Read Vaiphei 1 LENGTE 16 Bible Online

1 LENGTE 16 - Vaiphei bible

1 LENGTE 16

¹Ziaphatchun, Baasha kãl in, Hanani chapa Jehu kiang in, LALPA‘n zia gual hi thu a hun gen a:

²“Zia gual lawm lawm ah hin leivui lakah kipat in ka hun ladok ah, ka hun chawilian ah; ka mipi Israelte chung ah leng in ka hun koi ah; nang in Jeroboam umdan zui ah, a gitlonau ah ei lungnatsak dingin; Ka mi Israelte la gitlosak ahi.

³Ngai in, Baasha suante leh a Inkuante lamang ing ka tin; tichun, Nebat chapa Jeroboam Inkuante gual in nang Inkuan le hun bawl ding ka hi.

⁴Baasha mite khawpi sung ah thite chu uicha’n ne’n tin; chuleh, gamtalai ah thite chu chunglêng vachate’n ne ding a hiu,” ti in.

⁵Tu’hin, Baasha nasep dangte leh a thil hi, a hatnate chu Israel lengte khangthu ziklut hilo a hem?

⁶Baasha chu a pu leh pate kiang in a ipmu ta’n, Tirzah ah a vui tau ah; a chapa Elah chu a thasâng in a vai a hawm tai.

⁷Jeroboam Inkuante gual ah a umna a khut nasep ah Pathian a lungnatsakna, LALPA mit muah thil phalo zosia a bawlna ngei leh, ama a tha ziakin Hanani chapa jawlnei Jehu kiang in, LALPA chun Baasha leh a Inkuante kãl in thu a hun gen tai.

⁸Judai gam ah Lengpa Asa kum sawmni leh guk a ti’n in, Baasha chapa Elah chun Israelte chung in vai a hawm pan ah, kum ni a lal hi.

⁹A suakpa Zimri, a kângtalai kimkhat chung ah hotu’ a siam chun, Tirzah ah a In enkolpa, Arza In ah a zukham lai in a la tup gu ta’n.

¹⁰Zimri a lut ah, a that ah, Judai gam ah Lengpa Asa kum sawmni leh sagi a lal kum in a that tai. Ama thasâng in ama chu leng in a pang tai.

¹¹Chun, a lal In ah lalchutpha a kichut phatin, Baasha Inkuan ah mi zosia chu a that ah; a gualte, a chanaute leh pawsal zosia pakhatle a hawi puai.

¹²Jawlnei Jehu mang ah Baasha kãl ah LALPA thugen dungzui in, Baasha Inkuante zosia chu Zimri in a chuti sukmangthai ahi.

¹³Baasha gitlona zosia leh, a chapa Elah a dukdak lonau ah a gilo tau ah, zia chun Israelte le a gitlosak tai. LALPA, Israelte Pathian lungnat sak dingin, a choktho ta ahi.

¹⁴Tu’hin, Elah thiilhite leh a nasep dangte chu Israel lengte Chanchin Lekhabu chun ziklut hilo a hem?

¹⁵Judai gam ah Lengpa Asa lal kum sawmni leh sagi’na chun, Zimri chu Tirzah khua’n ni sagi sung a lal ah; Philistinte gam channa Gibbethon do dingin mipite chu a kikul tau a.

¹⁶Sepaite chun, “Zimri in lengpa a changgu hen, a that tai,” ti thu a hun he tau a; ziaphatchun, a giaknau mun ah chun sepai zosia chung ah lalpen Omri chu, zia ni kipat chun Israelte chung ah leng ah pang dingin a siam tau hi.

¹⁷Chuleh, Gibbethon ah kipat in Omri chu a chia to ah, Israelte zosia’n a panpiu ah; Tirzah khua chu a la tau hi.

¹⁸Zimri chun khawpi chu a lâk zaw ahi tai, ti a het phat in, leng Inpi chun a lut ah, leng Inpi chu a hâl ah, ama kihâl khum in a thi tai.

¹⁹LALPA mit mu ah a gitlo dante, Jeroboam lampi a zui dante leh a gitlona bawl chun Israelte a gitlosak tai.

²⁰Tu’hin, Zimri nasep dangte leh a thil sawmgukte chu, Israel Lengte Chanchin Lekhabu chun ziklut hilo a hem?

²¹Ziaphatchun, Israel mipite chu pawl ni in a kikhen tau a; mipi kimkhat in Ginath chapa Tibni chu lal ah bawl dingin a zui un; a kimkhat in Omri a zui ui.

²²Himaleh, Omri zui mipite chun, Ginath chapa Tibni zuite chu a do ua, a zo tau a; tichun, Tibni chu a thi, Omri chu a lal tai.

²³Judai gam ah Lengpa Asa lal kum sawmthum leh khatna chun, Israelte chung in Omri chun vai a hawm pan ah, kum sawm leh ni vai a hawm ah; Tirzah khua’n kum guk vai a hawm hi.

²⁴Shemer kiang ah kipat Samaria Mual chu dangka talent ni in a chawdok ah; Mual chungvûm ah chun In a bawl ah, a In sak khawpi min ah a mual neipa min chu pu’n, Samaria a sak tai.

²⁵Himaleh, Omri chun LALPA mit mu in thil phalo a bawl ah; a ma-âng ah um zosiate sâng ah phalo zaw’n a hung um tai.

²⁶Nebat chapa Jeroboam lampi zosia a zui ah, a dukdaklona ziak ua LALPA, Israelte Pathian lungnatsak dingin Israelte a gitlosak tai.

²⁷Tu’hin, Omri in a bawl, a nasep dangte leh a thilhithei dan a etsakte chu, Israel lengte khangthu chun ziklut hilo a hem?

²⁸Tichun, Omri chu a pu leh pate kiang in a ipmu ta’n, Samaria khua chun a vui tau hi. A chapa Ahab chu ama thasâng ah vaihawm in a pang tai.

²⁹Judai gam ah Lengpa Asa chu kum sawmthum leh giat a lal kum in, Omri chapa Ahab chu Israelte chung in vai a hawm pan ah; tichun, Omri chapa Ahab chun Samaria khua’n kum sawmni leh ni vai a hawm hi.

³⁰Omri chapa Ahab chu a ma-âng ah vaihawm ah a la pangte zosia sâng in, LALPA mit mu in a gilo pen hi.

³¹Nebat chapa Jeroboam gitlonate zui chu thil bailam ah ngai in, Sidon te Lengpa Ethbaal chanu Jezebel chu ji’n a hang nei ah; a chia ah, Baal na chu sêm in a ho tai.

³²Chuleh, Samaria khua a bawl Baal In ah chun Baal â dingin mâichâm a tungding tai.

³³Ahab chun milim a siam ah; ama masang ah um Israelte leng zosia khûp in, LALPA, Israelte Pathian lungnatna choktho dingin Ahab chun thil a bawl sawn nalai hi.

³⁴Ama hun lai ah chun, Bethel mi Hiel in Jeriko khua a bawl ah; a chatîl Abiram chun a suangphûmte chu a lem ah; Nun chapa Joshua kiang ah LALPA‘n a gen dungzui in, a chapa neupen Segub in a khawpi chu a bawl zo bep hi.