Read Vaiphei 1 LENGTE 14 Bible Online

1 LENGTE 14 - Vaiphei bible

1 LENGTE 14

¹Zia lai ah chun, Jeroboam chapa Abijah chu a dam pua.

²Jeroboam in a ji kiang in, “Kipan inla, ka hun don la hi, min Jeroboam ji la hi a hiatthei lona ding un kisiam lamdang inla, Shiloh ah vachia in. Ngaitia, zia mipite chung ah leng ka hi’ding ei la hil jawlnei Ahijah a um hi,” a tia.

³Vaithum chûn sawm tawh vaithum kan peite leh khuaizu thawl khat tawh chawi inla, a kiang ah vachia in. Naupang hi bang a hung ti diam ti hun hil in ah, a tia.

⁴Jeroboam ji chun zia gual chun a bawl ah; a kipandok ah, Shiloh ah a vachia ah, Ahijah In chu a vatung tai; himaleh, Ahijah chu a upat tâk ziakin a mit a thim ta’n a la muthei ta puai.

⁵LALPA chun Ahijah kiang in, “Jeroboam ji, a chapa â ding ah thil dong dingin a hung hi. Ama chu damlo ahi’n; zia gual hin amanu kiang in gen in; zia gual hi hung hi’n ah: A hung lut phat leh, numei dang gual in hung kisiam ding ahi,” a tia.

⁶Zia gual ngei chun a hung um ta’; kotkhak ah a hung lut ah, a keng chotgit Ahijah chun a het phat in, “Nang Jeroboam ji, hung lut in, bang ding ah numei dangte gual ah hung kisiam la hem? La kiang ah thu hawi lo tak chanchin hil ding ah sawl ah um ka hi.

⁷Chia inla, Jeroboam kiang in, ‘LALPA, Israelte Pathian in zia gual hin a gen hi: Zia gual khop hin mipi lak ah kipat in ka hun chawilian ah, ka mi Israelte chung ah leng hiding in ka hun bawl a.

⁸David Inkuan ah kipat in lenggam ka botthêk ah, nang ka hun pia; ahi’n la, ka suak David gual in la um ta puai. Ama chun ka thupiakte a vop ah, ka mit mu ah dikte bep bawl dingin, a lungthim zosia’n ei zui a.

⁹Himaleh, la masang ah um zosia sâng in thil phalo zawsêm la bawl tai: la chia ah, Pathian dangte la bawl ah, ei sulungna dingin milimte la sung ah, la nunglam lei ngatsan tai.

¹⁰Ziaziakchun, ngai in, Jeroboam Insung in thil phalo tut ding ka hi, Jeroboam ah kipat in pawsal zosia sumang ing ka; a kiang ah Israel mi zalen leh zalen lo le, buaksia pai mang ah a um gual in, Jeroboam Inkuan ah um nalaite a bei suak masang siau pai ding ka hi.

¹¹Jeroboam mite khawpi ah thi chu uichate’n ne’n tin; gam ah thi chu chunglêng vachate’n ne’n au; LALPA chun a gen ta ahi,’ ti’n a gen a.

¹²Ziaziakchun, kipan inla, la In lam in chia ta’n; la keng in khawpi a chawt phat leh la cha chu thi ding ahi.

¹³Israelte zosia chun kâ intiu in, vui in au; LALPA, Israelte Pathian lung lam ah pha, Jeroboam Inkuan ah ama bep ah chun mu ahiziak in, ama bep chu Jeroboam Inkuan ah mi thân ah, kivui hiding ahi.

¹⁴Zia ban ah chun, LALPA chun Jeroboam Inkuante sumangthai ding ahi, tu’ ziang hinle ahi tai. Tichun, Israelte chung ah leng pakhat tungdok ding ahi,” a tia.

¹⁵Tui in phâiluang a suklîng lîng gual hin, LALPA chun Israel sual ding a hi’ngal a. LALPA lungnatna choktho ding ah milimte a kisiam tâk ziak un, a pu leh pateu kiang ah a piak, zia gampha tak ah kipat hin Israel botdok intin, Luipi khêl lam ah thêdal ding ahi.

¹⁶Israelte gitlo sak in gitlona a bawl ui; Jeroboam gitlonate ziakin Israelte chu thipsan ta ding ahi a tii, a tia.

¹⁷Jeroboam ji chu a kipan ah, a pawtdok ah, Tirzah a hung tung tai; tichun, a kotkhak sangkil a hung tun phatin, naupang chu a thi tai.

¹⁸A vui tau hi. LALPA‘n a suak jawlnei Ahijah thu a vagen sak dungzui in, Israel mi zosia’n a sûn tau hi.

¹⁹Jeroboam nasep dangte leh a galdo dan leh, a vaihawm dante chu, ngaitia, Israel lengte khangthu ah zik hilo a hem?

²⁰Jeroboam vaihawm sung chu kum sawmni leh ni ahi’n; tichun, a pu leh pate kiang in a ipmu tai; a chapa Nadab in ama thasâng in vai a hawm tai.

²¹Chun, Solomon chapa Rehoboam in Judai gam ah vai a hawm ah; a vaihawm pat lai in, Rehoboam chu kum sawmni leh khat ah upa ahi; LALPA‘n a min umna ding ah Israel nam zosia lak ah kipat a têlchuam Jerusalem khawpi chun kum sawm leh sagi vai a hawm hi. A nu chu Ammon numei Naamah ahi.

²²Judai gam ah mite chun LALPA mit mu in thil phalo a bawl tau ah; a pu leh pateu bawl zosia khêl in a bawl uh, a gitlonau chun LALPA a thangtawmsak ahi.

²³Amau inle, thingbul nuai tin leh mual sâng tin chung in thing milimte, mihing limte leh thoimualte a bawl tau a.

²⁴Gam sung ah chun pawsal kizuakte kizokna Inte le a umah; LALPA chun Israel chate khut ah a nawdaw namte buakna zosia dungzui in buakna tincheng a bawl tau hi.

²⁵Rehoboam lal kum, kum nga’na chun zia gual hin a hung umah: Aigupta Lengpa Shishak chu Jerusalem do dingin a hung kuan to a.

²⁶Lengpa In ah gothilte leh LALPA In ah gothilte chu a pawmang ah; a leng in a paw mang suak kêi hi. Chuleh, Solomon in a siam sana phawte zosiale a paw mang tai.

²⁷Lengpa Rehoboam in zia phawte thasâng ding ah chun sum-eng phawte a siam ah; Lengpa In vêngte leh lengpa In kotkhak vêngte lak ah lianpen khut ah chun a kolsak tai.

²⁸Lengpa chu LALPA Insung ah a lut phat leh, a chingpa chun a hun chawidok sek ah, a zaw phat leh a chingpa pindan sung ah chun a la lut kit sek hi.

²⁹Rehoboam thilbawl leh a nasep dangte haw chu, Judai gam ah Lengte Chanchin Lekhabu ah chun ziklut hilo a hem?

³⁰Rehoboam leh Jeroboam kikâl in a dam sung siau chu kidona a um zing tai.

³¹Rehoboam chu a pu leh pate kiang in a ipmu ta’n, David khawpi chun a pu leh pate thân in a vui tau hi. A nu chu Ammon mi Naamah ahi. Ama thasâng in a chapa Abijam in vai a hun hawm tai.