Read Vaiphei 1 LENGTE 13 Bible Online

1 LENGTE 13 - Vaiphei bible

1 LENGTE 13

¹Jeroboam chu mâichâm kiang ah gimtui lân ding ah a din lai tak in, Judai gam ah kipat in Pathian mi pakhat, Bethel ah LALPA‘n a hun sawl a,

²LALPA thu ah mâichâm dem in a kiko ah, “Aw mâichâm! mâichâm! LALPA‘n zia gual hin a gen hi: ‘David Inkuan ah chapa pakhat, a min Josiah kiti hung piang intin; ama chun la chung ah gimtui lân thiampute hi nangma chung ah hun lân ding ahi; tichun, la chung ah mihing gute hung kihâl ding ahi,’ ti’n,” a gen a.

³Zia ni ma ma’ chun tepte’na khat a pia’, “LALPA‘n a gen tepte’na chu zia hi ahi: mâichâm chu sukchip hung hi’ntin, a chung ah vutte chu butthâk hung hi’nah,” a tia.

⁴Bethel ah mâichâm dem ah Pathian mi kiko chu a het phat in, Jeroboam in mâichâm ah kipat chun a khut a vak lâm ah, “Man un!” a tia. Himaleh, a khutbân chu a keugawp den ta mai ah, juk kit in a kâi kit thei ta puai.

⁵LALPA thu ah Pathian min tepte’na a gen dungzui in, mâichâm chule a chimah, a vutte chule mâichâm ah kipat in a kibuntha tai.

⁶Lengpa chun Pathian mi kiang ah chun, “Tu’hin, LALPA la Pathian doisakna don inla, ka khut hi a pangai hisak kit dingin ei pauchap piak in,” ti’n a don a. Tichun, Pathian mi chun LALPA kiang in a pauchap ah; tichun, lengpa khut chu a damkit ta’n, a ma’ gual kha a hung hi’kit tai.

⁷Ziaphatchun, lengpa chun Pathian mi kiangah chun, “In ah ei hung zui inla, an hung ne’n la, thilpiak khat hun pia’ng ka,” a tia.

⁸Himaleh, Pathian mi chun lengpa kiang in, “La lenggam kimkhat ei pia ding hile chinle, nang kiang ah hung lut pua’ng ka; zia tak ah hin an le ne diak pua’ng ka tin, tui le dawn pua’ng ka.

⁹LALPA‘n zia gual hin thu ei pia ahi: an ne kin la, tui le dawn kin; la hungna lampi le la zuikit lo ding ahi, ti’n,” a tia.

¹⁰Tichun, lampi dang in a chia ah, Bethel a zotna lampi chu a zuikit ta puai.

¹¹Zia hun ah chun, Bethel ah jawlnei teksia pakhat a chêng ah. Zia ni’ Bethel ah Pathian mi thilbawl zosia chu a chapate lak ah khat in a hung hil ah; lengpa kiang ah a thugente chule a pau kiang in a hil tau a.

¹²A pau chun a kiang un, “Khoilam zuan in a chia em?” a tia. A chate chun, Judai gam ah kipat hung, Pathian mi chiana lampi chu a kawkmu tau a.

¹³Ziaphatchun, a chate kiang in, “Sabiltung pakhat ei hun guanggal piak un,” a tia. Tichun, amau in sabiltung khat chu a hun guanggal piak ua, a chung in a chuang ngalah;

¹⁴Pathian mi chu a delzui ah; ama chu gangpi thing nuai ah a la kichawl lai chu a va delpha tai. A kiang in, “Judai gam ah kipat hung, Pathian mi chu la hem?” a tia. Ama chunle, “Ka hi,” ti’n a dawnhu a.

¹⁵Ziaphatchun, “In ah ei hun zui inla, an neucha bêk hung ne’n,” a tia.

¹⁶Himaleh, ama chun, “Nang hun zuikit thei pua’ng ka tin, nang tawh kizui thei puai ti; zia mun ah hin nang tawh an ne khawm in, tuile dawn khawm thei diak pua’ng ka;

¹⁷LALPA‘n ka kiang in: Zia mun ah chun an ne’n, tui la dawn lo ding ahi; la chiana lampi le la zuikit lo ding ahi, ti’n ei gen ta ahi,” a tia.

