Read Vaiphei 1 LENGTE 11 Bible Online

1 LENGTE 11 - Vaiphei bible

1 LENGTE 11

¹Lengpa Solomon in Pharaoh chanu tawh pum in gam dang numei tam tak a doicha’n: Moab mi, Ammon mi, Edom mi leh Hit mi numeite,

²zia a ji lâk khawm namte chungchâng thu ah chun, LALPA chun Israelte kiang ah zia gual hin a gensa ahi: “Amau numeite chu kichenpi kiu in la, nang uh numeite chule ji’n nei sak diak kiu in; achutiloleh, a pathianteu lam in la lungthim uh hun kai hei kha’n au,” ti in. Ahi’n, Solomon chu numei doichâkna’n zia numeite lam ah chun a kihei ta ahi.

³A jite lak ah chun leng chanute za sagi tawh, thâikem za thum a hiu hi; a jite’n a lungthim a kai hei tau hi.

⁴Solomon a hung têk phatin, a jite’n a lungthim chu pathian dangte lam in a heimang tau ah; a pa David lungthim dik gual ah khan a lungthim chu LALPA a Pathian lam in a dik ta puai.

⁵Solomon in Sidon mite pathiannu Ashtoreth (Astarte le kiti sek) tawh Ammon mite kisukbuakna pathian Milkom a zui tai.

⁶Tichun, Solomon in LALPA mit mu ah thil phalo a bawl ta’n; chuleh, a pa David bawl gual ah khan LALPA a zui buting ta puai.

⁷Solomon in Moabte kisukbuakna pathian Khemosh â ding tawh, Ammonte kisukbuakna pathian Molekh â dingin Jerusalem sualam ah tâng chung ah chun thoimual a bawl hi.

⁸Zia gual ma chun, gam dang mi a jite zosia â dingin a bawl ah, amau chun a pathianteu kiang in gimtui leh kithoinate chu a lân tau hi.

⁹Ziaphatchun, a kiang ah nivei kilâk LALPA, Israelte Pathian ah kipat a lungthim a kihei mang tâk ziakin, Solomon chung in LALPA a lungna ta’n,

¹⁰ama’n zia thil chungchâng ah, pathian dangte zui lo ding ah thu a la piaksa ahi’n; himaleh, LALPA thupiak chu a zui ta puai.

¹¹Ziaziakchun, LALPA‘n Solomon kiang in, “La lunggel chu zia hi a la hita mai ah, ka thuthung leh la kiang ah ka thupiak ka thugelte la vop tâk lo ziakin, lenggam chu nang ah kipat botdok ing ka tin, la suakpa kiang ah pia ding ka hi.

¹²Ahi’n la, la pa David zal in, zia chu nang dam sung ah bawl lo ding ka hi; la chapa khut ah kipat botdok ding ka hi.

¹³Lenggam pumpi chu vang botdok diak pua’ng ka; ka suak David zal leh ka la têlsa Jerusalem zal in, la chapa chu nam khat pia ding ka hi,” a tia.

¹⁴Ziaphatchun, LALPA chun Solomon kãl ding mêlma, Edom mi Hadad a tungdok ah; ama chu Edom ah leng Inkuan ah mi ahi.

¹⁵Edom gam ah David a um lai ah, mithi vui ding ah a sepaite hotu Joab a kuan to ah khan, Edom ah pawsal zosia a la that ta ahi.

¹⁶(Joab tawh Israelte zosia chun, Edom ah pawsal zosia a sukbei masangsiau, tha guk sung zia chun a la um uh ahi;)

¹⁷himaleh, Hadad tawh a pa suak ah pang, Edom mi khenkhat chu Aigupta lam ah a la jam mang tau a. Ama chu zia hun lai ah chun naupang cha a hi nalai hi.

¹⁸Midian ah kipandok in Paran ah a hung ua; Paran ah mi khenkhat pui in Aigupta Lengpa Pharaoh kiang a hung tung ua; Ama chun In a la pia, nêk man ding a khen thâk ah; chuleh, gam le a la pia’i.

¹⁹Hadad chu Pharaoh mit mu in doisakna lian tak a chang ah; Lengnu Tahpenes suapinu chu a ji dingin a pe tai.

²⁰Tahpenes suapinu chun, Pharaoh In ah Tahpenes in nawi a ngawl tiang a umpi ah; a chapa Genubath chu a hinpiak ah; Genubath chu Pharaoh In ah Pharaoh chate lak in a umah.

²¹Aigupta gam ah Hadad in, David kha a pu leh pate kiang in a ipmu tai, ti leh sepaite hotu Joab a thi tai, ti a het phat in, Pharaoh kiang in, “Ka gam lam ah ka chiatheina dingin ei pawt dawsak in,” ti’n a don a.

