Read Vaiphei 2 SAMUEL 24 Bible Online

2 SAMUEL 24 - Vaiphei bible

2 SAMUEL 24

¹Israelte chung in LALPA lungnatna a hung puangjak kit in, a jakda lam tak bawl dingin David a chokphûl ah, ama chun, “Chia in la, Israel leh Judai gam ah mipi hi vasim in,” ti’n a sawl a.

²Tichun, lengpa chun, Joab tawh a kiang ah um sepai hotute chu, “Chiau inla, Dan ah kipat Beer-sheba tiang in, Israel phung zosia lak ah mi bang jat I hiu em ti ka hettheina dingin vasim un,” ti’n a sawl tai.

³Himaleh, Joab chun, lengpa kiang in, “LALPA la Pathian in ka lengpa mit mu ngei ngei ah hinle, mipite hi a le za za in a supung hi ti la mu ngâl in! Bang ziak ah ka lalpa, lengpa chun zia gual bawl ding ah chu hung kithalawp ziang la hi tam?” ti’n a dawnhu a.

⁴Himaleh, lengpa chun Joab leh sepaite chu a nial zo ta’n. Tichun, Joab leh sepai hotute chu lengpa âng ah kipat pawtdok in, Israel mipite sim dingin a kuandok tau hi.

⁵Jordan lui a gâl kâi ua, Gad leh Jazer lam ah luiphâi lailung ah khawpi jawn ah Aroer ah kipat chun a sim pan ua.

⁶Gilead lam a hung tung un; chuleh, Hit mite gam Kadesh a hung tung tau ah; chuleh, Dan a hung tung un, Dan ah kipat chun Sidon lam in a chia kual un;

⁷Tura kulpi a hung tung un, zia zaw ah chun Hiv mite leh Kanaan mite chênna gam zosia’n a chia zaw nung un, Judai gam Negeb ah Beer-sheba a hung tung tau hi.

⁸Tichun, a gam pumpi a chot suak zaw phat un, tha kua leh ni sawmni a ti’n in Jerusalem a hung tung kit tau hi.

⁹Joab chun a tepte’nau dungzui ah chun lengpa kiang in a hil tai: “Israelte lak ah chun sepai chemjam pan thei mi nuai giat a um un, Judah phung ah mite chu nuai nga a hiu hi,” ti in.

¹⁰Himaleh, mipi a sim ziakin a vainung in David lungthim chu a na ta ma ma ziang a. David in LALPA kiang in, “Ka la thilbawl ziak hin nasa tak in gilo ka hi tai. Himaleh, tu’hin, aw LALPA, la suak gitlona hi ei lakmang piak dingin ka hun don hi; ngolhuai tak in thil ka la bawl ta’ngâl in,” a tia.

¹¹Jingkal ah David a thaw phatin, David in thiamgau a mat sek jawlnei Gad kiang in zia gual hin LALPA‘n thu a hun gen a:

¹²“Chia inla, David kiang in zia gual hin vagen in: LALPA‘n zia gual hin a gen hi: Thil pathum lak ah pakhat la têl ding ka hun pia, la têl pen chu hun bawl ngâl ziang ding ka hi, a tii,” ti in.

¹³Tichun, Gad chu David kiang in a chia ah, a hil zaw phatin a kiang in, “La gam sung ah kum thum kial tung ding la têl diam? ahiloleh, la gâlte’n a hun delzui ua, tha thum sung tai mang la têl zaw diam? ahiloleh, la gam sung ah natpi ni thum sung lênsak zaw ding ka hem? Tu’hin, bang pen têl ding la hem kingaitua inla, ei sawlpa kiang ah vahil kit ding ka hi,” a ti tai.

¹⁴Ziaphatchun, David in Gad kiang in, “Ka lung a buai ma ma tai; LALPA khut in pûk lut zaw mai ing ka; ama chu hepina hau ahi ngâl ah; mihing khut in vang ka pûk lut nuam puai,” ti’n a dawnhu tai.

¹⁵Tichun, zia ni jingkal ah kipat chun, a hun tiam chan chu Israelte lak in natpi a lênsak ta’n; Dan ah kipat Beer-sheba tiang in mipite lak ah sîng sagi a thi tau hi.

¹⁶Himaleh, Jerusalem khua gawt ding ah vansawlchâk chun a khut a hun lap phatin, LALPA chun mipite lak ah thil phalo bawl ding chu a hun thotâng ta’n, “Hun ta hen; la khut kha lâm ta kin,” a hun tia. LALPA vansawlchâk chu Jebus mi Araunah phual kiang ah a um lai tak ahi’n.

¹⁷Mipite thattu vansawlchâk chu David in a mu phât in, LALPA kiang in, “Keima bep ka hi a gilo chu; zia belamte hin bang a bawl ua a hem? La khut chu keima leh ka pa Inkuante chung ah tunsak zaw dingin ka ni la hi,” a tia.

¹⁸Zia ni chun Gad chu David kiang in a hung ah, a kiang in, “Chia to inla, Jebus mi Araunah buphual ah chun LALPA hona dingin mâichâm vasiam in,” a tia.

¹⁹Gad thuhilna leh LALPA thupiak dungzui in David chu a chia to ta’n.

²⁰Araunah in a vak et suk leh, lengpa leh a suakte ama kiang lam ah hung chu a vak mu’n; tichun, Araunah chu a chia ah, lengpa âng ah khupbok in a mai lei tual in a sidên tai.

²¹Araunah chun, “Bang ding ah lengpa hi la suak kiang ah hung la hem?” a tia. David in, “Mipite lak ah natpi hi a beitheina ding ah, LALPA mâichâm siamna dingin la buphual hi chaw ding ah hung ka hi,” a ti tai.

²²Ziaphatchun, Araunah in David kiang in, “Ka lalpa, lengpa chun pha lasak dan dan ah la bawl dingin a mun chu kilâk ziang in; zia tak ah hin hâlmang kithoina dingin bawngchalte le a um un, a thing dingle bu vokna thingte leh bawngchalte ngawngkol haw a um hilam.

²³Aw lengpa, zia haw zosia hi Araunah in lengpa a hun pia tai,” ti’n a gen ah. Chuleh, Araunah in lengpa kiang in, “LALPA la Pathian in a pha lam lam in hun dawnhu ta hen,” ti’n a gen tai.

²⁴Himaleh, lengpa chun Araunah kiang in, “Ahipuai, a man nei ah nang ah kipat ka chawkdaw ding ahi; keima kisenna pang lo in LALPA ka Pathian kiang ah hâlmang kithoina thil chu lân lo hial ing ka,” a tia. Tichun, David in zia buphual chu tawh bawngchalte chu dangka shekel sawmnga’n a chaw tai.

²⁵Zia tak ah chun David in LALPA hona dingin mâichâm a siam ah, hâlmang thilpiak leh kichamna thilpiak a lân tai. Tichun, LALPA‘n gam sung â ding ah a dotna chu a dawnhu a, Israelte lak ah natpi chu a ladok tai.