Read Vaiphei 1 LENGTE 2 Bible Online

1 LENGTE 2 - Vaiphei bible

1 LENGTE 2

¹David thi’na ding a nai phatin, a chapa Solomon chu thu a hil ah, a kiang in:

²“Lei chung zosia dan pangai ah chia ding ka hita’n; ziaziakchun, hat tak in um inla, la pawsal hi’na kilat sak zing in.

³Khoi ah le la kiheina zosia la lawtin theina dingin, LALPA la PATHIAN thupiak vop inla, a lampi dan zui ding, a thuse’te vop ding, a thupiakte, a dan bawlte, a thu hiatsakte, Mosi Dan ah a zik gual in zui in.

⁴LALPA‘n ka chungchâng thu ah, ‘La chateu in a hinna zosiau leh a lunggil zosiau tawh, ka âng ah thutak ah a um ua, a umdan uh a chit thei uh chun, Israelte lalchutpha chung ah kichu ding mi tasam pua’n la,’ a ti thu a sutzop theina ding in,” a tia.

⁵Zia ban ah chun, Zeruiah chapa Joab in ka chung ah a bawlte kha la hia’i. Israel hotu pani, Ner chapa Abner leh Jether chapa Amasa chung ah a bawlte; a thalup ah, gâl kicham lai tak ah thisan a sua ah, a kengtawdap leh a kawnggâk ah kidona thisan a be dante kha.

⁶Ziaziakchun, la pilna dungzui in bawl inla, a samkâng ta chu Sheol ah lungmuang tak in chiasak kin.

⁷Ahi’n la, Gilead mi Barzillai chapate chung in ngilneina latsak in; amau chu la dawkan ah nêksak in, amau chu la suapi Absalom ziak ah ka jam lai in ka kiang in a hung ngâl un.

⁸Ngai in, Bahurim ah Benjamin mi Gera chapa Shimei la kiang in a um hi; ama chun, Mahanaim ah ka jam lai khan pausia huaisia tak ei sap khum ah; himaleh, ei dawn dingin Jordan ah a hung suk ah, a kiang in, “Chemjam in that pua’ng ka,” ti’n LALPA âng in ka la kihaksial ta’n.

⁹Ziaziakchun, tu’hin vang gitlo bei in sim kin la, mipil la hi’ngâl ah; a chung ah la bawl ding dan la henai. Ahi’n la, a sam kâng chu thisan tawh chia suksak ta’n, ti’n a gen tai.

¹⁰David chu a pu leh pate kiang in a ipmu ta’n; David khawpi chun a vui tau hi.

¹¹David in Israelte chung ah a vaihawm sung chu kum sawmli ahi’n; Hebron ah kum sagi vai a hawm ah, Jerusalem ah kum sawmthum leh thum vai a hawm hi.

¹²Zia nung chun, Solomon chu a pa lalchutpha chung in a chu ta’n; a lenggam chu lopi tak ah phudet in a um tai.

¹³Haggith chapa Adonijah chu Solomon nu Bathsheba kiang in a hung ah, amanu chun, “A pha lam ah hung la hem?” ti’n a dong a. Ama chun, “A pha lam ahi.

¹⁴La kiang in thu khat gen ding ka nei hi,” a tia. Amanu chun, “Gen ta’n la,” a tia.

¹⁵Ama chun, “Lenggam hi kei â ahi ti la hia’i. Israel mite zosia chun kei vaihawmtu hiding in a mêl uh kei lam a ngat un; himaleh, lenggam chu a kihei in, ka suapipa a hung chang tai! LALPA‘n ama a piak ahi ngâl a.

¹⁶Tu’hin, la kiang in dotnop khat ka nei in ei phal piak in aw,” a tia. Amanu chun, “Gen ta’n la,” a tia.

¹⁷Zia gual hin a gen ta’n, “Ka hun ni la hi, Lengpa Solomon kiang in va gen inla (nang chu hun nial lo ding ahi ngâl in,) Shunam mi Abishag kha ka ji dingin ei pia hen,” a ti tai.

¹⁸Bathsheba chunle, “A phai, lengpa kiang in vagen piak ing ka,” ti’n a dawnhu tai.

¹⁹Bathsheba chu Adonijah â ding ah gen piak dingin Lengpa Solomon kiang in a chia ta’n. Amanu chu tuak dingin lengpa chu a kipan ah, a bokkhup ta’n; a lalchutpha chung in a chu suk ah, lengpa nu chutna’ kichu dingin a sawl ah; chuleh, a chang lam ah chun amanu chu a kichu tai.

²⁰Ziaphatchun, amanu chun, “La kiang in dotnop neucha ka nei in, ei nial lo dingin ka hun don hi,” ti’n a gen a. Lengpa’n amanu kiang ah chun, “He nu, don in, hun nial lo ding ka hi’ngâl in,” a tia.

²¹A nu chun, “Shunam mi Abishag hi la suapipa Adonijah tawh kichengleu hilo a hem?” ti’n a dong a.

²²Lengpa Solomon in a nu kiang ah chun, “Shunam mi Abishag chu Adonijah â ding ah bang ziak ah don la hem? Lenggam hile don ziang ta’n la! Ama chu ka u ahi ngâl in; ama â ding tawh, thiampu Abiathar â ding tawh, Jeruiah chapa Joab â dinginle don ta’n la!” a tia.

²³Ziaphatchun, Lengpa Solomon chun LALPA min in a kihaksial ah, “Adonijah hin ama hinna ngei kãl ah thugen ahilo chun, Pathian in a nop dan dan in, a khawk zaw’nle ei bawl mai hen;

²⁴tu’ a thutep gual ah ka Inkuan ei bawl piak ah, ka pa David lalchutpha ei chutsak ah, ei phudetpa LALPA hinna paume in ka ti ahi: tu’ni hin Adonijah thalup hiding ahi,” a ti tai.

