Read Vaiphei 1 LENGTE 1 Bible Online

1 LENGTE 1 - Vaiphei bible

1 LENGTE 1

¹Lengpa David chu a hung têk ta’n; a kumte a tam ta; puansilte khu’khum maleu lum a sa zo diak ta pua’n.

²Tichun, a suakte’n a kiang in, “Ka lal uh lengpa â dingin nungak thiangtho hawl hihen la, lengpa âng ah um in, enkol hen la, a âng sung ah lum hen; chutileh lengpa hin lum la sak theina dingin,” a tiu a.

³Tichun, Israel gam pumpi’n nungak mêlpha a hawl tau ah; tichun, Shunam mi Abishag kiti chu a muu ah; lengpa kiang in a hun pui tau a.

⁴Zia nungak chu a mêl a pha ma ma in. Ama chun lengpa chu kaitua in, a na a sep piak ah; himaleh, lengpa’n ama chu a khoi puai.

⁵Tu’hin, Haggith chapa Adonijah chu ama leh ama kichawisâng in, “Keima hi leng hiding ka hi,” a kitia; a ma-âng ah tai ding mi sawmnga tawh kângtalai leh sakolte a guanggal a.

⁶Ama chu a pa’n bangtik lai inle, “Bang ziak ah zia gual ah chu zia chu bawl la hem?” ti’n a sulungawi lo ngai pua’n. Ama chu pawsal mêlpha tak le ahi’n, Absalom pian zaw ah piang ahi.

⁷Ama chu, Zeruiah chapa Joab tawh, thiampu Abiathar tawh a kithukop tau ah; amau chun Adonijah a zathuap un.

⁸Himaleh, thiampu Zadok leh Jehoiada chapa Benaiah leh jawlnei Nathan, Shimei, Rei leh David mihatte chu Adonijah lam in a pang puau hi.

⁹Adonijah chun Belamte, bawngchalte, gan kivak thaute chu Zoheleth suang kiang in a that ah; zia chu En-rogel kiang ah um ahi’n; a suapite, leng chate zosia tawh leng nasem Judah phung ah mite chule zia chun a chial a;

¹⁰himaleh, jawlnei Nathan leh Benaiah tawh a suapipa Solomon chu vang a chial puai.

¹¹Chutichun, Nathan in Solomon nu Bathsheba a kihopi ah, a kiang in, “I Lengpau David hetpi lo in, Haggith chapa Adonijah leng in a pang tai ti helo la hem?

¹²Ziaziakchun, hung in, nangma hinna leh la chapa Solomon hinna la hukdaw theina dingin, thu hun mop ing ka.

¹³Kin tak in Lengpa David kiang ah chia inla, a kiang in, ‘Aw lengpa, ka lalpa, matheilo in la chapa Solomon hi la nung ah leng ah pang ding ahi. La lalchutpha chung ah chu ding ahi, ti’n la suaknu kiang ah la kihaksial ta hilo a hem? Chuti ahileh, bang ziak ah Adonijah leng ah pang ta a hem?’ vati’n la.

¹⁴Lengpa tawh la holim zing lai un, keile la nung ah hung ing ka tin, la thu gente chu hun namdet piak ding ka hi,” a tia.

¹⁵Bathsheba chu lengpa pindan sung in a valut ah. Lengpa chu a têk ma ma ta’n, Shunam mi Abishag chun lengpa na a sep piak a.

¹⁶Bathsheba chun lengpa jana pia’n, a bokkhup ah, lengpa chun, “Bang la dawi em?” ti’n a dong a.

¹⁷Ama chun, a kiang in, “Ka lalpa, matheilo in la chapa Solomon keima nung ah leng hi’n tin, ka lalchutpha chung ah chu ding ahi, ti’n la suaknu kiang hin, LALPA la Pathian min in la kihaksial in.

¹⁸Himaleh, tu’hin, ka lalpa lengpa het lo in Adonijah leng in a pang tai.

