Read Vaiphei 1 LENGTE 17 Bible Online

1 LENGTE 17 - Vaiphei bible

1 LENGTE 17

¹Tu’hin, Tishbi mi Elijah, Gilead gam ah Tishbe khua um chun, Ahab kiang in, “A âng ah ka dinna pa, LALPA, Israelte Pathian a hin gual in, ka thu lo in, zia kumte ah hin gua leh daitui him him ke lo ding ahi,” a tia.

²LALPA‘n a kiang in thu a hun gen a:

³“Zia kipat hin chia inla, sualam ah pet inla, Jordan sualam ah Kherith Lui kiang ah vakisêl in;

⁴zia lui tui chu dawn in; chuleh, zia mun ah chu nang hun vâk dingin va-akte chu thu ka pe zo tai,” ti in.

⁵Tichun, a chia ah, LALPA thu dungzui in a bawl tai; Jordan sualam ah Kherith Lui kiang ah chun a vachêng tai.

⁶Va-akte chun jingkal lam leh vaithum tawh sa a vapiau ah, nitâk lam leh vaithum tawh sa a vapia kit sek ui; tichun, lui tui chu a dawn ah;

⁷himaleh, gam ah gua a zuk lo ziakin, chomkhat zaw in zia lui chule a hung kang tai.

⁸LALPA‘n a kiang in thu a hun gen a:

⁹“Tu’hin kipan inla, Sidon ah Zarephath khua vachia in; zia chun vachêng in; zia tak ah chun meithâi pakhat nang hun vâk dingin thu ka pia ta ngal in,” a tia.

¹⁰Tichun, a kipan ah, Zarephath khua’n a chia tai. Khawpi kotpi a tun in meithâi pakhat, thingkang chom in a la um ah; amanu chu a koah a kiang in, “Ka dawn ding tui neukhat ei hun pia’n,” a tia.

¹¹A la ding ah amanu chu a chia lai tak in a ko ah a kiang in, “La khut in vaithum themcha khat ei hun choi piak in,” a tia.

¹²Himaleh, amanu chun, “LALPA la Pathian min suang in ka gen hi: a kikang min bangmacha ka nei puai; bêl ah an khutdim khat tawh, thawl ah sathau neucha bep ka nei hi; tu’hin thingkang khat leh ni chom ing ka tin, In ah kei tawh ka chapa â ding ah vabawl ah, zia chu nêk ah, a bân chu thi mai ding ka hiu,” a tia.

¹³Elijah chun, a kiang in, “Lau kin; chia inla la gen gual ah chun vabawl in; himaleh, kei â ding vaithum tâng neucha hun bawl phot inla ei hun choi piak in; ziazaw chuleh, nang â ding tawh, la chapa â ding kibawl in.

¹⁴LALPA, Israel Pathian in zia gual hin a gen tai: LALPA‘n lei chung ah gua a zuksak hun a hung tun masang sia, bêl ah an chu nêk zaw hipua’n tin, thawl ah sathau chule tasam pua’n ah, a tii,” a tia.

¹⁵Amanu chu a chia ah, Elijah gen gual in a vabawl tai; tichun, amanu tawh ama tawh a In sung mi zosia’n ni tam tak a ne tau hi.

¹⁶Elijah kiang ah LALPA‘n thu a gen gual in, bêl ah an chu mat zaw ahi pua, thawl ah sathau chule a tasam diak ta puai.

¹⁷Zia nung ah chun, numei a Inneinu, chapa chu a hung dam pua; a damlona chu a khawk ma ma ah, ama ah chun hat a bei tai.

¹⁸Ziaphatchun, amanu chun Elijah kiang in, “Ka chung ah bang a hem la lungdamlo’na, aw Pathian mi? Ka gitlona ei kigêl dawsak kit ding leh ka chapa thi’sak ding ah hung la hi maw!” a tia.

¹⁹Ama chun meithâinu kiangah chun, “La chapa chu ei pia’n,” a tia. A âng ah kipat chun a la, ama giakna pindan chungnung lam ah chun a pâi to ah, ama lupna chun a sial a.

²⁰LALPA kiang in a kiko ah, “Aw LALPA ka Pathian, a chapa that in, ka umnanu chung nasan ah le thil phalo la hung tunsak a hem?” a tia.

²¹Naupang chung ah chun ama chu thumvei a vak bawk ah, LALPA a ko ah, “Aw LALPA ka Pathian, zia naupang hinna hi a sung ah lutsak kit in,” a tia.

²²LALPA chun Elijah aw chu a ngaitha ta’n; naupang hinna chu a sung in a lutsak kit ah, a hung hal tai.

²³Elijah chun naupang chu a pâi ah, In chungnung ah kipat In sung in a hun pui lût ah, a nu kiang in a pia tai; ziaphatchun, Elijah chun a nu kiang in, “En in, la chapa hi a dam kit tai,” a tia.

²⁴Tichun, numeinu chun Elijah kiang in, “Tu’hin Pathian mi la hi ti leh, la kam ah um LALPA thu chu thutak ahi ti ka he tai,” a tia.