¹⁸Ziaphatchun, pakhat zawk chun a kiang in, “Keile nang tawh bang tho ah jawlnei khat ka hi’n, vansawlchâk pakhat in Pathian thu’n ka kiang in: La kiang ah an ne, tui dawn dingin ama chu la In ah vapui kit in, ei ti ahi,” a tia. Himaleh, ama chun a lepbawlna a hi’n.

¹⁹Ziaphatchun, Pathian mi chun ama chu a le’zui kit tai. A In ah chun an ne’n, tui a dawn tai.

²⁰Dawkan bul ah a chut zing lai un, ama puikitpa jawlnei kiangah chun LALPA‘n thu a hun gen a.

²¹Judai gam ah kipat Pathian mi kiang ah chun a gen tai: “LALPA‘n zia gual hin ei gen hi: LALPA thu zawm lo ah, LALPA la Pathian in la kiangah thu a hun piak chu la mang ta puai;

²²ama’n la kiangah, ‘an ne kin la, tuile dawn kin,’ a ti’na mun ah an la ne, tuile la dawn tâk ziakin, la luang chu la pu leh pateu thânmun tung ta pua’n a,” ti in.

²³Pathian mi chun an a ne, tui a dawn zaw phatin, amau chun a hung pui kit jawlneipa sabiltung pakhat chu a guanggal piak tau a;

²⁴tichun, a chia mang tai. Sakeibaknei pakhat in lampi’n a la kituakpi ah, a that tai. A luang chu lamlai in a kisial ah; sabiltung chu a kiang in a ding zing in; sakeibaknei chule a luang kiangah chun a ding den tai.

²⁵Mite chun a kiang a hun haw phat un, lamlai ah luang kizam leh, mithiluang kiangah sakeibaknei ding zing chu a mu tau a. Teksia jawlnei chênna khua chun a hung ua, a hung gen tau hi.

²⁶Lam kâl ah kipat vapui kit jawlnei chun a het phat in, “LALPA thugen zawm lo Pathian mi ahi’n; ziaziakchun, LALPA‘n sakeibaknei kiang ah a piakdaw a hita chu! LALPA‘n a kiang ah thu a gen dungzui in a bottel ah, a tha ahi tai,” a tia.

²⁷Ziaphatchun, a chate kiang in, “Sabiltung pakhat ei hun guanggal piak un,” a tia. Tichun, a hun guanggal piak ngal tau a;

²⁸ama chule a chia ah, lamlai ah mithiluang kizam chu tawh, mithiluang kiangah ding zing sabiltung leh sakeibaknei chu a vamu tai. Sakeibaknei chun mithiluang chu a la ne pua, sabiltung chule bangma a la law diak puai.

²⁹Jawlnei chun Pathian mi luang chu a la, sabiltung chu puaksak in, ama sûn ding leh vui dingin khawpi sung lam in a hun paw tai.

³⁰Mithiluang chu ama thân khuk ngei ah chun a sial tai; chuleh, ama chu a sûn tau ah, “A khawk na e, ka suapipa!” a tiu in.

³¹A vui zaw phatin, a chate kiang in, “Ka thi phat leh, Pathian mi kivuina thânkhûk ah hin ei vui unla, ka gute chu ama gute ba’n ah zam un.

³²LALPA thu ah Bethel ah mâichâm dem leh, Samaria khawpi sung ah thoimualte dem ah a thu puandaw kha, hung guitung ngei ngei ding a hi’ngal a,” a tia.

³³Zia nung ah hinle Jeroboam in a lampi phalo ah kipat in a kihei mang diak puai; himaleh, thoimualte â dingin mi vantang lak ah kipat in thiampu dingte a siam ah; thiampu hi’nuam taphot chu thoimual â ding in a koichuam tai.

³⁴Zia chu Jeroboam Inkuan gitlona bulpi a hung hi tai; lei chung ah kipat paithâk leh sukmangthai a hung hi’na ding chu a hung hi tai.