Read Vaiphei 1 LENGTE 18 Bible Online

1 LENGTE 18 - Vaiphei bible

1 LENGTE 18

¹Ni tam tak nung in, khawkhâlna a kum thumna chun, Elijah kiang in LALPA‘n thu a hun gen a, “Chia inla, Ahab vakimusak in; lei chung ah gua hun sawl ding ka hi,” ti in.

²Tichun, Elijah chu Ahab vakimu sak dingin a chia a. Kial chu Samaria gam in a huaisia ma ma a.

³Ahab in a lal Insung ah vaipawpa Obadiah chu a ko ah. (Zia Obadiah chu LALPA lau tak mi ahi’n;

⁴Jezebel in LALPA jawlneite a la thâlup lai ah khan, Obadiah in jawlnei za khat a pui ah, kawlhawm khat ah sawmnga nga’n a sêl ah, vaithum leh tui in a la vâk a.)

⁵Tichun, Ahab in Obadiah kiang in, “Gam sung ah tuinâkte zosia leh luichate zosia vaen suak in; gancha khenkhat bêk I hukdaw theina ding ah sakolte leh sabiltungnute hi I hinsua theina dingin, a nêk diu hampa I mu khâk leh,” ti’n a sawl a.

⁶Tichun, gam chu a chot suak theina ding un a paniu in chan a kihawm tau a; Ahab ama ngen in lam khat lam in a chia ah, Obadiah le a chuam in a chia tai.

⁷Obadiah chu lampi a chia zing lai in, Elijah in a la kituakpi ah; Obadiah in ama chu a la he, a mai ah lei tual si’n a kiang in, “Ka LALPA Elijah, nang kha la hi maw?” a tia.

⁸Ama chun a dawnhuah, “Kei ka hi. Chia inla, la LALPA kiang in Elijah zia tak ah hin a um hi ti’n vahil in,” a tia.

⁹Obadiah chun, “Bang gual gitlona ka nei ah la suak hi Ahab in a tha ding ah piakdaw gaw ziang la hem?

¹⁰LALPA la Pathian hinna’n ka kihaksial hi: Ka lalpa‘n nang hawl ding ah a sawl lona gam leh nam a um ta puai; tichun, ‘Zia hin a um puai,’ a ti phat ua leh, zia gam a hem nam a hem chun a hung mu paw ngei nau hi ti a kihaksial sak sek ahi’n.

¹¹Himaleh, tu’hin nang in, ‘Chia inla, la lalpa kiang in, Elijah zia tak hin a um hi, ti vahil in,’ la ti’n.

¹²La kiangah kipat ka pawt daw phat leh, LALPA thagau in nang chu ka hetlona mun ah a la paw mang intin; tichun, Ahab kiang ka tun ah ka hil ah ama’n a hun mu zaw lo phat leh, kei la suak hin ka tangval lai ah kipat LALPA a la lau ta hi malengle, ama’n ei that mai ding ahi.

¹³Jezebel in LALPA jawlneite a tha lai ah ka thil hi, LALPA jawlneite za khat kawlhawm khat ah sawmnga nga ka la sêl ah vaithum leh tuile ka la piak dan kha, ka lalpa kiangah hun hil nai lo khatto a hiu em?

¹⁴Ahi’n la, nang in tu’hin, ‘Chia inla, la LALPA kiang in Elijah zia hin a um hi ti vahil in,’ lei ti’n; ama chun ei la that ngei ngei ding ahi,” a tia.

¹⁵Elijah chun, “A ma-âng ah ka dinna, sepai honte LALPA min in, tu’ni hin a âng ah vakilâk ngei ding ka hi,” ti’n a gen a.

¹⁶Tichun, Obadiah chu Ahab kituakpi ding in a chia ah; chuleh, Ahab chu le Elijah kituakpi dingin a kipan tai.

¹⁷Ahab in Elijah a mu phât in a kiang in, “Nang la hi maw Israelte sulungngaipa chu?” ti’n a gen a.

¹⁸Elijah chun a dawnhu ah, “Keima’n Israelte ka sulungngai puai. La Inkuanpite tawh, LALPA thupiakte nusia in Baalte nung la zui tâk ziak in, nang la hi.

¹⁹Ziaziakchun, tu’hin Karmel tâng ah Israelte zosia tawh, Baal thiampu za li leh sawmngate kha tawh, Jezebel dawkan ah an ne sek Asherah jawlnei za li te kha ei hun ko khawm piak in,” a tia.

²⁰Tichun, Ahab in Israel chate zosia kiang in mi a sawl ah; chuleh, jawlneite zosia chu Karmel tâng in a ko khawm tai.

²¹Ziaphatchun, Elijah in mipi zosia chu a hun nai ah, “Lung vânglak tak ah bang chan chawm lumlet ding la hiu em? LALPA chu Pathian ahileh, ama zui unla; Baal chu ahi zawk leh le zui tau in,” a tia. Mipite chun kam khat inle a dawnhu puau hi.

²²Ziaphatchun, Elijah in mipite kiang in, “Kei, keima bepcha hi LALPA jawlnei um sun ka hi tai; himaleh, Baal jawlneite chu za li leh sawmnga hial a hiu hi.

²³Bawngchal pani ei hun pedok unla; amau in bawngchal pakhat kitêl masak uh hen; zia chu sem uh hen la, thing chung ah chun koi uh hen; ahi’n la, mei ah a hâl lo diu ahi; bawngchal khat zawk chu ke’n bawl ing ka tin, thing chung ah chun koi ing ka tin, ahi’n la mei in hâl pua’ng ka.

²⁴Ziaphat chuleh, nang un la pathian uh ko unla, ke’nle LALPA min chu ko ing ka; meikuang ah hun dawnhu pathian zaw chu Pathian tak chu hiding ahi,” a tia. Mipite zosia chun, “La gen dik hi!” ti’n a dawnhu tau a.