¹⁹Ama’n bawngchalte, gan kivakthaute leh belamte tam tak a that ah, lengpa chate zosia leh thiampu Abiathar tawh sepai hotu Joab a chial ah; himaleh, la suak Solomon a chial puai.

²⁰Himaleh, nang ka lal, aw lengpa, lengpa nung ah ka lalpa lalchutpha chu ding chu kua a hem ti la gen ding ngâk in Israel mite zosia mit la chung ah um ahi.

²¹Achutilochun, zia gual hi hung hi’n tin, ka lalpa, lengpa chu a pu leh pate kiang ah a ipmut phat leh, kei leh ka chapa Solomon hi tawh hung kiho theilo ding ka hiu,” a tia.

²²Bathsheba tawh lengpa a kiholim lai tak un, jawlnei Nathan a hung lut a.

²³“Jawlnei Nathan a hung hi,” ti lengpa a hun hil ua. Ama chu lengpa kiang ah a hung lut phatin, a mai ah leitual si’n lengpa jana a pia.

²⁴Nathan chun, “Aw lengpa, ka lalpa, ‘Adonijah ka nung ah leng ding ahi’n, ka lalchutpha chung ah chu ding ahi,’ la ti kha a hem?

²⁵Tu’ni hin a chia suk ah, bawngchalte, gan kivakthaute leh belamte tam tak a that ah, leng chate zosia leh sepai hotu Joab leh thiampu Abiathar le a chial ah; amau chun a âng in a ne’n a dawn ua, ‘Pathian in Lengpa Adonijah hukhing hen!’ a tiu hi.

²⁶Himaleh, la suak keima hi tawh thiampu Zadok leh, Jehoiada chapa Benaiah leh la suak Solomon ei chial puai.

²⁷Ka lalpa, lengpa’n a nung ah lalchutpha chu ding chu kua a hi diam ti, a suakte hil lo ah zia thil hi ka lalpa, lengpa’n a bawl a hem leh?” ti’n a gen a.

²⁸Ziaphatchun, Lengpa David in a hun dawnhu a, “Bathsheba ei hun ko piak un,” a tia. Tichun, Bathsheba chu lengpa kiang in a hung ah, lengpa âng in a hung ding a.

²⁹Lengpa chun kihaksial in thu a gen a, “Lungjinna zosia lak ah ka hinna hukhing LALPA min in,

³⁰matheilo in la chapa Solomon chu ka nung ah leng a hi’ding a hi, ka sik in ka lalchutpha a chut ngei ngei ding ahi, ti ah LALPA Israelte Pathian min ah la kiang ngei ah ka la kihaksial gual in, zia gual ngei chun tu’ni hin bawl ding ka hi,” ti in.

³¹Ziaphatchun, Bathsheba chun a mai ah lei tual si’n lengpa jana a pia’n, “Ka lalpa, Lengpa David dam sawt hen!” a tia.

³²David in, “Thiampu Zadok, jawlnei Nathan leh Benaiah chapa Jehoiada ei hun ko piak un,” a tia. Amau chu lengpa âng ah a hung phat un,

³³lengpa chun a kiang un, “Lengpa suakte pui unla, ka chapa Solomon chu ka sabiltung chung ah chutsak unla, Gihon ah pui suk un.

³⁴Tichun, thiampu Zadok leh jawlnei Nathan in zia tak ah chun Israelte chung ah leng hiding in sathau nuu hen la; chun, ‘Lengpa Solomon dam sawt hen!’ ti’n pengkul mût un.

³⁵Ama la hun zui to ding uh ahi. Ama hung lut in tin; ka lalchutpha hung kichu’n tin, ama chu ka sik ah lengpa hita’n ah; Israel leh Judah chung ah vaipua ding ah ama ka se ahi ta’ngal a,” a tia.

³⁶Jehoiada chapa Benaiah chun lengpa chu a hun dawnhu a, “Amen! Ka lalpa, lengpa LALPA Pathian chunle zia gual chun hita hen!

