikhri chapa Sheba chun, lengpa David do dingin a khut a la lâm ta’n; ama chu ei pedok leu chun, khawpi hi nusia ziang ding ka hi,” ti’n a dawnhu a. Numei chun Joab kiang in, “A luchang chu kulbâng chung ah pat hin la kiang ah hun pedok ding ka hi,” ti’n a dawnhu tai.

²²Ziaphatchun, pil tak ah a lemguat dungzui in, zia nu chu mipi zosia lak ah chun a vâkvel ah. Bikhri chapa Sheba gawl chu ta’n in, Joab kiang in a sepdok tau a. Tichun, Joab in pengkul a mut ah, zia khawpi chu nusia in, a In lam chiat un a kile’kit tau hi; Joab ahileh Jerusalem lam zuan in a chia tai.

²³Tu’hin, Joab chu Israel sepaite zosia chung ah hotu’n a pang ah; Jehoiada chapa Benaiah chu Kereth mite leh Peleth mite chung ah hotu’n a pang tai.

²⁴Adoniram chu suak nasemte chung ah hotu’n a pang ah; Ahilud chapa Jehoshaphat chu thil tepte in a pang ah;

²⁵Sheva chu lekhazik in a pang ah; Zadok leh Abiathar chu thiampu’n a pang un;

²⁶Jair chapa Ira chu David â ding ah thiampu’n a pang hi.