²⁵Ziaphatchun, Elijah in Baal jawlneite kiang ah chun, “Nanghaw a tam zaw la hiziak un, Bawngchal chu têl masau inla bawl masau in; ziazaw chuleh, la pathian uh ko unla, ahi’n la, mei ah la hâl lo diu ahi,” ti’n a gen a.

²⁶Tichun, amau chun bawngchal a piak uh chu a lau ah a bawl ua; tichun, jingkal ah kipat sûn chan in Baal min a ko tau ah, “Aw Baal, ei dawnhu in!” ti’n a kiko ua. Himaleh, awgit a um pua, dawnhu’na le a um diak puai. A mâichâm siam uh kîmvêl ah chun a kidiang vêl ziang tau a.

²⁷Sun phat ah chun, Elijah in amau chu a engho ah, “Ngai tak in kiko un! Ama chu pathian khat ahi ngei hi; a kilunggêl lai tak a hem; ahiloleh, a vâk mang kha a hem, khual ah zin a hem; ahiloleh, a ipmu phot hal ngai khatto hi’n a,” a tia.

²⁸Aw ngai tak in a kiko tau a; chuleh, a hidan sek gual un chemjamte leh cheichate’n a ki-âtliam ua, a taksau ah chun thisan a pawtdok zeng zung ziang tai.

²⁹Sûn nung a hung hita’n, nitâk lam kithoina chi khat lat hun tiang in a kipawng bawl ziang tau ah; himaleh, aw git bangma a um pua, dawnhu’na leh ngaisakna him a um diak puai.

³⁰Ziaphatchun, Elijah chun mipite zosia kiang in, “Ei hun nai deu un,” ti’n a gen a; tichun, mipite zosia chun a hun nai tau a. LALPA mâichâm sukchip ah umsa chu a siampha phot a;

³¹“La min Israel hita’n a,” ti ah LALPA thu a la thunna Jakob chapate nam sawm leh nite dungzui in, Elijah chun suang sawm leh pani a la;

³²suang ah chun LALPA min in mâichâm pakhat a bawl tai. Chuleh, mâichâm kîmvêl ah chun buchi te’na dim ni dawl ding a cho kuak a.

³³Ziazaw chun, thing chu kitup tak in a koi ah; bawngchal chu a sem nêl ah, thing chung ah chun a koi a. Ama chun, “Tuibêl pali tui vasung dim unla, hâlmang thillat chung leh thing chung ah chun vabuak un,” a tia.

³⁴Ziazaw chun, “A ni veina vahiu in,” a tia; chun, nivei a hitau a. “A thum veina dingin vahi kit un,” a tia; tichun, a vel thumna dingin ahi kit ua,

³⁵tichun, mâichâm kîmvêl ah chun tui a luang ah, leikuak chule tui in a chûm dim tai.

³⁶Kithoina chi khat lat hun ah chun jawlnei Elijah in a hun nai ah, “Aw LALPA, Abraham, Isak leh Jakob Pathian, nangma hi Israel ah Pathian la hi’n, kei hi la suak ka hi ti leh, lei sawl ah zia thilte hi ka bawl ahi ti tu’ni hin hun tâklang in.

³⁷Ei dawnhu in, aw LALPA, ei dawnhu in! Tichun, zia tak ah mipite hin, aw LALPA, nang chu Pathian la hi ti leh, nang in a lungthimteu la kihei kitsak ah, nangma a hun hiattheina ding un,” a tia.

³⁸Ziaphatchun, LALPA meikuang a hung ketha, hâlmang thillat, thing, suangte leh leivui natiang in a hun kâng tum ah; kuak sung ah tui nasan chule a kâng nâm tai.

³⁹Mi zosia’n zia chu a mu phât un, a mai ua lei tual si’n, “LALPA chu Pathian ahi ngei mai hi! LALPA chu Pathian ahi ngei mai hi!” a ti tau a.

⁴⁰Elijah chun a kiang un, “Baal jawlneite chu man un; a lak ua pakhat chale suachâksak kiu in,” a tia. Tichun, a man ua; Elijah in Kishon Lui in a pui suk ah, zia tak ah chun a that gam tai.

⁴¹Elijah chun Ahab kiang in, “Chia to in, ne’n la dawn in; gawpi zu ding husa a um hi,” a tia.

⁴²Tichun, Ahab chu ne ding leh dawn dingin a chia to tai. Elijah chu Karmel tângvûm ah a chia to ah; zia tak ah chun, leitual in a bokkhup ah, a khup teni kikâl in a maichang a silut a.

⁴³A suakpa kiang in, “Tu’hin vachia to inla, Tuisuagiat lam vaen in,” a tia. A chia to ah, a vaet leh, “Bangma a um puai,” a tia. Ziaphat chun, “Sagivei vachia kit in,” a tia.

⁴⁴A sagiveina chun, “En tiam in, mihing khutbom sâng ah lianzaw lo ding, sûmvom neucha Tuisuagiat ah kipat a pawtdok hi,” a tia. Ziazaw chun, Elijah in, “Chia inla, Ahab kiang in, ‘La kângtalai khit det inla gua’n a hun huam ma’n chia suk in,’ vati’n,” a tia.

⁴⁵Chomlokâl in van chu sûmpi tawh thigua chun a suvom suak ta mai ah; gua nasa tak in a hung zu tai. Ahab chu a taidok ah, Jezreel ah a chia tai.

⁴⁶Himaleh, LALPA chun Elijah a hun suhat ah; a kawng a gâkchak ah, Ahab tunma’n Jezreel khua lutna chan a la tai tung tai.