²²Himaleh, Pharaoh chun a kiang in, “Kei kiang ah bang tâksap la nei ziak ah, la gam lam ah chia kit ding gua la hem?” a tia. Ama chun, “Ahi puai, ei chiasak him him in,” a tia.

²³Solomon kãl him him dingin LALPA‘n mêlma dang khat, Eliada chapa Rezon a tungding ah; ama chu a pu Zobah khua Lengpa Hadadezer ah kipat taimang a la hi.

²⁴David in mi a la tha’khawm zaw ah khan, ama’n a nungzui dingte kaikhawm in, tualthat pawl ah hotu’n a pang ta’n; amau chu Damaska ah a chia ua, zia chun a chêng ua, ama Damaska lengpa’n a siam tau a.

²⁵Ama chu Solomon vaihawm sungsia Israelte mêlma ahi zing ta’, Hadad gual ah khan buaina a siam tai.

²⁶Solomon suakpa, Zeredah ah Ephraim mi Nebat chapa, Jeroboam, a nu chu meithâi Zeruah ahi’n; ama chu lengpa kãl in a hung kilek ta’n.

²⁷Lengpa kãl ah a hung kilekna chu a nuai ah ziak hi ahi: Solomon in Millo chu a sa’n; a pa David khawpi bânghawm chu a hukbing a.

²⁸Zia mi Jeroboam chu mi thiam tak ahi’n; Solomon in zia tangval chu taima tak ahi ti a het phat in, Joseph Inkuan ah nasemte hotu’n a siam a.

²⁹Zia hun lai vel ah chun, Jerusalem ah kipat Jeroboam a pawt daw lai tak in, Shilon mi jawlnei Ahijah in lampi’n a la kituakpi ah. Ahijah chu puanthak in a kivan a. Gamlak ah amau te ni bep a um lai un,

³⁰Ahijah in a puanthak âklai chu a tudet ah, phel sawm leh ni’n a botthêk tai.

³¹Ziaphatchun, Jeroboam kiang in: Phel sawm kilâk in; LALPA, Israelte Pathian in zia gual hin a gen tai: “En in, lenggam chu Solomon khut ah kipat botdok ding ka hi’n, nam sawmte chu nang hun pia ding ka hi.

³²Ka suak David zal leh, Israel namte zosia lak ah kipat ka khawpi teldaw Jerusalem zal in, nam khat ama chang den intin;

³³kei ei nusia in, Sidonte pathiannu Ashteroth (Astarte le kiti,) Moabte pathian Khemosh leh, Ammon mite pathian Milkom a ho ta’n, a pa David hi gual ah ka lampite zui talo in, ka mit mu ah thil dik hi’dingte, ka thugelte leh ka dan bawlte vop talo ah a um ziak ahi.

³⁴Hiziang leh le, ka la têl leh ka thupiakte leh, ka thugelte a la bawl ka suak David jal in, lenggam pumpi ama ah kipat lâkpiak lo in, a dam sung vaihawm ah siam ding ka hi;

³⁵himaleh, a chapa ah kipat lenggam chu lâkpiak ing ka tin, nam sawmte chu nang hun pia ding ka hi.

³⁶Ahi’n, a chapa chu nam khat pia ding ka hi; tichun, ka min umna ding ah ka khawpi têlsa, Jerusalem ah chun ka suak David in ka ma-âng ah thaumei pakhat a nei zingna dingin.

³⁷Nang hun pui ing ka tin, la lungthim dawi zosia chung ah vaihawm in la tin; Israel chung ah leng hiding la hi.

³⁸La kiang ah ka thupiak zosia la ngaithâk ah, ka lampite la zui ah, ka suak David gual ah, ka thupiakte leh ka thugelte la vop ah, ka mit mu thil dik la bawl chun, hun umpi ing ka tin, David â ding ah ka bawl piak gual in, Inkuan mi bei talo ding hun bawl piak ing ka tin, Israelte hi hun pia ding ka hi.

³⁹Ziaziakhin, David suante gawt genthei ding ka hi; himaleh, kumkhua’n vang hipua’n a,” ti in.

⁴⁰Ziaziakchun, Solomon in Jeroboam thalup a gaw ta’n; himaleh, Jeroboam chu kin tak in Aigupta gam lam ah, Aigupta Lengpa Shishak kiang in a jam mang tai. Solomon thi’tiang in Aigupta gam ah a um den tai.

⁴¹Tu’hin, Solomon nasep dangte zosia, a thil hi zosia leh a pilna, Solomon Nasepte Lekhabu ah a kizik ta hilo a hem?

⁴²Jerusalem ah Solomon in Israel zosia chung ah vai a hawm hun chu kum sawmli ahi.

⁴³Solomon chu a pu leh pateu kiang in a ipmu ta’n; a pa David khawpi ah vui ahi tai; chun, a chapa Rehoboam in a thasâng in vai a hawm tai.