³⁷Ka lalpa, lengpa kiang ah LALPA a um gual ma khan, Solomon kiang inle um hen la; ka lalpa, lengpa David lalchutpha sâng in ama lalchutpha siam lian zaw ta hen!” ti in.

³⁸Tichun, thiampu Zadok, jawlnei Nathan, Jehoiada chapa Benaiah leh Kherith mite leh Peleth mite chu a chia suk ua, Lengpa David sabiltung chung in Solomon a chutsak ua, Gihon lam ah chun a pui tau a.

³⁹Thiampu Zadok in biakbûk ah kipat sathau bûk chu a hun ladok ah, Solomon chu a nu’ tai. Chuleh, pengkul a mût ua, “Lengpa Solomon dam sawt hen!” ti’n mipi zosia chu a kiko tau a.

⁴⁰Mipi zosia’n lilute mût in lim leh kipak tak in a zui to tau ah, a husa git chun lei a thawng hial hi.

⁴¹Chun, Adonijah leh a mi chialte zosia’n an a nêk zaw phat un, zia chu a hun he tau a. Pengkul git chu Joab in a het phat in, “Khawpi sung ah husa gi zung zung saw bang ziak a hem?” ti’n a dong a.

⁴²Chutia, a gen lai tak ah chun, thiampu Abiathar chapa Jonathan a hung ah. Adonijah in a kiang in, “Hung lut tia, nang hi mi hangsan la hi’n, chanchin kipak um hun paw ngei inla,” a tia.

⁴³Jonathan in a dawnhu ah, Adonijah kiang in, “Ei puai, I Lengpau David in Solomon chu leng ah pang dingin a siam tai;

⁴⁴lengpa chun a kiang in thiampu Zadok, jawlnei Nathan, Jehoiada chapa Benaiah leh Kherith mite leh Peleth mite a sawl ah, amau chun Solomon chu Lengpa sabiltung chung in a chuansak un;

⁴⁵thiampu Zadok leh jawlnei Nathan in Gihon ah ama chu Leng dingin sathau a nu’ tau hi; chuleh, amau chu zia mun ah kipat chun lim tak in a hung to husau chun khawpi a thawnggi hial ah, zia chu ahi la husa het uh chu.

⁴⁶Solomon chu tu’hin lengpa lalchutpha chung ah a kichu tai.

⁴⁷Zia ban ah chun, lengpa suakte a hung un, I lal uh leng David a maljawl ua, ‘Pathian in Solomon min hi nang min sâng in suminthang zaw hen la, a lalchutpha hile nang lalchutpha sâng in sulopi zaw ta hen!’ a tiu in. Lengpa’n a lupna chung ah a lukûn in Pathian a be ta’n,

⁴⁸zia gual hin a pauchap tai: ‘LALPA, Israel Pathian, ka suan lak ah pakhat tu’ni ka lalchutpha chung ah kichu ding ei pia ka mit ngei ah ei musakpa chu pâk in ta hen!’ ti’n,” a gen a.

⁴⁹Adonijah kiang ah um, a mi chialte zosia chu lau in a kithing tau ah, mi tin amau lampi chiat in a chia mang tau hi.

⁵⁰Adonijah in Solomon a lau ziakin a dingdok ah, chia in, mâichâm ningbawkte chu a vatûk ta mai a.

⁵¹Solomon kiang in, “Adonijah in Lengpa Solomon a lau ziakin, en tiam in, mâichâm ningbawkte chu a tu’n, ‘Ka kiang in Lengpa Solomon in a suak hi chemjam ah that lo dingin kihaksial masa hen,’ a tii,” ti’n a va hil tau a.

⁵²Solomon in a dawnhu ah, “Pawsal tak ahi a kilatsak chun lei chung in a samzang khat chale ketha pua’n a. Ahi’n, ama ah gitlona mudaw ahi chun a thi’ding ahi,” a tia.

⁵³Lengpa Solomon in mâichâm ah kipat vapuidok dingin mi a sawl ah. Ama chun Lengpa Solomon chu ja’na a hun pia; Solomon in a kiang in, “La In lam ah chia ta’n,” a ti tai.