Read Vaiphei 1 LENGTE 10 Bible Online

1 LENGTE 10 - Vaiphei bible

1 LENGTE 10

¹Sheba ah lengnu chun Solomon minthanna (LALPA jal ah a minthanna) a het phat in, ama patepna ding ah dotna haksa takte tawh a hung kuan a.

²Nungzui tam tak tawh Jerusalem khua’n a hung ah; gimtuite, sana tam tak tawh suang mantamte tawh, sangawngsau a hun puaksak a; Solomon kiang a hung tun phatin, a lunggil ah um zosia chu a dong tai.

³Solomon in a dotna zosia chu a dawnhu ah; amanu kiang ah a hilchian thei lo ding ah lengpa kipat sêlguk bangma a um puai.

⁴Sheba ah lengnu chun Solomon pildan zosia a mu’n; a In sak haw,

⁵a dawkan ah an haw, a miliante chutna haw, a suakte nasep dan leh a kicheidan teu, a tuanvaite; chuleh, LALPA In ah hâlmang thillat ah a latte chu a mu in, a chu a hatsam hial ziang tai.

⁶Tichun, lengpa kiang in, “Ka gam lam ah la thilbawldawte leh, la pilna thu ka la hiatte kha a dik ngei ahi na hilam;

⁷himaleh, ka hung ah ka mit ngei ah ka mu zet masang khan a thu genteu chu ka la taksang pua’n. A kimkhat le ei la hil zo puau hi; la pilna leh la hausakna hin ka thu a la hiatte a khêl vek hi.

⁸La jite chu mi hampha ahi nau e! La âng ah la na sêm ah, la pilna thu ngaitha zing la suakte hile mi hampha a hiu!

⁹La chung ah kipak ah Israel lalchutpha hun chutsakpa, LALPA la Pathian chu pâk in um ta hen! LALPA chun Israel kumkhua a hepi ziakin, diktatna leh thutanna bawl dingin, nang leng in a hun siam ta ahi,” a tia.

¹⁰Ziazaw chun, amanu chun lengpa chu sana talent za leh sawmni, gimtui tam tak tawh suang mantam a pia tai; Sheba ah lengnu chun Lengpa Solomon thil gimtui a piak zat tuk chu bangtik lai inle a hung lut kit kha ta puai.

¹¹Zia bân ah chun, Hiram long hon Ophir ah kipat sana hun pua khan, Ophir ah kipat in almug thing leh suang mantamte tam tak a hun puau a.

¹²Lengpa’n almug thingte chun LALPA In leh lengpa Inkhuam lian dingte leh, Lasa mite â ding pekkhuangte leh tingtangte a siam ah; zia tawhbang almug thing chu tu’ni tiang in a hung lut ta pua’n, mu zaw le ahi ta puai.

¹³Ziaphatchun, Lengpa Solomon in Sheba Lengnu chun a dawi a gen taphot chu a pia tai; Solomon lalna go lak khawmte lak ah kipat chunle a pia. Ziazaw chun, amanu chu a suakte tawh a gam lam un a kile’kit tai.

¹⁴Kum khat sung ah Solomon kiang ah sana hung lut gik dan chu, sana talent za guk sawmguk leh guk ahi’n,

¹⁵zia chu, thil veipungte leh sumkawlveite kiveina kipat leh, Arabia gam ah lengte zosia leh gam vaihawmte ah kipat hung lut haw bân ah a lâk lut ahi.

¹⁶Lengpa Solomon in sana phaw kisêkthaw, a lian za ni a bawl ah; phaw a lian pakhat in sana shekel za guk chiat a lut a.

¹⁷Ama’n sana phaw kisêkthaw za thum a bawl ah; phaw pakhat in sana minah thum chiat a lut ah; chun zia haw chu lengpa chun Lebanon Gammâng In ah chun a koi tai.

¹⁸Lengpa’n saiha lalchutpha lopi tak le a bawl ah, zia chu sana thiang pen a luan khum a.

¹⁹Lalchutpha chun kalbi paguk a nei ah. Lalchutpha nunglam chu a kikual ahi’n; chuleh, a chutna langni gêl in a khutbân a um ah, a khutbân kiang ah chun sakeibaknei lim pani a ding hi.

²⁰Kalbi pagukte chung ah chun sakeibaknei sawm leh ni, a mong langkhat ah pakhat gêl a ding un. Zia tawhbang chu lenggam dang ah siam ahi kha him him puai.

²¹Lengpa Solomon thil dawnna no leh hâite zosia chu, sana ngawn ah siam a hi’n, Lebanon Gammâng In ah ûm leh bêl zosia chule sana thiang ngawn ah siam ahi; dangka ah siam bangma a um puai; Solomon hun lai ah chun dangka thik chu bangma’n a ngai puau hi.

²²Lengpa chun Tarshish long honte chu tuisuagiat ah Hiram long honte chu tawh kiton in a nei a. Tarshish long honte chun kum thum dan ah khatvei sana, dangka, saiha, guldute leh vahuangte pua’n a hung sek ui.

²³Tichun, Lengpa Solomon chun hausakna leh pilna lam in lei ah lengte zosia a khêl suak kêi hi.

²⁴Lei ah mi zosia’n Pathian in a piak, a lungthim ah pilna a koi chu ngaithâk nuam in, Solomon kiang in a hung sek ui.

²⁵Amau chun thilpiak, dangka leh sana thilte, puansilte, gâlvante, thil gimtuite, sakolte leh sabiltungte chu a kum a kum in tam tak a hun thak sek ui.

²⁶Solomon in sakol kângtalai leh sakol le a lakhawm ah; ama’n sakol kângtalai sâng leh za li tawh, sakol sîng khat leh sang ni a nei ah; zia haw chu sakol kângtalai khawpite leh lengpa kiang ah Jerusalem ah chun a koikhawm hi.

²⁷Lengpa chun Jerusalem khua chun dangkate chu suangchang tawh bang mai in a umsak ah; chuleh, sidar thingte chule Shephelah ah theipi kungte tawh bang hial ah tam in a umsak hi.

²⁸Sakolte chu Solomon in Aigupta leh Kue gam ah kipat a chawk a hia, lengpa sumkawlveite chun Kue gam ah kipat man tawmcha a hun lâk uh ahi.

²⁹Aigupta ah kipat in sakol kângtalai pakhat dangka shekel za guk leh, sakol pakhat za leh sawmnga chawk thei ahi’n; tichun, lengpa sumkawlveite chun Hit gam ah leng haw leh, Amor gam ah lengte zosia kiang in a zuaksawn sek ui.