²⁵Lengpa Solomon in Jehoiada chapa Benaiah a sawl ah, ama chun a vathat ah, a thi tai.

²⁶Lengpa chun thiampu Abiathar kiang in, “Anathoth ah la gam lam ah chia mang in; thi tâk la hi. Himaleh, Ka pa David âng ah LALPA PATHIAN thuthung thingkuang la jawn sek ziak leh, ka pa a sukgentheinau ah la la gentheipi ziakin, tu’hun ah hin hun that ziang lo ding ka hi,” a tia.

²⁷Tichun, Shiloh ah Eli Inkuan chungchâng ah LALPA thugen a guitun theina dingin, Solomon in Abiathar chu LALPA âng ah a thiampu hi’na a paitha tai.

²⁸Joab kiang ah chanchin thuthang a tun phatin, Joab chu Absalom lam in kihei lo maleh, Adonijah lam ah kihei ahiziak in, Joab chu LALPA hona puanbûk lam in a jam ah, mâichâm ningzumte chu a vatu tai.

²⁹“Joab chu LALPA puan In lam in a jam ah, mâichâm kiang in a um hi,” ti Lengpa Solomon a hil phat un, Solomon in Jehoiada chapa Benaiah kiang in, “Chia inla, vathat in,” ti’n a sawl a.

³⁰Benaiah chu LALPA hona puanbûk ah chun a hung lut ah a kiang in, “Lengpa’n, ‘Hung pawt in,’ a tii,” a vatia. Ama chun, “Ei puai, zia tak hin thi zaw ding ka hi,” a ti tai. Benaiah chun, “Joab in zia gual ah chun ei dawnhu hi,” ti’n lengpa kiang in thu a tut kit a.

³¹Lengpa chun a kiang in, “A gen gual chun bawl inla, a chung ah la khut tha’n la, vui in. Kei ah kipat leh ka pa In sung ah kipat Joab in midik thisan a sua’na maw chu la lâk mang theina dingin,

³²LALPA‘n ama thisan phuba ama luchung in kile’kit ding ahi; ama’n mi pani ama sâng ah dikzaw leh phazaw chung in khut a la tha ta’n, ka pa David het lo in chemjam in a la that hi: Israel sepai hotu Ner chapa Abner leh Judah sepai hotu Jether chapa Amasa te ni kha;

³³ziaziakchun, a thisan mawu Joab luchung leh kumtuang ah a suanteu luchung ah le’kit hiding ahi. Ahi’n la, David chung leh a suante chung leh a lalchutpha chung in LALPA ah kipat kumkhua’n muanna um in a,” a ti’n.

³⁴Tichun, Jehoiada chapa Benaiah chu a chia to ah, a chung in a khut a tha ta’n, a that tai; chuleh, ama chu gamthip ah a In ah chun vui ahi tai.

³⁵Lengpa chun Jehoiada chapa Benaiah chu sepaite chung ah ama sik in a koi ta’n; thiampu Zadok chu Abiathar sik in a koi tai.

³⁶Lengpa chun Shimei ko dingin mi a sawl ah, a kiang in, “Jerusalem ah In sa’n la, chêng in; zia kipat chun khoima la pawtdaw lo ding ahi.

³⁷Zia gual hi hi’n tin: La pawt daw ah, Kidron Lui la khêl ni ni’n, matheilo ah thiding la hi ti kihiat in; la thisan la luchung ngei ah chu ding ahi,” a tia.

³⁸Shimei in lengpa kiang in, “La gen chu a phai, ka lalpa, lengpa’n a gen gual chun la suak hin bawl ding ahi,” ti’n a dawnhu a. Shimei chu Jerusalem khua’n sawt tak a chêng tai.

³⁹Kum thum a hung tawpna chun, Shimei suakte pani chu Gath Lengpa Maakah chapa Akish kiang in a tai mang un; Shimei kiang ah chun, “Ngai tia, la suakte Gath khua’n a um ui,” ti a hil un.

⁴⁰Shimei chu a kipan ah, a sabiltung ah chuang in, a suakte hawl ding in Akish kiang in Gath khua lam ah chun a chia ta’n; Shimei chu a chia ah, a suakte chu Gath khua kipat in a hun pui kit a.

⁴¹Shimei chu Jerusalem khua kipat Gath khua lam in a chia ah, a hung tung kit tai ti Solomon a hil phat un,

⁴²Lengpa chun Shimei ko dingin mi a sawl ah; a kiang in, “Khoi ah le la vakdaw ngei ngei leh, la pawt ni ngei ngei in thi ding la hi ti chian tak in kihiat in, ti’n LALPA min in ka hun kikhâmsak hilo a hem? Nang inle ka kiang in, ‘La thil gen chu ke’nle pha ka sai,’ la ti’n.

⁴³Aleh, bang ziak ah LALPA ah la kitiamna leh thu ka hun piak chu zui lo la hem?” a tia.

⁴⁴Lengpa chun Shimei kiang ah chun, “Ka pa David chung ah la thil phalo bawl zosia la lunggil ngei in la kihet nai; ziaziakchun, LALPA‘n la gitlona la luchung in hun dit kit ding ahi;

⁴⁵himaleh, Lengpa Solomon maljawl in um intin, David lalchutpha chu LALPA âng in kumtuang ah phudet in um in a,” ti’n a gen a.

⁴⁶Tichun, lengpa chun Jehoiada chapa Benaiah chu thu a pia, ama chu a chia ah, a chung in khut a tha, a thi tai. Lenggam chu Solomon khut ah chun phudet in a um tai.