Read Vaiphei 1 LENGTE 15 Bible Online

1 LENGTE 15 - Vaiphei bible

1 LENGTE 15

¹Tu’hin, Nebat chapa Lengpa Jeroboam lal kum sawm leh giatna, Judai gam chun Abijam a hung lal a.

²Jerusalem ah kum thum vai a hawm ah; a nu chu Abishalom chanu Maakah a hi.

³Ama masang ah a pa’n a la zui lampi diklo ah chun ama le a chiajel ah; a lungthim chu a pa David gual in a LALPA Pathian mit mu in a ting zo ta puai.

⁴A banghileh, LALPA a Pathian in David ziakin, Jerusalem tungdok kit ding leh, a nung ah a chapa tungding dingin Jerusalem ah thaumei a la pia tai.

⁵Hit mi Uriah chung ah bep lo ngal, David in a damsung in LALPA mit mu in thil dik ngen a bawl ah; a thupiak bangmatik in a kiheisan puai.

⁶Rehoboam leh Jeroboam kikâl in a damsung siau kidona a bei ta puai.

⁷Tu’hin, Abijam thilbawl leh a nasep dangte zosia chu, Judai gam ah Lengte Chanchin kizikna Lekhabu chun ziklut hilo a hem? Abijam leh Jeroboam kikâl in kidona a um zing hi.

⁸Abijam chu a pu leh pate kiang ah a i-mut phatin, David khawpi chun a vui tau hi; a thasâng in a chapa Asa chun vai a hawm tai.

⁹Israelte Lengpa Jeroboam lal kum sawmni’na chun Asa chun Judai gam ah vai a hawm hi.

¹⁰Jerusalem ah kum sawmli leh khat vai a hawm ah, a nu chu Abishalom chanu Maakah ahi.

¹¹Asa chun a suanpa David bawl gual in LALPA mit mu in thil dik a bawl a.

¹²A gam sung ah kipat in pawsal kizuakte In haw chu a ladok ah; a pan a bawl milimte zosia chu a lamang sik sek hi.

¹³A nu Maakah chun Asherah milim ki’dak um takte lim a bawl ziakin, a lengnu hi’na a paithâk piak ah; Asa chun a nu milim chu a suksiat piak ah, Kidron lui kiang in a hâl tum tai.

¹⁴Himaleh, thoimualte chu vang a subei thiang puai; ahi’n la, Asa lungthim chu a dam sung sia’n LALPA lam in a dik hi.

¹⁵A pa khan a la lat thiansa leh ama’n a lat thiansa thilte, dangkate, sana leh ûm leh bêlte chu LALPA In ah a la lut tai.

¹⁶Asa leh Israelte Lengpa Baasha kikâl in a dam sungsiau kidona a um zing tai.

¹⁷Israelte Lengpa Baasha chu Judai gam ah lengpa do dingin a hang chia to ah, Judai gam ah Lengpa Asa kiang in kuama a lut leh a pawt daw theilona ding un, Ramah khua chu a la bawl tai.

¹⁸Zia nung ah chun, LALPA In ah gothilte leh Leng Inpi gothilte, sana leh dangka zosia chu Asa chun a lakhawm ah, a suakte khut in a pedok ah; tichun, Lengpa Asa chun Damaska khua chêng Suria Lengpa Hezion chapa Tabrimon chapa Ben-hadad kiang in a sawl tai.

¹⁹A kiang in, “Ka pa leh la pa kikâl ah kizopna a um gual in, kei tawh nang kikâl in le kizopna um hen; ngai tia, dangka leh sana thilpiak ka hun thot hi; ka kiang ah kipat a kiandaw theina dingin Israel Lengpa Baasha tawh la kizopnau hi susia’n,” ti’n a thot a.

²⁰Ben-hadad in Lengpa Asa thu chu a la ngai ta’n, Israel khawpite chu do dingin a sepai hon hotute chu a sawl ta’; Izon, Dan, Abel-beth-maakah leh Khineroth chu a do tau a; Naphtali gam tiang in a zo tau hi.

²¹Baasha in zia thu chu a het phat in, Ramah khua a bawl chu a haisan ah, Tirzah khua’n a um zaw tai.

²²Zia nung ah chun Lengpa Asa chun Judai gam zosia ah kuama hawi chuam umlo in thuphuan a bawl tai. Baasha in a la bawl Ramah khua thing leh suangte zosia chu a lamang ua; Lengpa Asa chun ziate chu mang in Benjamin gam ah Geba leh Mizpah khua a bawl tai.

²³Asa nasep dangte zosia leh a thilhithei dan zosia leh a hisa zosiate, a khawpi bawldawte chu, Judai gam ah Lengte Chanchin kizikna Lekhabu ziklut hilo a hem? Ahi’n la, a têk lam ah chun a keng ah natna a hung um tai.

²⁴Asa chu a pu leh pate kiang ah a i-mut phatin, David khawpi, a pu leh pate kiang ah chun a vui tau ah. A chapa Jehoshaphat in a thasâng in vai a hawm tai.

²⁵Judai gam ah Lengpa Asa lal kum ni’na chun, Israelte Lengpa Jeroboam chapa Nadab in Israelte chung in vai a hawm pan ah; Israelte chung in kum ni sung vai a hawm hi.

²⁶LALPA mit mu in thil phalo a bawl ah; a pa umdan zui in, Israelte a gitlo sakna leh a gitlonate haw tawh le ahi.

²⁷Issakhar Inkuan ah mi, Ahijah chapa Baasha chun ama chu a do ah; chun, Baasha chun Philistinte gam channa, Gibbethon ah chun ama chu a that tai. Nadab leh Israel mi zosia’n Gibbethon chu a ûm kîmvêl tâk ziak un.

²⁸Judai gam ah Lengpa Asa lal kum thumna chun, Baasha chun ama a that ah, a thasâng ah leng in a pang tai.

²⁹Leng ah a pan sung in, Jeroboam Inkuante zosia chu a that gam ah; Shilon mi a suakpa, Ahijah mang ah a gen, LALPA thugen dungzui in, a sukchimit masia a hathei taphot Jeroboam Inkuante lakah pakhatle a khêk puai.

³⁰Jeroboam gitlona ziak, Israel a gitlo sakna ziak leh, LALPA, Israel Pathian a lungnat sakna ziak ahi.

³¹Tu’hin, Nadab nasep dangte leh a thilhi zosia chu, Israel Lengte Chanchin kizikna Lekhabu chun ziklut hilo a hem?

³²Israelte Lengpa Baasha leh Asa kikâl ah chun a dam sung siau kido’na a umtheng tai.

³³Judai gam ah Lengpa Asa lal kum kum thumna chun, Israelte Lengpa Baasha chu Tirzah ah Israelte chung in a lal pan a; kum sawmni leh li a lal hi.

³⁴Jeroboam lampi a zui ziakin, LALPA mit mu in thil phalo a bawl ah; a gitlona chun Israelte le a gitlosak hi.